1 YUHANIS 3 - PEJANJIAN EMPAI CERITAU ILUAK

Anak-anak Allah

¹ Keruanila, Allah sayang nian ngan kitau, mangku kitau dikiciakka anak-anak Allah. Nyela, kitau anak Allah. Itula sebapau deniau nidau keruan kitau, karnau diau nidau keruan Allah.

² Kantin-kantinku diau kusayangi. Mbak kini kitau anak Allah. Anyautu lum kina'an, luak manau kitau nanti. Mangku kitau keruan, amun Keristus datang, kitau ka njadi luak Diau, karnau kitau ka nginak Diau luak manau Diau sebenaghau.

³ Gegalau jemau diau ngaghapka Keristus njagaui diriau, supayau beresia jak di dusau, suci luak Diau pulau.

⁴ Jemau diau bedusau melanggar ukum Allah, karnau dusau itu pelanggaran ukum Allah.

⁵ Kamu keruan, bansau Keristus datang endak ngabiska dusau manusiau, mangku Diau nidau bediau dusau.

⁶ Jemau diau idup seghundak ngan Keristus, nidau maju bedusau. Jemau diau maju bedusau nidau kekela nginak Keristus ngan nidau keruan Diau.

⁷ Anak-buaku, jangan kamu disesatka. Jemau diau ngerjauka kendak Allah asalau jak di Allah, luak Keristus pulau asalau jak di Allah.

⁸ Jemau diau maju bedusau asalau jak di Iblis, karnau Iblis bedusau jak di penembai. Batan inila Anak Allah datang, endak ngancurka kerjau Iblis itu.

⁹ Jemau diau la njadi anak Allah nidau agi bebuat dusau. Sipat Allah itula adau di diau, mangku diau nidau agi bedusau, karnau la njadi anak Allah.

¹⁰ Inila tandaunyau anak Allah ngan anak Iblis: Jemau diau nidau ngerjauka kendak Allah diau ukan anak Allah. Luak itu pulau jemau diau nidau nyayangi jemau lain.

Sangi sayangi

¹¹ Jak di senitu la dikiciakka ngan kamu pesan ini: Kamu mesti sangi sayangi.

¹² Jangan kamu luak anak Adam diau benamau Kain diau asalau jak di iblis ngan mbunua adingau. Mangku tuapau sebapau diau mbunua? Karnau kerjaunyautu ja'at galau, kerjau adingautu benagh.

¹³ Nidau nanti kemangan, amun deniau luat ngan kamu.

¹⁴ Kitau la ngalia jak di mati ke idup nian. Kitau keruan titu, karnau kitau nyayangi kantin-kantin kitau. Jemau diau nidau nyayangi masia dalam kuasau maut.

¹⁵ Jemau diau luat ngan kantinau, jemautu tukang bunua jemau. Mangku kamu keruan, bansau tukang bunua nidau bulia idup selelamaunyau.

¹⁶ Kitau keruan sayang Allah ngan jalan ini: Keristus nyeraka nyawaunyau batan endak kitau. Mangku kitauni mesti pulau nyeraka nyawau kitau batan endak kantin-kantin kitau.

¹⁷ Amun adau jemau diau buadau nginak kantinau nidau bediau, anyautu enggup nulung diautu, luak manau jemautu pacak ngiciakka, diau nyayangi Allah?

¹⁸ Anakbuaku, jangan kitau nyayangi cuman di mulut ngan kici'an ajau. Kitau mesti nyayangi nian ngan mbuktikanyau ngan perembak kitau.

Beghani ngadap Allah

¹⁹ Ngan carau luak itula kitau keruan, bansau kitau temasuak jemau diau asal jak di Allah diau benagh, mangku kitau tenang di adapan Allah.

²⁰ Amun kitau disalaka ati kitau, kitau keruan Allah lebia keruan sangkan kitau. Diautu ngeruani gegalaunyau.

²¹ Mangku, kantin-kantinku diau kusayangi, amun ati kitau nidau nyalaka kitau, mangku kitau beghani ngadap Allah.

²² Mangku setu diau kitau pintak ngan Diau, kitau ka bulia, karnau kitau ta'at ngan perintaHau ngan ngerjauka setu diau melemakka atiAu.

²³ Ini diau diperintaka Allah: Kitau mesti percayau ngan Ana'Au Yesus Keristus. Kitau pulau mesti sangi sayangi, luak la diajung Keristus.

²⁴ Jemau diau ta'at ngan perinta Allah, jemautu idup seghundak ngan Allah, Allah seghundak ngan diau. Mangku kitau keruan, bansau Allah maju seghundak ngan kitau, karnau Diau la ngenjuakka RuaHau ngan kitau.