Psalmyn 84 - Lioar ny Psalmyn 1765 (Pointed)

PSAL. 84. Quam dilecta!

¹ O cre cha eunyssagh ta dty chummallyn: uss Hiarn dy heshaght flaunys!

² Ta m’annym geearree as goaill foddeeaght dy gholl stiagh ayns cooyrtyn y Chiarn: ta my chree as m’eill goaill boggey ayns y Jee bio.

³ Ta’n sparroo hene er gheddyn ynnyd, as yn gollan-geayee edd raad oddys ee e heïn y hroggal: dy-jarroo ny altaryn ayds, O Hiarn jeh’n cheshaght flaunyssagh, my Ree as my Yee.

⁴ Bannit t’adsyn ta vaghey ayns dty hie: bee ad dy-kinjagh cur moylley dhyt.

⁵ Bannit ta’n dooinney ta’n niart echey ayn-yds: ayns e chree ta ny raaidyn ayds.

⁶ Quoi ga dy vel eh goll trooid coan dy hreihys, t’eh jeeaghyn er myr farrane: as myr puill er nyn lhieeney lesh ushtey.

⁷ Hed ad veih niart gys niart: as ta dagh unnane oc chebbal eh hene fenish yn Jee dy Yee'ghyn ayns Sion.

⁸ O Hiarn Yee dy heshaght flaunys, clasht rish my phadjer: eaisht, O Yee Yacob.

⁹ Cur-my-ner, O Yee nyn vendeilagh: as jeeagh er eddin dt’er-ooïllit.

¹⁰ Son ta un laa ayns dty chooyrtyn: ny share na thousane.

¹¹ Baare lhiam currym y dorrys y ve orrym ayns thie my Yee: na dy vaghey ayns cabbaneyn ny mee-chrauee.

¹² Son ta’n Chiarn Jee ny hoilshey as fendeilagh: ver y Chiarn grayse as gloyr: as cha bee nhee mie erbee er ny chummal vowesyn ta leeideil bea chrauee.

¹³ O Hiarn Yee dy heshaght flaunys; bannit ta’n dooinney ta cur e hreishteil ayn-yds.