1 TIMUTIUS 2 - PEJANJIAN EMPAI CERITAU ILUAK

Du'akala gegalau jemau

¹ Diau penting diau endak kukiciakka, supayau jemau Keristen bedu'a, mintak ngan Allah ngan beterimau-kasia, ndu'aka gegalau jemau.

² Du'akala rajau ngan gegalau jemau diau adau kuasau, mangku kitau pacak idup tenang ngan tenteram endak meregaui Allah ngan kerjau diau pantas.

³ Itula diau iluak ngan melemakka ati Allah, Penyelamat kitau.

⁴ Diau endak, supayau gegalau jemau ngeruani diau benagh ngan diselamatka.

⁵ Allah gi sughang. Mangku diau mbuat manusiau seilu'an ngan Allahtu gi sughang pulau, diautu manusiau Yesus Keristus.

⁶ Diau la nyeraka diriAu endak mbibaska gegalau jemau jak di dusau. Luak itu Allah mbuktika masau diau tepat, bansau Diau endak, supayau gegalau jemau diselamatka.

⁷ Batan endak itula aku dipilia njadi rasul endak ngiciakka ceritau iluak ngan jemau ukan Yahudi ngan ngajagh ughangtu percayau ngan ceritau benaghtu. Kataukuni benagh, aku nidau mbu'ung.

Carau jemau tinau diau la njadi Keristen

⁸ Mangku aku endak, supayau amun jemau Keristen betunggal di manau kila, jemau lanang bedu'a ngan ati diau beresia, ngan nidau mara ngan nidau bebala.

⁹ Luak itu pulau jemau tinau mesti ndandani diriau ngan carau biasau diau pantas. Jangan putungan gumbak nyelia, jangan makai periasan emas ngan mutiara, jangan makai baju diau besak regaunyau.

¹⁰ Jemau tinau mesti ndandani diriau ngan perembak diau iluak, diau pantas ngan jemau tinau diau endak ta'at ngan Allah.

¹¹ Jemau tinau mesti belajagh ngan diam ngan penurut.

¹² Aku nidau ngajung jemau tinau ngajagh ngan nidau ngajung diau merintaka lanang. Diau mesti diam.

¹³ Karnau Adam diau dulu sekali dijadika mangku Hawa.

¹⁴ Lagi pulau ukan Adam diau ditipuka ulagh, tapitu Hawa, mangku melanggar perinta Allah.

¹⁵ Anyautu jemau tinau ka selamat, karnau diau melahirka anak, amun diau maju percayau ngan Keristus ngan nyayangi jemau ngan idup batan endak Allah.