Psalmyn 64 - Lioar ny Psalmyn 1765 (Pointed)

PSAL. 64. Exaudi, Deus.

¹ Clasht rish my choraa, O Yee, ayns my phadjer: freill my vioys veih aggle y noid.

² Follee mee veih chaglym cooidjagh ny mee-viallee: as veih irree-magh ny drogh-yantee;

³ T’er shlieeu nyn jengey myr cliwe: as ta lhiggey nyn sideyn, dy-jarroo goan sharroo;

⁴ Dy vod ad dy-follit lhiggey ersyn ta firrinagh: t’ad dy woalley eh doaltattym, as cha vel aggle orroo.

⁵ T’ad jannoo ad hene daaney ayns olkys: as cur nyn goyrle dy-cheïley, kys oddys ad ribbaghyn y hoiaghey; as gra, nagh vaik dooinney erbee ad.

⁶ T’ad smooinaghtyn dy-dowin er olkys, as dy chliaghtey eh: shen t’ad dy reayll follit eddyr ad hene, dy-chooilley ghooinney ayns diunid e chree.

⁷ Agh nee Jee lhiggey doaltattym orroo lesh side leah: dy bee ad lhottit.

⁸ Dy-feer, ver nyn jengaghyn hene orroo tuittym: ayns wheesh as dy jean adsyn ta fakin ad, garaghtee as craid y yannoo jeu.

⁹ As jirr dy-chooilley ghooinney hee eh, She Jee t’er n’yannoo shoh: son ver ad tastey dy nee eh yn obbyr echeysyn.

¹⁰ Gow-ee yn dooinney cairagh boggey ayns y Chiarn, as ver eh e hreishteil ayn: as nee adsyn ooilley ta firrinagh ayns cree, boggey ’ghoaill.