1 KURINTUS 13 - PEJANJIAN EMPAI CERITAU ILUAK

¹ Empuak aku pacak ngiciak serbau mecam basau manusiau ngan basau malaikat pulau, anyautu amun aku nidau nyayangi jemau lain, aku semegi ngan gung ngan canang diau dimunika asal ajau.

² Empuak aku pacak ngiciakka katau Allah ngan ngerti gegalau resiau Allah ngan ngeruani gegalaunyau, empuak aku percayau nian ngan Allah, mangku pacak ngaliaka gunung, anyautu aku nidau nyayangi jemau, dikit kia aku nidau begunau.

³ Empuak gegalau retauku kuenjuakka ngan jemau serik, ngan pulau nyeraka badanku disilap, anyautu aku nidau nyayangi jemau, mangku gegalaunyautu nidau bediau gunaunyau.

⁴ Jemau diau nyayangi jemau lain ngaligh ngan atiau iluak. Diau nidau sengit, nidau langguak ngan nidau geduak.

⁵ Diau nidau ngerjauka setu diau nidau pantas ngan nidau masau jemau nuruti kenda'au. Diau nidau mura purik ngan nidau maju ngingatka sala jemau.

⁶ Diau nidau riang ngan setu diau nidau adil, tapitu ikut riang ngan setu diau benagh.

⁷ Diau ta'an ngadapi gegalaunyau, percayau gegalaunyau, ngaghapka gegalaunyau, ta'an, ngaligh ngan gegalau penanggungan.

⁸ Kasia nidau ka abis. Ngiciakka katau Allah ka udim. Ngiciak basau rua ka mandak. Kepintaran ka lengit pulau.

⁹ Karnau kepintaran ngan ngiciakka katau Allah nidau sempernau.

¹⁰ Anyautu nanti ka datang masaunyau, Allah ka nggenapi gegalaunyau. Mangku diau nidau sempernau ka lengit.

¹¹ Timpau aku budak keciak, aku ngiciak luak budak keciak, peghasauan luak budak keciak, berupuak luak budak keciak. Mbak kini aku la wagat, mangku aku ninggalka perembak luak budak keciaktu.

¹² Setu diau kitau kina'i mbak kini luak gambar di cemin diau kabugh. Nanti kitau ka nginak diau jelas. Mbak kini aku keruan lum sempernau. Nanti aku keruan diau sempernau, luak aku la dikeruani Allah.

¹³ Mangku penarau ini adau tigau mecam diau mesti kitau kerjauka: percayau, ngaghapka ngan nyayangi jemau. Mangku diau penting sekali jak di tigau itu nyayangi jemau.