1 YUHANIS 1 - PEJANJIAN EMPAI CERITAU ILUAK

Pirman diau idup

¹ Isi surat ini ngiciakka Pirman diau ngenjuakka idup. Diautu la adau jak di penembai, la kami dengagh ngan kinak ngan matau kaminila, lagi la kami kecakka ngan tangan kami nian.

² Idup itu la diancakka, kamini la ngina'au, mangku mbak kini kami ngiciakka ceritaunyau. Kami ngiciakka ngan kamu idup ngenianau diau selelamaunyau diau adau ngan Allah Bapak. Idup itu la diancakka ngan kami.

³ Setu diau la kami kinak ngan dengagh, itu pulau kami kiciakka ngan kamu, supayau kamu pulau suijauan ngan kami, ngikut idup seghundak ngan Bapak ngan Ana'Au Yesus Keristus.

⁴ Gegalaunyauni kami tuliska ngan kamu, mangku kitau injiak nian.

Nidau pacak idup dalam dusau, amun idup seghundak ngan Allah

⁵ Mangku inila ceritau diau la kami dengagh jak di Ana'Au diau pulau kami kiciakka ngan kamu, “Allah itu terang. Di Diau nidau bediau kelemanau.”

⁶ Amun kitau bekatau, bansau kitau idup seghundak ngan Diau, awuak kitau idup dalam keleman, semegi ajau ngan mbu'ung ngan nidau ngerjauka diau benagh.

⁷ Anyautu amun kitau idup dalam terang, luak Allah adau dalam terang, kitau idup suijauan sughang ngan diau lain, mangku dagha Yesus, Ana'Au, mbasua kitau jak di gegalau dusau.

⁸ Amun kitau bekatau, kitau nidau bedusau, kitau mbudika kitau sendighi, mangku kitau nidau idup seghundak ngan Allah.

⁹ Anyautu amun kitau ngaku'i gegalau dusau kitau ngan Allah, Diau ka nepati janjiAu ngan ngerjauka setu diau adil, mangku Diau ka ngabiska dusau kitau ngan mbasua kitau jak di gegalau perembak diau ja'at.

¹⁰ Amun kitau bekatau, bansau kitau nidau bedusau, kitau nganggap Allah pembu'ung, mangku Pirman Allah nidau bediau di ati kitau.