1 PITRUS 1 - PEJANJIAN EMPAI CERITAU ILUAK

Pesan

¹ Jak di aku, Pitrus, rasul Yesus Keristus, batan endak jemau diau dipilia dijadika umat Allah diau tesebar di rantauan di daira Puntus, Galatia, Kapadukia, Asia ngan Bitinia.

² Kamu dipilia luak diau la direncanauka Allah Bapak. Kamu la diberesiaka Rua Allah, supayau kamu idup ta'at ngan Yesus Keristus ngan dibasua ngan daghaHau. Aku bedu'a, supayau Allah iluak nianan ngan kamu, maju ngenjuakka damai.

Aghapan diau tetap

³ Mela kitau beterimau-kasia ngan Allah, Bapak Tuhan kitau Yesus Keristus! Diau nyayangi kitau nian. Karnau itu Diau ngenjuakka ngan kitau idup diau empai ngan carau ngidupka Yesus Keristus jak di mati, mangku kitau adau aghapan diau tetap.

⁴ Mangku kitau ngaghapka bulia bagian diau disediauka Allah batan endak umatAu. Bagiantu diimpani di sergau, mangku nidau pacak ghemas, busuak ngan luntur.

⁵ Gegalaunyautu batan endak kamu, karnau kamu percayau ngan Allah, mangku kamu dijagaui kuasau Allah, supayau kamu nerimau keselamatan diau dinyatauka masau pengabisan saman.

⁶ Itula sebapau kamu mesti riang, empuak mbak kini kamu madak karnau banyak cubauan.

⁷ Tujuan gegalaunyautu endak nguji iman kamu. Emas diau pacak ghemas diuji pulau ngan api. Beregaula iman kamu sangkan emas, mangku imantu mesti diuji pulau, supayau njadi tegua. Mangku kamu ka dipuji, diregaui ngan diagungka, amun Yesus Keristus datang agi.

⁸ Empuak kamu nidau kekela ngina'Au, kamu nyayangiNyau. Empuak mbak kini pulau kamu nidau ngina'Au, kamu percayau ngan Diau. Mangku kamu riang ngan injiak nianan, nidau pacak dikiciakka agi.

⁹ Kamu riang, karnau tujuan iman kamu la tecapai, titu keselamatan jiwa kamu.

¹⁰ Keselamatan itula diau endak dikeruani nabi-nabi neghagi nianan. Ughangtu la ngiciakka keilu'an diau dienjuakka Allah ngan kamu.

¹¹ Ughangtu endak ngeruani, kebilau ngan luak manau titu ka tejadi diau dikiciakka Rua Keristus diau adau dalam ughangtu. Rua itu la ngiciakka sebelumau gegalau penanggungan diau mesti dighasauka Keristus ngan keagunganNyau diau ka dienjuakka ngan Diau udim itu.

¹² Ngan nabi-nabi itu la dikiciakka, bansau setu diau ughangtu kerjauka ukan batan endak kepentingan ughangtula, tapitu batan endak kamu. Setu diau kamu dengagh mbak kini jak di jemau diau ngiciakka ceritau iluak nceritauka Yesus Keristus. Ughangtu ngiciakka itu ngan kamu ngan kuasau Rua Allah diau dienjuakka jak di sergau. Malaikat-malaikat pulau endak ngeruani ceritau diau dikiciakka ughangtu.

Kitau ditetapka endak idup beresia

¹³ Karnau itu kamu mesti rupuakka kudai setu diau endak dikerjauka. Sepepadaula ngan aghapkala nian setu diau ka dienjuakka ngan kamu, masau Yesus Keristus datang nanti.

¹⁴ Kamu la ta'at ngan Allah, mangku jangan nuruti serilau kamu senitu, luak masau kamu lum keruan Allah.

¹⁵ Anyautu gegalaunyau diau kamu kerjauka mesti suci, luak Allah diau milia kamutu suci.

¹⁶ Karnau di Injil ditulis, “Kamu mesti suci, karnau Aku suci.”

¹⁷ Amun kamu bedu'a, kamu ngiciakka Allah itu Bapak. Allah ngukum gegalau jemau nurut peremba'au sesughangan, nidau milia rupau. Mangku kamu mesti meregaui Diau, selamau kamu gi adau di deniau ini.

¹⁸ Kamu keruan, bansau kamu la ditebus jak di idup diau nidau begunau diau kamu bulia jak di niniak puyang kamu. Bayighan batan endak kamu ukan emas ngan pirak diau pacak lengit regaunyau,

¹⁹ tapitu dagha Keristus itula diau besak nian regaunyau. Diautu njadi luak anak bebiri diau nidau bediau cacat ngan nidau bediau salahau diau dikerbanka ngan Allah.

²⁰ Keristustu la dipilia antak ka deniau dijadika. Mangku masau pengabisan ini Diau datang ke deniau batan endak kamu.

²¹ Karnau Diau kamu percayau ngan Allah diau la ngidupkaNyau jak di mati ngan ngagungkaNyau, mangku kamu percayau ngan ngaghapka Allah itula.

²² Karnau kamu la ta'at ngan Allah, kamu la mbasua diri kamu, mangku pacak nyayangi jemau percayau ngenian. Karnau itu kamu mesti sangi sayangi nian.

²³ Karnau katau Allah diau idup selelamaunyau kamu la dijadika manusiau empai diau adau ukan karnau manusiau diau ka mati, tapitu karnau Bapak diau selelamaunyau.

²⁴ Karnau di Injil ditulis luak ini, “Gegalau manusiau luak ghumput. Gegalau keagungannyau luak bungau ghumput. Ghumputtu layu, bungaunyau runtua;

²⁵ anyautu katau Allah tetap selelamaunyau.” Katau itu ceritau iluak diau la dikiciakka ngan kamu.