1 TIMUTIUS 4 - PEJANJIAN EMPAI CERITAU ILUAK

Ajaghan diau nyesatka

¹ Rua Allah ngiciakka nian, bansau nanti ka adau jemau diau ngelipat, nidau agi ngikut Yesus. Ughangtu ka ngikut rua ja'at diau nyesatka ngan ngikut ajaghan iblis.

² Ughangtu ditipuka jemau diau mbu'ung ngan ati keci'au la tekatup.

³ Ughangtu nidau ngajung jemau nika, nidau ngajung makan makanan diau dijadika Allah, awuak bulia dimakan jemau diau percayau ngan Keristus ngan keruan diau benagh, amun beterimau-kasia ngan Allah.

⁴ Gegalaunyau diau dijadika Allah iluak. Nidau bediau diau aram, amun diterimau ngan beterimau-kasia ngan Allah.

⁵ Gegalaunyautu njadi alal karnau katau Allah ngan du'a.

Anak-bua Keristus diau iluak

⁶ Amun kaba ngajaghka gegalaunyautu ngan kantin-kantin kitau diau percayau, kaba ka njadi budak Yesus Keristus diau bekerjau ngan iluak. Kaba mesti maju neguaka ati kaba ngan katau Allah diau kitau percayaui ngan ajaghan diau benagh diau kaba turuti selamau ini.

⁷ Jawuhila ceritau mbu'ung niniak-niniak diau nidau begatitu. Belajaghla idup luak jemau Keristen diau iluak.

⁸ Melatia badan gi dikit gunaunyau. Melatia rua banyak gunaunyau, karnau adau janji batan endak idup mbak kini ngan idup nanti.

⁹ Kici'an itu benagh ngan pantas dipercayaui nian.

¹⁰ Itula sebapau kitau bejuang ngan bekerjau nian, karnau kitau ngaghapka nian Allah diau idup. Diautu pacak nyelamatka gegalau jemau, terutamau jemau diau percayau.

¹¹ Ajaghkala gegalaunyautu ngan ajungla jemau nurutau.

¹² Jangan sughang kia nidau meregaui kaba, karnau kaba gi mudau. Anyautu jadila penauan batan endak jemau percayau ngan kici'an kaba, perembak kaba, sayang kaba, percayau kaba, ngan keberesian idup kaba.

¹³ Penarau ini enggut aku datang, kaba mesti maju mbacau Injil nian ngan ngajagh ngan neguaka jemau.

¹⁴ Jangan lalai nggunauka kuasau diau dienjuakka Allah ngan kaba, masau pengulu jemau Keristen nepiakka tangan di palak kaba ngan nabi-nabi ngiciakka pesan Allah.

¹⁵ Kerjaukala gegalaunyautu ngan ngenianau, mangku kemajuan kaba ka kina'an ngan gegalau jemau.

¹⁶ Jagauila diri kaba ngan jagauila ajaghan kaba. Kaba mesti tekun ngerjauka gegalaunyautu, karnau ngan carau luak itu kaba ka nyelamatka diri kaba ngan gegalau jemau diau ndengaghka kaba.