1 TESALUNIKA 1 - PEJANJIAN EMPAI CERITAU ILUAK

¹ Jak di Paulus, Siluanus ngan Timutius batan endak jemau Keristen di Tesalunika diau njadi umat Allah Bapak ngan Tuhan Yesus Keristus. Aku bedu'a, supayau Tuhan iluak ngan kamu ngan ngenjuakka damai.

Carau jemau Tesalunika percayau

² Kami maju beterimau-kasia ngan Allah karnau gegalau kamu. Kami maju du'aka kamu.

³ Kami maju teghingat ngan kamu di adapan Allah Bapak kitau, bansau dalam kerjau kamu kina'an kamu percayau nian, kamu iluak ngan jemau ngan galak bekerjau nulung jemau. Kami teghingat pulau, bansau kamu tekun ngaghapka Tuhan kitau Yesus Keristus.

⁴ Kami keruan, ui kantin-kantinku, Allah sayang ngan kamu ngan milia kamu njadi umatAu.

⁵ Kami ngiciakka ceritau iluak itu ngan kamu ukan ngan katau ajau, tapitu pulau ngan kuasau Rua Allah. Kami percayau nian ceritau iluak itu benagh. Kamu keruan, luak manau kami idup guak kamu batan endak nulung kamu.

⁶ Kamu la menau idup kami ngan idup Tuhan. Empuak kamu sengsarau nian, kamu nerimau ceritau iluak diau kami kiciakkatu ngan riang. Riang itu jak di Rua Allah.

⁷ Ngan carau itu kamu njadi penauan batan endak gegalau jemau Keristen di Makedunia ngan Akaya.

⁸ Jak di kamu ceritau Tuhan la tesiar sampai ke gegalau Makedunia ngan Akaya. Ukan itu ajau, tapitu ceritau kamu percayau ngan Allah la keruan di memanau, mangku kami nidau nanti ngiciakka tuapau-apau agi.

⁹ Gegalau ughangtu ngiciakka ceritau kamu nerimau kami senitu, masau kami datang guak kamu. Ughangtu ngiciakka ceritau kamu ninggalka diwau mangku njenguak Allah diau idup ngan benagh endak nuruti ngan nyemba Diau.

¹⁰ Ughangtu ngiciakka pulau ceritau kamu ngaghapka Anak Allah datang jak di sergau, diautu Yesus diau la diidupka Allah jak di mati. Yesus itula diau nyelamatka kitau jak di mara Allah diau ka datangtu.