1 KURINTUS 6 - PEJANJIAN EMPAI CERITAU ILUAK

Jangan endak diadili ngan jemau diau nidau percayau

¹ Amun adau pekarau di guak kamu, ngapau pulau adau diau beghani pegi ke akim diau nidau percayau ngan Tuhan endak ngaduka kantinau diau percayau? Ngapau diau nidau mintak jemau percayau ngadili pekarau itu?

² Apu kamu endiak keruan, bansau jemau percayau ka ngadili deniau ini? Mangku amun kamu ngadili deniau ini nian, apu kamu nidau pacak ndamaika pekarau diau nidau bediau retiau?

³ Apu kamu nidau keruan, bansau kitau ka ngadili malaikat? Apau lagi pekarau idup idang aghi.

⁴ Amun adau pekarau luak itu, apu kamu nyerakanyau ngan jemau diau nidau terti tuapau-apau carau jemau Keristen? Apu kamu nidau maluan?

⁵ Maluka nian! Apu nidau bediau sughang jak di kamu diau bepengertian diau pacak ndamaika pekarau jemau percayau?

⁶ Anyautu adau di kamutu diau pegi ke jemau diau ukan Keristen endak ngaduka pekaraunyau ngan kantinau jemau Keristen.

⁷ Adau pekarau di guak kamu, itu nyatauka kamu la kala. Iluakla kamu dibuati nidau adil ngan dirugika.

⁸ Anyautu kamutu mbuati jemau nidau adil, kamutu merugika jemau. Lagi titu dibuati jak di kamu ngan kantin kamu jemau Keristen.

⁹ Cengki kamu keruan, jemau diau nidau nuruti kendak Allah nidau ka bulia hak njadi umat Allah. Jangan kamu tetipu. Jemau diau ngerjauka kerjau ja'at, nyemba patung, menaugawia, sangi ribangka selanangan, sangi ribangka setinauan,

¹⁰ jemau pemaling, pengeghit ngan selak, tukang mabuak, galak ngarutka jemau ngan penipu, gegalau jemau luak itu nidau bulia hak njadi umat Allah.

¹¹ Adau jak di kamu ngerjauka titu senitu. Anyautu mbak kini dusau kamu la dibasua. Kamu la njadi hak Allah nian. Kamu la dibenaghka ngan kuasau Tuhan Yesus Keristus ngan Rua Allah.

Gunaukala badan kamu batan endak Allah

¹² Katau jemau, “Gegalaunyau bulia dikerjauka.” Nyela, anyautu nidau begunau galau. Empuak aku bulia ngerjauka tuapau kila, aku enggup ngenangka diriku dikuasaui tuapau kila.

¹³ Makanan batan endak busung, busung bada makanan. Empuak busung empuak makanan, gegalaunyau ka diabiska Allah. Anyautu badan ukan batan endak ngerjauka kerjau ja'at, tapitu batan endak ngerjauka kerjau Tuhan mangku Tuhan ka nyayiau.

¹⁴ Allah la ngidupka Tuhan Yesus jak di mati. Luak itu pulau kitau ka diidupka ngan kuasau Allah.

¹⁵ Kamu la keruan, badan kamu angguta Keristus. Apu ka kitau ambiak angguta Keristus endak diseraka ngan tinau ja'at? Nidau ka adau!

¹⁶ Apu kamu endiak keruan, bansau jemau diau nyeghundak ngan tinau ja'at njadi seghundak ngan diau? Dalam Injil la ditulis, “Ughang duautu njadi seghundak.”

¹⁷ Anyautu amun jemau nyeghundakka diriau ngan Tuhan, ruahautu ngan Rua Tuhan njadi sutiak.

¹⁸ Jawuhila kerjau diau ja'attu! Gegalau dusau lain diau dikerjauka jemau di luagh badan. Anyautu jemau diau ngerjauka kerjau ja'at ndusaui badanau sendighi.

¹⁹ Cengki kamu la keruan, bansau badan kamu umpamau ghuma Allah, bada Rua Allah diau dienjuakka Allah ngan kamu, mangku kamutu ukan hak kamu. Kamutu hak Allah.

²⁰ Kamu la dibeli, regaunyau la dibayighi galau. Karnau itu regauila Allah ngan badan kamu.