1 KURINTUS 10 - PEJANJIAN EMPAI CERITAU ILUAK

Jangan nyemba diwau

¹ Kantin-kantinku, kamu la keruan setu diau la tejadi ngan niniak puyang kitau, timpau ughangtu ngikut Musa. Ughangtu dibayangi aban galau, mangku nyembeghangi Laut Abang ngan selamat.

² Itu pacak dikiciakka umpamau baptisan dalam aban ngan laut endak njadi anak-bua Musa.

³ Gegalau ughangtu makan makanan ruhani diau semegi

⁴ ngan minum minuman ruhani diau semegi. Gegalau ughangtu minum jak di gunung batu ruhani diau ngantini ughangtu. Mangku gunung batu itu Keristus.

⁵ Empuak luak itu, Allah nidau riang ngan banyak nian jak di ughangtu, mangku mayat ughangtu beunjughan di padang bungin.

⁶ Gegalaunyautu njadi cuntau batan endak kitau njadi peringatan, supayau kitau jangan endak ngerjauka setu diau ja'at luak dikerjauka ughangtu.

⁷ Jangan pulau nyemba diwau luak dikerjauka separau jak di ughangtu, luak ditulis di Injil, “Bangsau itu duduak makan-minum ngan beriang-riang ngerjauka setu diau nidau senunuan endak nyemba patung.”

⁸ Jangan kitau menaugawia luak dikerjauka separau jak di ughangtu. Mangku duau pulua tigau ribu jak di ughangtu mati jangkau saghi, karnau ngerjauka titu.

⁹ Jangan pulau kitau ncubaui Tuhan, luak diau dikerjauka separau jak di ughangtu senitu, mangku ughangtu mati dicetuak ulagh.

¹⁰ Jangan kitau bemumut luak diau dikerjauka separau jak di ughangtu, mangku ughangtu dibunua malaikat kematian.

¹¹ Gegalaunyautu tejadi ngan ughangtu njadi cuntau ngan jemau lain, mangku ditulis njadi peringatan batan endak kitau, kitau diau idup masau pengabisan saman ini.

¹² Mangku jemau diau nyangkau diau tegua, sepepadaula, supayau jangan benasau.

¹³ Amun kamu dicubaui, ingatkala, bansau jemau lain pulau meghasaukanyau luak itu. Allah nepati janjiau. Diau nidau ngenangka kamu dicubaui lebia jak di kekuatan kamu. Masau kamu dicubaui, masau itu pulau Diau ngenjuakka jalan keluagh ngan kamu ngan neguaka kamu mangku pacak ta'an.

¹⁴ Itula sebapau, kamu mesti njawuhi diwau.

¹⁵ Aku ngiciak ngan kamu luak ngan jemau diau bepengertian. Rupuakkala ngan kamu kici'anku ini.

¹⁶ Mangkuak diau kitau pakai masau kitau minum anggur ngan beterimau-kasia ngan Allah, apu ukan titu nunjuakka kitau seghundak ngan Keristus dalam kematianNyau? Ruti diau kitau agia-agiaka masau kitau makanau serempak, apu ukan titu nunjuakka, bansau kitau seghundak ngan badan Keristus?

¹⁷ Ruti cuman sebua, mangku kitau diau makanau empuak banyak njadi sutiak, karnau gegalau kitau bulia bagian jak di ruti diau sebuatu.

¹⁸ Kina'i jemau Israil senitu. Ukanau jemau diau makan makanan diau dikerbanka njadi seghundak ngan bada bekerban itu?

¹⁹ Tuapau reti katauku ini? Apu makanan diau disiwauka adau retiau? Apu diwau penting?

²⁰ Nidau! Diau kukiciakkatu luak ini: Setu diau disiwaukatu dikerbanka ngan iblis ukan ngan Allah. Mangku aku nidau ngajung kamu seghundak ngan iblis.

²¹ Kamu nidau pacak minum jak di mangkuak Tuhan ngan pulau jak di mangkuak iblis. Mangku kamu nidau kila pacak makan di bada makanan Tuhan ngan pulau di bada makanan iblis.

²² Apu kitau endak ngajung Tuhan sengit? Apu kuatla kitau sangkan Tuhan?

²³ Katau jemau, “Kitau bulia ngerjauka tuapau kila.” Nyela, anyautu nidau gegalaunyautu begunau. “Kitau bulia ngerjauka tuapau kila.” Nyela, anyautu nidau gegalaunyau ngiluakka idup kitau.

²⁴ Jangan sughang kia merupuakka diriau ajau. Bilang jemau mesti merupuakka jemau lain pulau.

²⁵ Kamu bulia makan gegalaunyau diau dijual di pekan, nidau nanti ditanyauka kudai, karnau nidau nanti ghibal.

²⁶ Karnau di Injil ditulis, “Deniau ngan gegalau isiau Tuhan empuau.”

²⁷ Amun kamu dipantau makan di ghuma jemau diau nidau percayau, mangku kamu pegi, makanla setu diau dienjuakka ngan kamu, nidau nanti nanyauka jak di manau makanan itu, mangku kamu nidau ghibal.

²⁸ Anyautu amun adau jemau diau ngiciakka ngan kamu, “Makanan ini la disiwauka”, jangan kamu makan makanan itu karnau nyanauka jemau diau la ngiciakkanyautu, mangku atiau nidau ghibal.

²⁹ Diau kukiciakkatu ukan keghibalan ati kamu, tapitu keghibalan ati ughang itu. Asauku adau diau betanyau, “Ngapau kebibasanku dibatasi keghibalan jemau?

³⁰ Amun aku makan ngan beterimau-kasia ngan Allah, ngapau pulau jemau nggelakka aku karnau makan itu, awuak aku beterimau-kasia ngan Allah?”

³¹ Tuapau kila diau kamu kerjauka, apu makan apu minum, kerjaukala gegalaunyautu batan endak meregaui Allah.

³² Jangan nyinggung peghasauan jemau, empuak jemau Yahudi empuak jemau Yunani empuak jemau percayau.

³³ Idupla luak aku. Aku beusaha endak melemakka ati gegalau jemau ngan carau luak manau kila, ukan batan endak kepentingan akunila, tapitu supayau banyak jemau diselamatka.