1 TESALUNIKA 5 - PEJANJIAN EMPAI CERITAU ILUAK

Sepepadaula nunggu Tuhan datang

¹ Nidau nanti kami tuliska ngan kamu, kebilau masaunyau titu ka tejadi.

² Karnau kamuni la keruan, bansau aghi Tuhan datang, nidau disangkau, luak jemau pemaling datang aghi malam.

³ Amun jemau bekiciak, “Gegalaunyau aman ngan tenang,” mangku masau itula ughangtu benasau. Luak jemau tinau diau kesakitan endak merunggu, ughangtu nidau pacak ngilakkanyau.

⁴ Anyautu kamuni ukan jemau diau idup di keleman, mangku aghitu nidau nggagauka kamu luak pemaling.

⁵ Karnau gegalau kamu idup di terang, kamu temasuak anak terang. Kitau ukan jemau diau idup dalam keleman ngan nidau temasuak anak keleman.

⁶ Itula sebapau kitau nidau bulia tiduak-tiduak ajau luak jemau lain. Kitau mesti sepepadau ngan maju siagau.

⁷ Aghi malam jemau tiduak, aghi malam pulau jemau mabuak.

⁸ Anyautu kitau ini anak terang. Karnau itu rupu'an kitau mesti terang. Kitau mesti maju percayau ngan Tuhan ngan nyayangi jemau, lagi ngaghapka Allah nyelamatka kitau. Itula pakaian diau njagaui kitau.

⁹ Karnau Allah milia kitau ukan batan endak ditimpau mara, tapitu batan endak diselamatka karnau Tuhan kitau Yesus Keristus.

¹⁰ Diautu mati batan endak kitau, supayau masau Diau datang nanti, enta kitau gi idup enta la mati, kitau pacak idup guak Diau.

¹¹ Itula sebapau kamu mesti sangi tulungi ngan teguaka ati kamu, luak diau la kamu kerjauka.

Petua

¹² Kami ngajung kamu nian, kantin-kantinku, supayau kamu meregaui jemau diau bekerjau guak kamu, jemau diau la dipilia Tuhan njadi pengulu kamu ngan ngajaghi kamu.

¹³ Kami ngajung, supayau kamu meregaui ngan nyayangi ughangtu nian karnau kerjau ughangtu. Idupla ngan damai sughang ngan diau lain.

¹⁴ Kami ngajung kamu pulau, supayau kamu negughi jemau diau enggup bekerjau. Teguaka ati jemau diau asau-asau. Tulungla jemau diau litak. Ngalighla ngan gegalau jemau.

¹⁵ Jangan enangka jemau mbalas keja'atan ngan ja'at. Anyautu beusahala maju bebuat iluak sughang ngan diau lain ngan gegalau jemau.

¹⁶ Maju injiakla kamu,

¹⁷ ngan maju bedu'a.

¹⁸ Luak manau kia setu diau tejadi di kamu, kamu mesti beterimau-kasia ngan Allah, karnau itula diau Allah kenda'i ngan kamu, jemau diau percayau ngan Yesus Keristus.

¹⁹ Jangan ngalangi Rua Allah.

²⁰ Jangan nganggap enteng ceritau diau dienjuakka Rua Allah.

²¹ Keruanila gegalaunyau, diau iluak mesti diikuti.

²² Jawuhi gegalau mecam keja'atan.

Pesan ngan du'a

²³ Aku bedu'a, supayau Allah ngenjuakka kamu damai ngan njadika kamu jemau diau idup nian batan endak Allah. Aku bedu'a, supayau Allah njagaui gegalau idup kamu, rua ngan jiwa kamu, mangku amun Tuhan kitau Yesus Keristus datang agi, kamu nidau bediau cacatau.

²⁴ Allah itu setia, Diau milia kamu, mangku Diau pulau ka ngerjaukanyau.

²⁵ Mangku du'aka pulau kami.

²⁶ Sambutla ngan riang gegalau kantin kitau diau la percayau.

²⁷ Ngan kuasau Tuhan aku ngajung kamu nian, supayau surat ini dibacauka ngan gegalau kantin kitau diau percayau.

²⁸ Aku bedu'a, supayau Tuhan kitau Yesus Keristus iluak nian ngan kamu.