1 TESALUNIKA 2 - PEJANJIAN EMPAI CERITAU ILUAK

Kerjau Paulus di Tesalunika

¹ Kantin-kantinku, kamuni pulau la keruan, bansau banyak asilau, masau kami datang guak kamu.

² Kamu keruan, antak ka kami datang, kami la dibuati ngan digelakka jemau di Pilipi. Anyautu empuak banyak jemau melawan kami, Allah mbeghanika kami endak ngiciakka ngan kamu ceritau iluak diau asalau jak di Allah.

³ Aja'an kamini ukan karnau kami sesat, ukan pulau karnau tujuan diau nidau iluak, ukan pulau endak nipuka.

⁴ Kami ngiciak ukan endak melemakka ati manusiau, tapitu endak melemakka ati Allah, karnau Allah nganggap kami pantas ngiciakka ceritau iluak itu. Diautu nguji ati kami.

⁵ Kamu keruan, kami nidau kekela iluak di mulut, nipuka kamu endak nyemunika kesela'an kami. Allah keruan!

⁶ Kami nidau kekela mintak dipuji manusiau, empuak jak di kamu, empuak jak di jemau lain. Sebenaghau kami behak mintak setu jak di kamu, karnau kamini rasul Keristus.

⁷ Anyautu ati kami iluak, masau kami guak kamu, luak enduak ngasua ana'au.

⁸ Karnau kami sayang, mangku kami galak ngenjuakka ngan kamu ukan ajau ceritau iluak jak di Allah, tapitu idup kami pulau, karnau kami nyayangi kamu nian.

⁹ Cengki kamu gi teghingat, luak manau kami bekerjau mati-matian. Siang-malam kami bekerjau, supayau kami nidau ngeriaka sughang kia jak di kamu, masau kami ngiciakka ceritau iluak jak di Allah itu ngan kamu.

¹⁰ Idup kami beresia, benagh ngan nidau bediau cacatau tuadap kamu diau la percayau ngan Keristus. Kamuni ngeruani kami ngan Allah pulau ngeruani kami.

¹¹ Kamu keruan, bansau kami nulung bilang kamu luak bapak nulungi ana'au.

¹² Kami ngajagh kamu, neguaka ati kamu ngan ngajung kamu, supayau kamu idup melemakka ati Allah. Karnau Allah ngajak kamu njadi angguta umat Allah ngan ngikut meghasauka keagunganNyau.

¹³ Adau semecam agi diau mbuat kami beterimau-kasia ngan Allah. Masau kami ngiciakka ngan kamu ceritau jak di Allah, kamu ndengagh ngan nerimau ceritautu, ukan luak kici'an manusiau, tapitu luak ceritau jak di Allah. La nyela nian katau Allah. Diautu dang bekerjau dalam ati kamu diau percayau.

¹⁴ Kantin-kantinku, setu diau kamu ghasauka la dighasauka jemau Keristen di Yudia diau la njadi hak Yesus Keristus. Kamu dianiayau bangsau kamutula. Titu semegi ngan diau dighasauka jemau Keristen di Yudiatu jak di jemau Yahudi.

¹⁵ Jemau Yahudi la mbunua Tuhan Yesus ngan nabi-nabi, lagi nganiayau kami. Ughangtu maju melawan Allah ngan njadi musua gegalau jemau.

¹⁶ Lagi ughangtu endak ngalang-ngalangi kami ngiciakka ngan jemau ukan Yahudi ceritau diau pacak nyelamatka ughangtu. Ngan carau luak itu jemau Yahuditu maju namba dusaunyau enggut genap mecamau. Mangku mbak kini ughangtu ditimpau mara Allah.

Paulus endak berayak ngan jemau Tesalunika

¹⁷ Mbak kini, kantin-kantinku, jak kami beceghai jerang ngan kamu, beceghai di matau di ati nidau, kami nidau mandak ghindu ngan kamu, mangku kami beusaha nian endak betemu ngan kamu.

¹⁸ Kami la merencanauka endak berayak ngan kamu. Aku, Paulus, la rajin ncubau, anyautu Iblis ngalangi kami.

¹⁹ Kamuni ngenian njadi aghapan kami ngan meriangka kami, karnau amun nanti Tuhan Yesus datang ngan kitau ngadapiNyau, kamuni pulau njadi kebanggaan kami.

²⁰ Nyela, kamunila njadi kebanggaan kami ngan meriangka kami.