1 TESALUNIKA 3 - PEJANJIAN EMPAI CERITAU ILUAK

¹ Mangku kami nidau pacak na'an ghindu kami agi. Karnau itu kami berupuak, iluakla kami ninggal sughang di Atina,

² mangku kami ngajung Timutius, ading kitau. Diautu bekerjau ngan kami batan endak Tuhan ngiciakka ceritau Keristus. Kami ngajung Timutius, supayau diau neguaka ati kamu ngan ngajung kamu tamba percayau nian ngan Keristus,

³ supayau nidau sughang kia jak di kamu ngelipat karnau sengsarau kitau ini. Kamu la keruan, bansau sengsarautu adau dalam rencanau Allah batan endak kitau.

⁴ Masau kami gi adau guak kamu, kami la ngiciakka, bansau kitau ka sengsarau. Nyela, titu la tejadi, luak kamuni keruan.

⁵ Itula sebapau aku ngajung Timutius, karnau aku nidau ta'an agi, mangku aku keruan nian, apu kamu percayau. Aku ghegak, kalu kamu la dicubaui iblis ngan dikalaka, mangku kerjau kami nidau bediau gatiau.

⁶ Mbak kini Timutius la baliak jak di kamu ngan ngiciakka ngan kami ceritau diau meriangka, bansau kamu maju percayau ngan sangi sayangi. Diau ngiciakka, bansau kamu maju mbuat ingatan diau iluak ngingatka ceritau kami guak kamu, ngan bansau kamu ghindu endak betemu ngan kami, semegi luak kami ghindu endak betemu ngan kamu.

⁷ Mangku dalam kemada'an ngan kesengsarauantu kami diriangka ndengagh ceritau kamu diau percayau nian.

⁸ Mbak kini kami meghasau idup nian, karnau kamu maju seghundak ngan Tuhan.

⁹ Kami beterimau-kasia nian ngan Tuhan Allah, karnau kami riang tegalau karnau kamu.

¹⁰ Siang-malam kami bedu'a nian, supayau kami pacak betemu ngan kamu endak namba diau gi kurang percayau.

¹¹ Kami bedu'a, supayau Allah Bapak kitau ngan Tuhan kitau Yesus ngenjuakka jalan ngan kami mangku betemu ngan kamu.

¹² Kami bedu'a, supayau Tuhan mbuat kamuni tamba sangi sayangi ngan nyayangi gegalau jemau, mangku kamu nyayangi nian, semegi luak kami nyayangi kamu.

¹³ Ngan carau luak itula Tuhan neguaka ati kamu, mangku kamu beresia, nidau becelakau di adapan Allah Bapak kitau, masau Yesus Tuhan kitau datang ngan gegalau jemau percayau.