1 TESALUNIKA 4 - PEJANJIAN EMPAI CERITAU ILUAK

Idup diau melemakka ati Allah

¹ Mangku mbak kini, kantin-kantinku, kami ngajung kamu idup melemakka ati Allah, semegi ngan diau la kami kiciakka ngan kamu senitu. Nyela, kamu la ngerjaukanyau. Anyautu mbak kini ngan kuasau Tuhan Yesus kami ngajung kamu tamba beusaha agi melemakka ati Allah.

² Nyela, kamu keruan ajaghan diau kami ajaghka ngan kamu ngan kuasau Tuhan Yesus.

³ Inila kendak Allah, supayau kamu idup beresia. Jangan kamu menaugawia.

⁴ Bilang lanang jak di kamu mesti keruan, luak manau bulia bunting ngan carau diau beresia, mangku idup ngan buntingautu ngan carau diau melemakka ati Allah ngan manusiau.

⁵ Jangan ngikut serilau ajau, luak diau dikerjauka jemau diau nidau keruan Allah.

⁶ Jangan sughang kia mbuat ja'at ngan jemau ngan nipukanyau. Senitu la kami kiciakka nian ngan kamu, bansau Tuhan ka ngukum jemau diau ngerjauka titu.

⁷ Allah milia kitau, ukan supayau kitau idup ja'at, tapitu supayau kitau idup beresia.

⁸ Karnau itu, jemau diau enggup nerimau ajaghan ini, ukanau enggup nerimau manusiau, tapitu enggup nerimau Allah diau ngenjuakka RuaHau diau beresia ngan kamu.

⁹ Nidau nanti kami nulis agi ngan kamu ceritau nyayangi kantin seagamau. Kamuni la diajaghi Allah sangi sayangi.

¹⁰ Nyela, kamu la ngerjaukanyau ngan gegalau jemau diau percayau di Makedunia. Anyautu kami ngajung kamu, supayau tamba ngerjaukanyau nian.

¹¹ Beusahala idup diau tenang. Jangan ncampuri urusan jemau. Bekerjaula batan pengidupan kamu itula, luak diau la kami ajungka ngan kamu senitu.

¹² Amun kamu ngerjauka titu, kamu nidau tegantung ngan jemau, mangku kamu diregaui jemau diau nidau percayau pulau.

Tuhan datang

¹³ Mangku, kantin-kantinku, kami endak, supayau kamu ngeruani diau sebenaghau ceritau jemau diau la mati, mangku kamu nidau bingung luak jemau diau nidau bediau aghapan.

¹⁴ Kitau percayau, bansau Yesus la mati, la idup agi, mangku kitau percayau pulau, bansau jemau percayau diau la mati ka diidupka ngan ditunggalka Allah di guak Yesus.

¹⁵ Inila ajaghan Tuhan diau endak kami sampaika ngan kamu: Masau Tuhan Yesus datang, kitau diau gi idup nidau ka ndului jemau diau la dulu mati.

¹⁶ Allah ka merintaka, mangku ka kedengaghan suarau pengulu malaikat ngan muni terumpit Allah, mangku Tuhan ka tughun jak di sergau ngan jemau diau la mati dalam Keristus ka dulu diidupka.

¹⁷ La udim itu kitau diau gi idup masau itu ka dinayiakka ke aban serempak ngan ughangtu endak betemu ngan Tuhan di awang-awang. Mangku kitau ka maju guak Tuhan selelamaunyau.

¹⁸ Karnau itu sangi teguakala ati kamu ngan kici'an ini.