1 TIMUTIUS 5 - PEJANJIAN EMPAI CERITAU ILUAK

Sikap tuadap jemau percayau

¹ Jangan kaba marai jemau diau la tuau, tapitu tegughi diau luak bak kaba. Tegughila jemau mudau luak denga-sanak kaba,

² tinau diau tuau luak mak kaba, tinau diau mudau luak kelawai kaba ngan sikap diau beresia.

Ceritau randau

³ Regauila randau diau idup sughang.

⁴ Anyautu amun sughang randau adau anak ngan cucung, ughangtula diau mesti belajagh, bansau ughangtu wajib nulung denga-sana'au ngan mbalas keilu'an pejadi ngan nini'au. Itula diau melemakka ati Allah.

⁵ Randau diau nian idup sughang ngan nidau bediau jemau nyayiau cuman ngaghapka Allah. Siang malam diau maju bedu'a ngan mintak tulung jak di Allah.

⁶ Anyautu randau diau galak idup besesenang la mati, empuak diau gi idup.

⁷ Kiciakka titu pulau ngan randau-randau, supayau ughangtu idup ngan nidau becelakau.

⁸ Amun adau jemau diau nidau nyayia denga-sana'au, apau agi jemau seghumahau, jemautu ngelipat ngan lebia ja'at jak di jemau diau nidau percayau.

⁹ Randau diau endak dicatat, umurau mesti enam pulua lebia ngan cuman sekali belaki.

¹⁰ Randautu mesti tekenal ngerjauka kerjau diau iluak, misalau mbesakka ana'au ngan iluak, riang nerimau menda di ghumahau, mbasua keting jemau diau percayau, nulung jemau diau nanggung ngan ngerjauka nian gegalau kerjau diau iluak.

¹¹ Jangan ncatat randau diau gi mudau. Karnau amun serilaunyau kuat, diau endak belaki agi mangku ninggalka Keristus.

¹² Mangku diau besala nian, karnau nidau nepati janjiau.

¹³ Lagi pulau ngan ngeluagh masuak ghuma jemau diau belajagh malas. Mangku lebia ja'at agi diau ngiciakka jemau, ncampuri urusan jemau ngan ngiciakka setu diau nidau pantas.

¹⁴ Itula sebapau aku endak, supayau randau mudau belaki agi, mangku adau anak, nyayia ghuma-tanggaunyau, mangku musua nidau pacak ngarutka namau kitau.

¹⁵ Karnau la adau randau diau sesat ngikut iblis.

¹⁶ Amun adau jemau percayau diau adau denga-sana'au diau la randau, diau mesti nulung randau itu. Jangan enangka jemau Keristen lain nanggungka diautu. Ngan carau luak itu randau diau nidau bediau jemau pacak ditulung nian.

Ceritau pengulu jemau Keristen

¹⁷ Pengulu diau iluak kerjaunyau pantas diregaui duau kali lipat, terutamau jemau diau rajin beketuba ngan ngajagh.

¹⁸ Karnau dalam Injil ditulis, “Benatang diau dang ngighiak jangan ditukup mulutau.” Lagi, “Jemau diau bekerjau pantas nerimau upa.”

¹⁹ Jangan kaba terimau buru'an tuadap pengulu jemau Keristen, amun nidau dikiciakka duau madak tigau ughang.

²⁰ Jemau diau maju bedusau tegughila di mukau gegalau jemau Keristen, mangku diau lain njadi takut.

²¹ Di adapan Allah ngan Yesus Keristus ngan malaikat diau suci aku mintak nian, supayau kaba nuruti petua ini ngan jangan nyalaka jemau, amun lum ngeruani nian. Jangan milia rupau.

²² Jangan cepat nepiakka tangan di sughang jemau njadika diau pengulu. Jangan ngikut ngan dusau jemau. Jagauila diri kaba supayau maju beresia.

Petua diau lain

²³ Jangan agi minum ayiak bangkau ajau. Minumla anggur dikit, karnau busung kaba rajin sakit ngan badan kaba rajin litak.

²⁴ Adau jemau dusaunyau la keruan antak ka diadili. Adau jemau lainau dusaunyau ka dikeruani la udim diadili.

²⁵ Luak itu pulau kerjau diau iluak cepat kina'an, mangku diau nidau mura kina'an nidau pulau pacak maju tebuni.