1 TIMUTIUS 3 - PEJANJIAN EMPAI CERITAU ILUAK

Sarat njadi pengulu jemau Keristen

¹ Nyela nian kici'an ini, “Jemau diau endak njadi pengulu jemau Keristen endak ngerjauka kerjau diau beregau.”

² Karnau itu pengulu jemau Keristen mesti jemau diau nidau bediau salahau. Buntingau cuman sughang. Diau mesti nguasaui diriau, bepengertian, ngelapan, galak nerimau jemau di ghumahau, pacak ngajagh jemau.

³ Jangan diau tukang mabu'an, jangan galak belagau, anyautu diau mesti ngaligh ngan galak bedamai. Jangan jemau diau tetancian.

⁴ Diau mesti terti mimpin ghuma-tanggaunyau ngan iluak ngan ngajagh anak-ana'au ta'at ngan meregaui pejadiau.

⁵ Amun jemau nidau pacak ngurus ghuma-tanggaunyau, luak manau diau pacak ngurus Ghuma Allah?

⁶ Jangan milia jemau diau empai percayau, mangku diau jangan njadi geduak ngan diukum luak iblis.

⁷ Diau mesti pulau diregaui jemau, mangku diau nidau njadi kici'an jemau ngan dikalaka iblis.

Sarat endak nulung kerjau Tuhan

⁸ Jemau diau endak nulung kerjau Tuhan mesti pulau jemau diau iluak ngan jujur. Jangan jemautu tukang minum anggur ngan jemau tetancian.

⁹ Ughangtu mesti maju percayau nian ngan ajaghan Keristus ngan ati diau beresia.

¹⁰ Ughangtu mesti diuji kudai. Amun tenyatau jemautu pacak dipercayaui, mangku diau bulia nulung kerjau Tuhan.

¹¹ Biniau pulau mesti jemau iluak. Jangan diau galak ngupatka jemau. Diau mesti nguasaui diriau ngan pacak dipercayaui ngan gegalaunyau.

¹² Ughangtu mesti jemau diau gi sughang biniau ngan mimpin anak-ana'au ngan ghuma-tanggaunyau ngan iluak.

¹³ Jemau diau nulung kerjau Tuhan ngan iluak ka diregaui, mangku tamba beghani ngiciakka ceritau percayau ngan Keristus ngan jemau.

Resiau agamau kitau

¹⁴ Aku ngaghap nidau lamau agi aku berayak ngan kaba. Empuak luak itu aku pulau nulis surat ini ngan kaba.

¹⁵ Mangku amun aku lambat sampai, kaba la keruan, luak manau kitau anak-anak Allah mesti idup. Kitauni anak Allah diau idup diau njadi tiang penegak, njadi pelapiak ajaghan diau benagh jak di Allah.

¹⁶ Agung nianan resiau agamau kitau, Diau ngancakka diriAu ngan rupau manusiau, dibenaghka Rua Allah, dikinak malaikat-malaikat, dikiciakka ngan bangsau-bangsau diau nidau keruan Allah, dipercayaui di gegalau deniau, diangkat ke sergau bada diau agung.