1 KURINTUS 15 - PEJANJIAN EMPAI CERITAU ILUAK

Keristus ngulang idup.

¹ Mbak kini, kantin-kantinku, aku endak ngingatka agi ceritau iluak jak di Allah, diau la kukiciakka senitu ngan kamu. Kamu la nerimaunyau, dijadika dasagh iman kamu.

² Amun kamu nuruti nian setu diau kukiciakka ngan kamu, mangku ceritau iluaktu ka nyelamatka kamu. Amun kamu nidau nurutinyau, nidau bediau gunaunyau kamu njadi jemau percayau.

³ Setu diau kukiciakka ngan kamutu kuterimau pulau. Diau penting sekali la kukiciakka ngan kamu, bansau Keristus mati karnau dusau-dusau kitau, luak la ditulis dalam Injil,

⁴ bansau Diau dikuburka, mangku la duau malam diidupka agi. Itu pulau ditulis dalam Injil.

⁵ Aku ngiciakka pulau, bansau Keristus diau la idup agitu ngancakka diriAu ngan Pitrus, mangku ngan duau belas anak-buaHau.

⁶ La udimautu Diau ngancakka diriAu ngan limau ratus anak-buaHau serempak. Banyak jak di ughangtu gi idup mbak kini. Adau pulau jak di ughangtu diau la mati.

⁷ La udim itu, Diau ngancakka diriAu ngan Yakubus mangku ngan gegalau rasul.

⁸ Mangku mendian sekali Diau ngancakka diriAu ngan akuni pulau – aku luak kupiak diau adau lum masaunyau.

⁹ Akuni rasul diau nidau nian bereti jak di rasul lain, karnau aku nyaraui umat Keristen.

¹⁰ Anyautu karnau keilu'an Allah aku njadi luak aku mbak kini. Mangku nidau rugi Allah iluak ngan aku. Aku la bekerjau mati-matian nian jak di gegalau ughangtu. Sebenaghau ukan aku diau ngerjauka titu, tapitu Allah diau nyayangi ngan nulungi aku.

¹¹ Itula sebapau empuak aku empuak ughangtu, itula diau kami ajaghka, mangku itula diau kamu percayau.

Manusiau ka ngulang idup

¹² Amun kami ngiciakka, bansau Keristus ngulang idup, ngapau jak di kamu adau diau ngiciakka, bansau jemau mati nidau ka idup agi?

¹³ Misalau jemau mati nidau ka idup agi, Keristus pulau nidau idup agi.

¹⁴ Mangku misalau Keristus nidau idup agi, nidau bediau gunaunyau kami ngiciakkanyau, mangku pulau nidau bediau gunaunyau kamu percayau.

¹⁵ Lagi tenyatau kamini mbu'ung ngan ceritau Allah, karnau kami ngiciakka, bansau Allah la ngidupka Keristus jak di mati, awuak Diau nidau ngulang idup, amun nyela jemau mati nidau ngulang idup.

¹⁶ Amun ngenian jemau mati nidau diidupka agi, Keristus pulau nidau diidupka agi.

¹⁷ Amun Keristus nidau idup agi, nidau bediau gunaunyau kamu percayau, mangku kamu masia dikuasaui dusau.

¹⁸ Mangku jemau diau la mati, empuak percayau ngan Keristus, benasau pulau.

¹⁹ Amun kitau ngaghapka Keristus cuman batan endak idup di deniauni ajau, mangku jak di gegalau manusiau kitauni diau malang sekali.

²⁰ Anyautu nyela, Keristus idup agi jak di mati. Mangku adau aghapan, bansau jemau diau la mati ka idup agi.

²¹ Maut adau di deniau karnau sughang jemau, luak itula pulau idup agi jak di mati dienjuakka ngan manusiau karnau sughang jemau.

²² Gegalau jemau mati karnau kerjau Adam, luak itu pulau gegalau jemau ka idup agi karnau kerjau Keristus.

²³ Anyautu bilang jemau ka diidupka nurut gilirannyau: Dulu sekali Keristus, nanti masau Diau datang agi, giliran jemau diau njadi hak Keristus.

²⁴ La udim itu kiamat. Masau itu Keristus ka nunduakka gegalau pemerintahan ngan kuasau ngan kekuatan, mangku Diau ka nyeraka kuasauNyau njadi rajau ngan Allah Bapak.

²⁵ Keristus mesti maju merinta, enggut Allah nunduakka gegalau musuAu di bawa ketingAu.

²⁶ Musua diau mendian ditunduakka itula maut.

²⁷ Dalam Injil ditulis luak ini, “Allah la nunduakka gegalaunyau di bawa ketingAu.” Nyela, amun dikiciakka gegalaunyau la ditunduakka ngan Diau, itu bereti diau nunduakkanyau Diau sendighi nidau temasuak.

²⁸ Anyautu amun gegalaunyau la ditunduakka ngan Keristus, mangku Anak Allah itu ka nunduakka diriAu ngan Allah. Mangku Allah merinta gegalaunyau.

