1 PITRUS 2 - PEJANJIAN EMPAI CERITAU ILUAK

¹ Karnau itu capakkala jak di kamu gegalaunyau diau ja'at. Jangan agi mbu'ung, jangan cak iluak, jangan sengit, jangan ngupatka jemau.

² Luak kupiak diau empai adau maju endak minum, kamu pulau mesti maju aus ngan katau Tuhan diau asli. Ngan carau luak itu kamu ka tumbua ngan diselamatka.

³ Luak ditulis di Injil, “Kamu la meghasauka Tuhan itu iluak nian.”

Yesus Keristus umpamau batu pelapiak

⁴ Datangla njenguak Tuhan. Diau umpamau batu idup diau dicapakka manusiau, karnau dianggap nidau begati. Anyautu Diautu dipilia Allah, mangku nyatau Diau batu diau beregau.

⁵ Kamu umpamau batu-batu diau idup. Karnau itu enangka kamu dipakai batan endak negakka ghuma Allah diau ruhani. Ngan carau luak itu kamu njadi imam-imam diau idup beresia batan endak Allah, mangku ngerbanka ngan Allah kerban diau ruhani diau melemakka ati Allah karnau Keristus.

⁶ Karnau di Injil ditulis, “Aku la milia sebua batu diau beregau diau Kutepiakka di Siun njadi batu pelapiak. Mangku jemau diau percayau ngan Diau nidau ka dimaluka.”

⁷ Batu itu beregau nian batan endak kamu diau percayau. Anyautu batan endak jemau diau nidau percayau katau Injil ini benagh, “Batu diau la dicapakka tukang negakka ghuma, la njadi batu pelapiak.”

⁸ Ngan pulau, “Itula batu diau mbuat jemau tuantuak, batu diau mbuat jemau telabua.” Ughangtu tuantuak, karnau nidau ta'at ngan kici'an Allah. Luak itula ditetapka Allah batan endak ughangtu.

⁹ Anyautu kamunila bangsau diau dipilia, imam-imam diau kerjau batan endak rajau, bangsau diau idup beresia batan endak Allah, umat Allah itula. Allah milia kamu ngan mantau kamu ngeluagh jak di keleman endak masuak terangAu diau besinagh-sinagh, supayau kamu ngiciakka kerjauNyau diau nyeliatu.

¹⁰ Senitu kamu ukan umat Allah, mbak kini kamu la njadi umat Allah. Senitu kamu nidau disialka Allah, mbak kini kamu la disayangiNyau.

Idup luak budak Allah

¹¹ Kantin-kantinku diau kusayangi. Kamu jemau pendatang ngan perantau di deniau ini. Karnau itu aku mintak nian, supayau kamu jangan nuruti serilau manusiau diau maju beperang melawan rua.

¹² Carau idup kamu di guak jemau diau nidau keruan Allah mesti iluak nian. Mangku amun ughangtu ngiciakka kamu jemau ja'at, ughangtu maju nginak perembak kamu diau iluaktu, mangku ughangtu ka muji Allah masau Tuhan datang.

¹³ Demi Tuhan tunduakla ngan gegalau penguasau manusiau, empuak ngan rajau diau besak sekali kuasaunyau,

¹⁴ empuak ngan gubernur ngan jemau diau ditetapka rajautu endak ngukum jemau ja'at ngan meregaui jemau diau beperembak iluak.

¹⁵ Karnau Allah endak, supayau ngan perembak kamu diau iluak kamu nukup mulut jemau diau ngiciak jedit tadi.

¹⁶ Idupla luak jemau bibas. Jangan makai kebibasan kamutu batan endak nukupi keja'atan. Anyautu idupla luak budak Allah.

¹⁷ Regauila gegalau jemau, sayangila kantin-kantin kamu diau percayau, takutla ngan Allah, regauila rajau!

Sengsarau Keristus njadi penauan

¹⁸ Kamu diau njadi budak, tunduakla ngan tuan kamu ngan meregaui diau nian, ukan ajau diau iluak ngan mura bekantin, tapitu pulau diau kejam.

¹⁹ Amun kamu nanggung ngan ngaligh dibuati nidau adil karnau ngerti kendak Tuhan, Allah ka iluak ngan kamu.

²⁰ Apu kamu dipuji, amun kamu nanggungka ukuman diau semestiau kamu tanggung karnau besala? Anyautu amun kamu nanggung karnau kerjau diau iluak, mangku Allah ka iluak ngan kamu.

²¹ Batan endak itula kamu la dipilia Allah, karnau Keristus la sengsarau batan endak kamu mangku njadi penauan batan endak kamu, supayau kamu ngikut carauNyau.

²² Diau nidau kekela mbuat dusau ngan nidau sughang kia ndengagh Diau mbu'ung.

²³ Masau Diau digelakka ngan ditulak, Diau nidau mbalas. Masau Diau nanggung, Diau nidau ndendam, tapitu Diau nyeraka pekarauNyau ngan Allah, akim diau adil.

²⁴ Keristus itula diau nanggungka dusau kitau di kayu salip, supayau kitau bibas jak di kuasau dusau mangku idup nurut kendak Allah. Kamu la ghadu karnau lukau Keristustu.

²⁵ Senitu kamu luak bebiri diau sesat. Mbak kini kamu la ngulang ngikut tukang sayia diau njagaui jiwa kamu.