1 KURINTUS 5 - PEJANJIAN EMPAI CERITAU ILUAK

Dusau di guak jemau Keristen

¹ Jemau la ngiciakka, bansau adau jak di guak kamu diau menaugawia. Jemau diau nidau keruan Allah ajau nidau ngerjauka kerjau ja'at luak itu. Adau jemau lanang diau seghundak ngan enduak tighiau.

² Empuak luak itu, kamu masia langguak. Semestiau kamu bingung ngan maluan, mangku melinsi jemau diau ngerjauka titu jak di guak kamu.

³ Empuak badanku endiak guak kamu, atiku maju merupuakka kamu, mangku aku la mutuska pekarau jemau diau ngerjauka titu, luak aku adau guak kamu.

⁴ Amun kamu betunggal dalam namau Tuhan Yesus, anggapla aku adau guak kamu dalam rua, mangku ngan kuasau Yesus, Tuhan kitau,

⁵ jemau itu mesti diseraka ngan Sitan, mangku badanau benasau ngan ruahau selamat, masau Tuhan datang nanti.

⁶ Nidau pantas kamu langguak. Asauku kamu la keruan, bansau ghagi dikit ngembangka gegalau lejuan.

⁷ Capakkala kudai ghagi lamau itu, diautu ghagi dusau, mangku kamu njadi luak lejuan ghebuak empai, banci jak di ghagi dusau diau lamau. Karnau aghi rerayau Paska kitau la pasigh. Keristus diau njadi bebiri Paska kitau la dikerbanka.

⁸ Mangku jangan kitau merayauka jamuan itu ngan ghagi diau lamau, diautu ghagi keja'atan ngan kejeditan. Mela kitau merayaukanyau ngan ruti diau nidau beghagi. Rutitu mbayangka gegalaunyau diau iluak ngan benagh di adapan Allah.

⁹ Di suratku empaini la kukiciakka ngan kamu, supayau kamu jangan bekantin ngan jemau diau ngerjauka setu diau ja'at.

¹⁰ Diau kukiciakkatu ukan jemau diau nidau keruan Allah diau menaugawia, jemau selak, penipu ngan jemau diau nyemba patung. Ukan ughangtu diau kukiciakka, karnau amun kamu endak njawuhi ughangtu, cengki kamu ngeluagh nian jak di deniauni.

¹¹ Diau kukiciakka, supayau kamu jangan bekantin ngan jemau diau ngakuak diriau jemau Keristen, anyautu jemau itu nidau senangaian, selak, nyemba patung, ngarutka jemau, tukang mabuak ngan pemaling. Serempak makan ajau jangan ngan jemau luak itu.

^12-13 Ukan kerjauku ngadili jemau diau ukan Keristen. Allah ka ngadili ughangtu. Anyautu jemau Keristen mesti kamu adili. Dalam Injil ditulis, “Laratkala jemau ja'at jak di guak kamu.”