Psalmyn 81 - Lioar ny Psalmyn 1765 (Pointed)

PSAL. 81. Exultate Deo.

¹ Lhig dooin arrane gennal y ghoaill gys Jee nyn niart: jean-jee kiaull gherjoil y yannoo gys Jee Yacob.

² Gow-jee arrane-moyllee, lhieu-jee ayns shoh yn tabret: yn chlaasagh villish, as y lute.

³ Sheid-jee yn cayrn dy-ard ec yn eayst noa: dy-jarroo ec y traa ta pointit, as er y laa-feailley casherick ain.

⁴ Son va shoh er ny yannoo ny ’lattyss son Israel: as ny leigh liorish Jee Yacob.

⁵ Shoh doardee eh ayns Joseph son recortys: tra haink eh magh ass cheer Egypt, as er chlashtyn glaare yoarree.

⁶ Hug mee aash da ny geayltyn echey veih’n errey: as va ny laueyn echey er nyn livrey veih jannoo ny pooiyt.

⁷ Deïe oo orrym ayns seaghyn, as livrey mee oo: as hug mee clashtyn dhyt tra shen huitt y sterrym ort.

⁸ Phrow mee oo myrgeddin: ec ushtaghyn y streeu.

⁹ Clasht-jee, O my phobble, as nee’ms soilshaghey dhyt, O Israel: my nee oo geaishtagh rhyms,

¹⁰ Cha bee Jee erbee joarree ayn-yds: cha-moo ver oo ooashley da Jee erbee elley.

¹¹ Mish y Chiarn dty Yee, hug lhiam uss magh ass thalloo Egypt: foshil dty veeall dy-lhean, as lhieen-ym eh.

¹² Agh cha ballish my phobble geaishtagh rish my choraa: as cha ballish Israel biallys y choyrt dou.

¹³ Myr shen livrey mee ad seose gys sayntyn nyn greeaghyn hene: as lhig mee daue geiyrt er ny smooinaghtyn fardalagh oc hene.

¹⁴ O dy beagh my phobble er n’eaishtagh rhyms: son dy beagh Israel er n’immeeaght ayns my raaidyn.

¹⁵ Veïn dy-leah er choyrt sheese ny noidyn oc: as er hyndaa my laue noi ny tranlaasee oc.

¹⁶ Veagh adsyn va dwoaie oc er y Chiarn er ny gheddyn nyn mreageryn: agh veagh y traa ocsyn er varraghtyn son dy-bragh.

¹⁷ Veagh eh er veaghey ad myrgeddin lesh y flooyr curnaght s’glenney: as lesh mill ass y chreg chloaie veïn er dty yannoo magh.