1 TIMUTIUS 6 - PEJANJIAN EMPAI CERITAU ILUAK

¹ Jemau diau njadi budak mesti nganggap tuanau pantas diregaui, mangku namau Allah ngan ajaghan kitau nidau pacak dikarutka jemau.

² Amun tuanau jemau percayau, jangan nidau diregaui, karnau semegi anak Tuhan. Budak itu mesti bekerjau lebia iluak agi, karnau tuan diau nerimau kerjau iluaktu semegi percayau ngan disayangi. Ajaghkala nian gegalaunyautu.

Ajaghan diau nidau benagh ngan tetancian

³ Amun adau jemau diau ngajaghka ajaghan diau lain ngan nidau tetuju ngan ajaghan diau benagh jak di Tuhan kitau Yesus Keristus ngan nidau pulau tetuju ngan ajaghan agamau kitau,

⁴ jemau itu geduak, awuak nidau terti tuapau-apau. Penyakitau galak bebala, mbuat jemau sengit, kacau, nggelak, sangsi,

⁵ becelikaian diau nidau udim-udim. Rupu'an ughangtu la buntu, nidau agi benagh. Ughangtu sangkau pacak kayau jak di agamau.

⁶ Nyela agamau mbuat kayau nian, amun jemau puas ngan setu diau adau di diau.

⁷ Nidau bediau diau kitau batak ke dalam deniauni, nidau bediau pulau diau pacak kitau batak keluagh deniau.

⁸ Jadila, amun adau baju ngan adau makanan.

⁹ Anyautu jemau diau endak kayau teguda ngan mecam-mecam serilau diau bigal ngan merusak. Serilau itu mbuat jemau celakau ngan benasau

¹⁰ karnau tetancian nimbulka serbau diau ja'at. Adau jemau diau nidau agi percayau karnau tanci, mangku banyak meghasauka sengsarau mangku nanggung nian.

Petua batan endak Timutius

¹¹ Anyautu kaba la njadi hak Allah, mangku kaba mesti njawuhi gegalaunyautu. Usahala njadi jemau diau benagh di adapan Allah, diau idup batan endak Allah ngan ngelapan, diau nyayangi jemau, ngaligh ngan nyanauka jemau.

¹² Bejuangla nian batan endak setu diau kaba percayaui, mangku kaba dapat upa idup selelamaunyau. Batan endak itula Allah milia kaba, masau kaba ngaku'i di mukau jemau banyak, bansau kaba percayau nian.

¹³ Mangku mbak kini di adapan Allah diau ngidupka gegalaunyau ngan di adapan Yesus Keristus diau ngaku'i ceritau diau benagh di mukau Puntius Pilatus, aku ngajung kaba nian,

¹⁴ ta'atila gegalau perinta itu ngan beresia ngan nidau becelakau, enggut Tuhan kitau Yesus Keristus dinyatauka,

¹⁵ masau diau ditetapka Allah. Diau tepuji ngan nguasaui gegalaunyau, rajau gegalau rajau, Tuhan gegalau tuan.

¹⁶ Diau sughang diau nidau pacak mati. Diau adau di terang diau besinagh nian diau nidau pacak dipasighi jemau. Sughang kia nidau kekela nginak Diau ngan nidau pacak ngina'Au. Diaula diregaui, kuasauNyau selelamaunyau! Amin.

¹⁷ Ingatkala jemau kayau di deniau ini, supayau jangan geduak ngan jangan ngandalka retau bendau diau nidau ka lamau. Ughangtu mesti ngaghapka Allah diau ngenjuakka gegalaunyau banyak kematila, supayau kitau riang nggunaukanyau.

¹⁸ Ingatkala jemau, supayau kayau ngan kerjau iluak, mura nulung jemau ngan galak ngenjuak.

¹⁹ Ngan carau luak itu ughangtu melungguakka retau njadi mudal diau iluak di masau diau ka datang, mangku ka bulia idup nian selelamaunyau.

²⁰ Ui, Timutius, jagauila setu diau la dipercayauka ngan kaba. Jawuhila kici'an diau nidau beresia ngan nidau begati ngan kici'an bebala mbalaka setu diau dikiciakka “kepintaran”.

²¹ Karnau adau jemau ngiciakka kepintarantu adau di diau, mangku nyimpang jak di ajaghan Keristen diau dituruti senitu. Aku bedu'a, supayau Tuhan iluak ngan kaba.