1 KURINTUS 11 - PEJANJIAN EMPAI CERITAU ILUAK

¹ Penaula aku, luak aku pulau menau Keristus.

Ceritau sembayang makai telekung

² Aku endak muji kamu, karnau kamu maju ngingatka ngan nuruti ajaghan diau la kuajaghka ngan kamu.

³ Aku endak, supayau kamu ngeruani, bansau diau ngepala'i jemau lanang nyela Keristus, diau ngepala'i jemau tinau nyela lakiau, diau ngepala'i Keristus nyela Allah.

⁴ Amun jemau lanang diau dang bedu'a ngan ngiciakka katau Allah di adapan jemau banyak, mangku nudungi pala'au, jemautu nggelakka Keristus diau ngepala'inyau.

⁵ Anyautu amun jemau tinau dang bedu'a ngan ngiciakka katau Allah di adapan jemau banyak, nidau makai telekung, tinau itu nggelakka lakiau diau ngepala'inyau. Itu semegi ngan palak tinautu la dicukur.

⁶ Amun sughang tinau enggup makai telekung, iluakla gumba'au digunting. Anyautu amun sughang tinau dicukur ngan digunting gumba'au, diau digelakka. Karnau itu iluakla makai telekung.

⁷ Jemau lanang nidau nanti makai telekung, karnau diau nggambarka keagungan Allah. Anyautu jemau tinau nggambarka keagungan jemau lanang,

⁸ karnau jemau lanang nidau dijadika jak di jemau tinau, tapitu jemau tinau dijadika jak di jemau lanang.

⁹ Mangku jemau lanang nidau dijadika batan endak jemau tinau, tapitu jemau tinau dijadika batan endak jemau lanang.

¹⁰ Itula sebapau jemau tinau mesti makai telekung, tandau diau dikepala'i lakiau karnau malaikat-malaikat.

¹¹ Empuak luak itu, ngan kitau jemau Keristen jemau tinau nidau bediau, amun ukan jemau lanang; mangku jemau lanang nidau bediau, amun ukan jemau tinau.

¹² Karnau empuak jemau tinau asalau jak di jemau lanang, mangku jemau lanang adau karnau jemau tinau, gegalaunyau jak di Allah.

¹³ Cubau rupuakkala ini ngan kamu: Apu iluak jemau tinau bedu'a ngan Allah di mukau jemau banyak nidau makai telekung.

¹⁴ Nurut adat amun lanang gumbak panjang, itu nidau pantas.

¹⁵ Anyautu amun jemau tinau gumbak panjang, titu njadi kebanggaan, karnau gumbaktu dienjuakka ngan diau batan endak nukupi pala'au.

¹⁶ Amun adau jemau diau endak bebala mbalaka pekarau telekung, diau pacak kukiciakka ngan jemautu, bansau kami ngan jemau Keristen lainau cuman carau luak itu tadi, lain nidau bediau agi.

Jamuan Tuhan

¹⁷ Aku nidau muji kamu ngan setu diau endak kukiciakka ini: Carau kamu betunggal ukan sangi neguaka iman kamu, tapitu ngarutka iman.

¹⁸ Aku ndengagh, amun jemau Keristen betunggal, adau rumbungan diau nidau semegi pendapat, mangku aku kirau dikit banya'au ceritautu benagh.

¹⁹ Nyela, sepantasau adau pepecahan di antarau jemau Keristen, supayau kina'an, sapau jak di kamu diau Keristen diau ngenian.

²⁰ Amun kamu betunggal, diau kamu adauka ukan jamuan Tuhan.

²¹ Karnau masau kamu makan, bilang jemau berebut ngambiak makanan sesughangan, mangku adau diau nidau dapat tuapau-apau, adau diau mabuak.

²² Ngapau pulau luak itu? Apu kamu nidau beghuma? Kamu pacak makan-minum di situ. Apu kamu endak nggelakka umat Allah? Apu endak maluka jemau diau nidau bediau tuapau-apau? Tuapau diau mesti kukiciakka ngan kamu? Apu aku mesti muji kamu? Nidau! Aku nidau ka muji kamu.

²³ Setu diau la kuajaghka ngan kamu itu, kuterimau jak di Tuhan, bansau malamau Tuhan Yesus diseraka, Diau ngambiak ruti,

²⁴ mangku beterimau-kasia ngan Allah. Udimautu dipiyak-piya'Au rutitu ngan bekatau, “Inila badanKu diau Kuenjuakka batan endak kamu. Kerjaukala itu batan endak ngingatka Aku.”

²⁵ Luak itu pulau udim makan Diau ngambiak mangkuak anggur mangku bekatau, “Mangkuak anggur ini janji Allah diau empai, diau disahka ngan daghaKu. Idang kali kamu minum jak di mangkuakni, kerjaukala itu batan endak ngingatka Aku.”

²⁶ Jadi, idang kali kamu makan ruti ngan minum jak di mangkuaktu kamu ngiciakka kematian Tuhan, enggut Diau datang.

²⁷ Karnau itu jemau diau makan ruti ngan minum jak di mangkuak Tuhan itu tadi ngan carau nidau pantas, jemautu bedusau tuadap Tuhan diau la nyeraka badanAu ngan daghaHau.

²⁸ Amun luak itu, bilang jemau mesti ngeruani diriau kudai, mangku udim itu makan ruti ngan minum anggurtu.

²⁹ Amun jemau diau makan ruti ngan minum jak di mangkuaktu nidau ngaku'i retiau badan Tuhan, diau ndatangka ukuman batan endak diriau, masau diau makanau ngan minumau.

³⁰ Itula sebapau banyak jak di kamu diau buidapan ngan litak. Adau pulau diau la mati.

³¹ Amun kitau ngeruani diri kitau kudai, kitau nidau ka diukum Allah.

³² Anyautu amun kitau diukum Allah, Diau endak ngajagh kitau, mangku kitau nidau diukum serempak ngan deniauni.

³³ Itula sebapau, kantin-kantinku, amun kamu betunggal endak makan jamuan Tuhan, kamu mesti sangi nanti.

³⁴ Amun adau diau lapagh, jemautu makan kudai di ghumahau, supayau jangan betunggal batan endak diukum. Setu diau lain ka kukiciakka ngan kamu, amun aku datang agi.