1 TIMUTIUS 1 - PEJANJIAN EMPAI CERITAU ILUAK

¹ Jak di aku, Paulus. Aku njadi rasul Yesus Keristus karnau perinta Allah, Penyelamat kitau, ngan Yesus Keristus diau njadi aghapan kitau.

² Batan endak Timutius diau njadi anakku nian karnau percayau ngan Yesus. Aku bedu'a, supayau Allah Bapak ngan Tuhan kitau Yesus Keristus sayang ngan iluak nian ngan kaba ngan ngenjuakka damai.

Ceritau ajaghan diau sesat

³ Masau aku pegi ke Makedunia, la kuajungka ngan kaba, supayau maju mendam di Ipisus, karnau di situ adau jemau diau ngajaghka ajaghan nidau benagh, mangku kaba mesti ngajung ughangtu mandak.

⁴ Tegughi ughangtu, supayau jangan agi galak ndengagh ceritau mbu'ung ngan ceritau niniak puyang senitu. Gegalaunyautu cuman mbuat jemau bebala, ukan majuka rencanau Allah diau cuman pacak dikeruani amun percayau.

⁵ Tujuan petuaku ini, supayau pacak sangi sayangi ngan ati iluak ngan ati keciak beresia ngan percayau nian ngan Tuhan.

⁶ Anyautu adau jemau diau nidau idup luak itu agi, diau sesat ngan kici'an diau nidau begati.

⁷ Ughangtu endak ngajagh ukum Taurat, awuak ughangtu nidau ngerti kici'annyautu diau dikiciakka ngan yakin nian.

⁸ Kitau keruan, bansau ukum Taurat iluak, amun digunauka semestiau.

⁹ Ingatla, bansau ukumtu dibuat ukan batan endak jemau diau benagh, tapitu batan endak pelanggar ukum, penja'at, jemau diau nidau keruan Tuhan, jemau bedusau, jemau diau idup nurut carau deniau, jemau nidau ta'at ngan nidau buagamau, pembunua pejadiau ngan pembunua lainau,

¹⁰ jemau menaugawia, jemau sangi ribangka selanangan, jemau maling jemau, pembu'ung, jemau galak besumpa, ngan sapau kila diau ngerjauka setu diau belawanan ngan ajaghan diau benagh.

¹¹ Ajaghantu adau di ceritau iluak diau la dipercayauka ngan aku endak dikiciakka. Ceritautu asalau jak di Allah diau agung ngan pantas dipuji.

Beterimau-kasia karnau keilu'an Allah

¹² Aku beterimau-kasia ngan Yesus Keristus Tuhan kitau. Diautu nguatka aku bekerjau batan endak Diau, karnau Diau nganggap aku pantas ngerjauka titu.

¹³ Empuak senitu aku madakka, nganiayau ngan nggelakka Diau, aku la disialkaNyau, karnau masau itu aku lum percayau, mangku nidau keruan setu diau kukerjaukatu.

¹⁴ Anyautu aku dienju'i Tuhan keilu'an banyak kematila, mangku aku pacak percayau ngan nyayangi Yesus Keristus, karnau seghundak ngan Diau.

¹⁵ Nyela nian kici'an ini ngan pantas diterimau nian, “Yesus Keristus datang ke deniau endak nyelamatka jemau bedusau.” Mangku jak di ughangtu aku diau paling bedusau ngan ja'at sekali.

¹⁶ Anyautu Allah nyialka aku, mangku Yesus Keristus pacak nyatauka gegalau kengalighanNyau ngan aku, jemau diau paling bedusauni. Mangku aku njadi penauan batan endak jemau diau ka percayau nanti ngan bulia idup selelamaunyau.

¹⁷ Allah itu Rajau gegalau saman diau nidau beghuba selelamaunyau ngan nidau kina'an. Diau sughang itula Allah ngan pantas diregaui ngan dipuji selelamaunyau. Nyela nian. Amin!

Tugas Timutius

¹⁸ Timutius, anakku! Tugas ini kupercayauka ngan kaba, karnau katau Allah diau dikiciakka nabi senitu ceritau kaba. Kici'an itu mesti njadi pembimbing kaba mangku pacak bejuang iluak-iluak.

¹⁹ Bejuangla ngan percayau ngan Keristus ngan ati diau beresia. Adau jemau diau nidau nyanauka suarau ati keci'au, mangku iman ughangtu kacau.

²⁰ Di antaraunyau Himenius ngan Aliksandar. Ughang duautu la kuseraka ngan iblis, supayau belajagh mandak nggelakka Allah.