1 PITRUS 4 - PEJANJIAN EMPAI CERITAU ILUAK

Idup batan endak Allah

¹ Keristus sengsarau di kayu salip. Karnau itu kamu pulau mesti berupuak luak Diau, karnau jemau diau sengsarau di deniauni nidau endak agi ngerjauka dusau.

² Mangku mulai mbak kini selamau gi adau di deniau idupla nurut kendak Allah, jangan agi nurut serilau manusiau.

³ Senitu kamu pulau maju ngerjauka setu diau dikerjauka jemau diau nidau keruan Allah. Kamu nuruti serilau diau nidau senangaian, memabu'an, bereruyalan, nyemba diwau ngan carau diau meghegingka.

⁴ Mbak kini jemau diau nidau keruan Allah kemangan ngan kamu, karnau kamu nidau agi ngikut carau ughangtu idup luak anjing, mangku kamu digelakka.

⁵ Ughangtu nanti mesti nanggung-jawabka kerjau ughangtu ngan Allah diau la nunggu endak ngadili jemau diau idup ngan diau mati.

⁶ Itula sebapau ceritau iluaktu la dikiciakka pulau ngan jemau mati, mangku jemau diau la meghasauka mati, luak gegalau manusiau ka mati, bulia idup dalam rua semegi ngan Allah.

Carau idup jemau Keristen

⁷ Gegalaunyau laka bekesudiman. Karnau itu kamu mesti nguasaui diri kamu ngan sepepadau, supayau kamu pacak bedu'a.

⁸ Diau penting sekali, kamu mesti sangi sayangi nian, karnau amun kamu sangi sayangi, kamu sukau pulau sangi ma'apka.

⁹ Sangi terimaula kamu di ghuma sesughangan ngan nidau bemumut.

¹⁰ Bilang kamu la bulia pengenjuak diau bebida jak di Allah, mangku jadila pengurus pengenjuak Allahtu diau iluak ngan makaiau endak nulungi jemau.

¹¹ Jemau diau beketuba mesti ngiciakka katau Allah. Jemau diau nulungi jemau mesti ngerjaukanyau ngan kekuatan jak di Allah, mangku Allah maju diregaui karnau Yesus Keristus. KuasauNyau ngan keagunganNyau nidau ka udim-udim selelamaunyau. Nyela nian.

Penanggungan karnau percayau ngan Keristus

¹² Kantin-kantinku diau kusayangi. Mbak kini kamu banyak penanggungan ikak diuji. Nidau nanti kemangan, karnau setu diau tejadi di kamu nidau sebeghapau.

¹³ Anyautu kamu mesti riang, karnau kamu ngikut sengsarau ngan Keristus. Mangku kamu pulau ngikut riang nian, amun keagunganNyau diancakka nanti.

¹⁴ Mujurla kamu, amun digelakka mbak kini karnau percayau ngan Keristus. Titu ngancakka, bansau Rua diau bekuasau, diautu Rua Allah, adau di kamu.

¹⁵ Jangan sughang kia jak di kamu nanggung karnau mbunua, maling, ja'at ngan ncampuri urusan jemau.

¹⁶ Anyautu amun kamu sengsarau karnau Keristus, nidau nanti maluan. Pujila Allah, karnau kamu dikiciakka jemau Keristen.

¹⁷ La sampai masaunyau Allah ngadili deniau. Umat Allah itula diau dulu sekali diadili. Amun kitau dulu diadili, luak manau jadiau nanti ngan jemau diau nidau percayau ngan ceritau iluak jak di Allah itu?

¹⁸ Di Injil ditulis luak ini, “Amun jemau diau benagh segau diselamatka, tuapau pulau diau ka tejadi ngan jemau bedusau diau nidau keruan Allah!”

¹⁹ Itula sebapau amun adau jemau diau sengsarau karnau Allah ngenda'i luak itu, jemau itu mesti maju ngerjauka diau iluak, mangku nyeraka diriau ngan Allah diau njadikanyau. Diau cetau nepati janjiAu.