²⁹ Misalau jemau mati nidau ka ngulang idup, tuapau gunaunyau jemau dibaptis batan endak jemau mati? Ngapau adau jemau diau endak dibaptis batan endak jemau mati, amun nyela jemau mati nidau ka idup agi?

³⁰ Kamini pulau, ngapau kami maju endak ngadapi bayau?

³¹ Idang aghi aku ngadapi maut. Aku ngiciakka luak ini, karnau aku bangga ngan idup kamu, karnau kamu la percayau ngan Yesus Keristus, Tuhan kitau.

³² Amun nurut rupu'an manusiau ajau, tuapau gunaunyau aku melawan benatang ganas di Ipisus? Amun jemau mati nidau ka idup agi, iluakla kitau “makan-minum, beriang-riang, karnau pagi kitau ka mati.”

³³ Jangan kamu tetipu! Amun bekantin ngan jemau jedit, itu merusakka perembak diau iluak!

³⁴ Mbak kini jagaula! Jangan maju ngerjauka dusau. Adau jak di kamu diau lum percayau nian ngan Allah. Titu maluka nian!

Ngulang idup bebadan empai

³⁵ Asauku adau diau betanyau, “Luak manau jemau mati diidupka agi? Badan diau luak manau ka dienjuakka ngan ughangtu, amun idup agi?”

³⁶ Alaka bigalau! Amun kamu nanam benia, beniatu nidau ka tumbua, amun beniatu lum abis.

³⁷ Benia diau kamu tanam di tana, apu benia padi apu benia lainau, itu cuman mughak ajau, ukan tanaman diau ka tumbua nanti.

³⁸ Anyautu Allah ngenjuakkanyau rupau nurut kenda'Au. Bilang mecam benia dienjuakkaNyau rupau diau cucuk.

³⁹ Gegalaunyau diau benyawau badanau nidau semegi. Badan manusiau lain ngan badan benatang. Badan burung lain pulau, badan ikan lain agi.

⁴⁰ Luak itu pulau adau setu di langit ngan setu di deniau. Ringkia setu diau di langit lain ngan ringkia setu diau di deniauni.

⁴¹ Ringkia matau-aghi lain ngan ringkia bulan. Ringkia bintang lain agi, mangku ringkia bintang pulau nidau semegi.

⁴² Luak itu pulau nanti ngan jemau mati diau idup agi. Badan diau ditanamtu ka busuak, badan diau idup agi nidau ka busuak.

⁴³ Badan diau ditanamtu litak, badan diau idup agi ka kuat.

⁴⁴ Badan diau ditanam badan jak di deniau, badan diau idup agi badan diau dienjuakka Rua Allah. Adau badan jak di deniauni, mangku adau pulau badan jak di Rua Allah.

⁴⁵ Dalam Injil ditulis luak ini, “Mangku manusiau diau dulu sekali, diautu Adam, dijadika, mangku diau idup.” Mangku Adam diau mendiantu rua diau ngenjuakka idup.

⁴⁶ Diau datang dulu sekali ukan badan jak di rua, tapitu badan jak di deniau. Diau jak di rua datang mendian.

⁴⁷ Adam diau dulu sekali asalau jak di tana. Adam diau udim itu asalau jak di sergau.

⁴⁸ Jemau deniau ini luak Adam diau dibuat jak di tana, jemau sergau luak diau datang jak di sergau.

⁴⁹ Mbak kini kitau semegi ngan Adam diau asalau jak di tana, luak itu nanti kitau ka semegi pulau ngan diau jak di sergau.

⁵⁰ Diau endak kukiciakka ngan kamu luak ini: Badan diau dijadika jak di dagha ngan daging nidau pacak bulia bada di sergau, mangku badan diau ka busuaktu nidau pacak idup selelamaunyau.

⁵¹ Ndengaghla resiau ini: Nidau gegalau kitau ka mati, anyautu kitau ka beghuba galau,

⁵² masau negal ajau, masau terumpit diau mendian ka dimunika. Karnau masau ndengagh muni terumpittu, jemau mati ka ngulang idup selelamaunyau, mangku kitau ka diuba galau.

⁵³ Karnau badan diau ka mati ini mesti digenti ngan badan diau nidau ka mati. Mangku badan diau jak di deniauni mesti digenti ngan badan jak di sergau.

⁵⁴ Mangku amun badan diau ka mati la digenti ngan badan diau nidau ka mati, badan jak di deniauni digenti ngan badan jak di sergau, mangku la ditepati setu diau ditulis dalam Injil, “Kematian la dilengitka, kemenangan la dapat.”

⁵⁵ “Ui, maut, di manau kemenangan kaba? Di manau bisau kaba?”

⁵⁶ Bisau maut itula dusau, mangku kuasau dusau itula ukum Taurat.

⁵⁷ Empuak luak itu, terimau-kasia ngan Allah. Diau la ngenjuakka kemenangan ngan kitau karnau Yesus Keristus, Tuhan kitau.

⁵⁸ Karnau itu, kantin-kantinku diau kusayangi, kuatkala ngan teguakala iman kamu. Bekerjaula maju batan endak Tuhan ngan ngenianau, karnau kamu keruan, bansau kerjau kamu batan endak Tuhan nidau ka keria ajau.