Psalmyn 37 - Lioar ny Psalmyn 1765 (Pointed)

EVENING PRAYER. PSAL. 37. Noli æmulari.

¹ Ny jean oo hene y heaghney er coontey ny mee-chrauee: cha-moo jean uss troo mysh ny drogh-yantee.

² Son bee adsyn dy-gerrit giarit sheese myr y faiyr: as er nyn vioghey myr y lhuss glass.

³ Cur uss dty varrant er y Chiarn, as jean dy-mie: jean cummal ayns y cheer, as bee oo dy firrinagh er dty yannoo magh.

⁴ Gow taitnys ayns y Chiarn: as ver eh dhyt yeearree dty chree.

⁵ Treisht gys y Chiarn dty raad, as cur dty varrant er: as ver eshyn lesh eh gy kione.

⁶ Nee eh dty chairys y yannoo cha sollys as y soilshey: as dty ghellal yeeragh myr y vun-laa.

⁷ Cumm shickyr gys y Chiarn, as farkee dy-surransagh ersyn: as ny lhig da sneih ve ort kyndagh rishyn ta’n seihll cheet lesh, noi’n dooinney ta jannoo lurg drogh choyrlyn.

⁸ Scuirr veih corree, as faag voïd jymmoose: ny bee er dty vrasnaghey, er aggle dy bee oo er dty ghreinaghey dy yannoo olk.

⁹ Bee drogh-yantee er nyn astyrt ass ny fraueyn: as adsyn ta dy-surransagh farkiaght er y Chiarn, yiow ad shoh eiraght ’sy cheer.

¹⁰ Foast maghey tammylt beg, as bee’n mee-chrauee dy-bollagh ersooyl: nee uss jeeaghyn son yn ynnyd echey, as bee eh er n’immeeaght.

¹¹ Agh yiow adsyn ta jeh spyrryd meen eiraght ayns y cheer: as bee ad er nyn ooraghey ayns palchey dy hee.

¹² Ta’n vee-chrauee goaill coyrle noi’n dooinney ynrick: as snaggeraght er lesh e eeacklyn.

¹³ Cha jean y Chiarn agh craid jeh: son t’eh er vakin dy vel y laa echey er-gerrey.

¹⁴ Ta’n vee-chrauee er dayrn y cliwe, as er lhoobey nyn mhow: dy lieggal sheese y boght as yn ymmyrchagh, as dy stroie ny lheid ocsyn ta jeh ymmyrkey yeeragh.

¹⁵ Hed y cliwe oc trooid y chree oc hene: as bee’n bow ocsyn er ny vrishey.

¹⁶ Ta’n red fardalagh t’ec y dooinney cairagh: ny share na berchys vooar ny mee-chrauee.

¹⁷ Son bee roihaghyn ny mee-chrauee er nyn mrishey: as ta’n Chiarn cummal seose yn sleih cairagh.

¹⁸ Ta fys ec y Chiarn er laghyn y vooinjer chrauee: as farree yn eiraght oc son dy-bragh.

¹⁹ Cha bee ad seaghnit ayns yn earish ghaueagh: as ayns ny laghyn dy ghenney bee dy-liooar oc.

²⁰ Er son ny mee-chrauee, nee ad cherraghtyn, as nee noidyn y Chiarn lheie ersooyl myr meeaylys eayin: dy-feer, myr y jaagh bee ad eebrit ersooyl.

²¹ Ta’n mee-chrauee goaill er eeasaght, as cha vel eh geeck: agh ta’n dooinney cairagh erreeishagh as feoyltagh.

²² Nee adsyn ta bannit dy Yee, vaghey ’sy cheer: as adsyn t’eh er gheyrey vees astyrit ass ny fraueyn.

²³ Ta’n Chiarn goardrail kesmadyn y dooinney mie: as jannoo e raad booisal da hene.

²⁴ Ga dy duitt eh, cha bee eh treigit: son ta’n Chiarn dy chummal eh seose lesh e laue.

²⁵ Va mee aeg, as nish ta mee shenn: as foast cha vaik mee rieau yn dooinney cairagh treigit, cha-moo e lhuight shooyl ny-dhieyn.

²⁶ Ta’n fer-cairagh dy-bragh myghinagh, as geeasaght: as ta e lhuight er ny vannaghey.

²⁷ Chea veih olk, as jean shen ny ta mie: as bee dty chummal foddey beayn.

²⁸ Son shynney lesh y Chiarn shen ny ta cairagh: cha vel eh treigeil e vooinjer chrauee hene, agh t’ad er nyn goadey er son dy-bragh.

²⁹ Bee’n sleih neu-chairagh er nyn gerraghey: er son sluight ny mee-chrauee, bee eh astyrit ass ny fraueyn.

³⁰ Nee’n vooinjer chairagh eiraght ’gheddyn ’sy cheer: as vaghey ayn son dy-bragh.

³¹ Ta beeall y fer-cairagh loayrt jeh creenaght: as bee e hengey taggloo jeh briwnys.

³² Ta leigh e Yee ayns e chree: as cha jean e chesmadyn skyrraghtyn.

³³ Ta sooill ec y vee-chrauee er y fer-ynrick: as t’eh shirrey oyr dy stroie eh.

³⁴ Cha vaag y Chiarn eh ayns e laue: ny eh y gheyrey tra t’eh er ny vriwnys.

³⁵ Treisht uss ayns y Chiarn, as freill yn raad echey, as nee eh uss y vishaghey dy bee eiraght ayd ’sy cheer: tra ta ny mee-chrauee cherraghtyn, nee oo shen y akin.

³⁶ Ta mish mee hene er vakin ny mee-chrauee ayns ard phooar: as blaaghey myr billey glass bay.

³⁷ Hie mee shiaghey, as cur-my-ner, v’eh ersooyl: vrie mee er y hon, agh cha row yn ynnyd echey raad erbee er ny gheddyn.

³⁸ Freill oo hene gyn loght, as cur tastey da’n red ta jeeragh: son shen ver lesh shee gys dooinney ec y jerrey.

³⁹ Er son ny drogh-yantee, nee ad cherraghtyn cooidjagh: as cronney ny mee-chrauee te, dy bee ad astyrit magh ec y jerrey.

⁴⁰ Agh ta saualtys y sleih cairagh cheet veih’n Chiarn: ta myrgeddin yn niart oc ayns y traa dy heaghyn.

⁴¹ As shassee yn Chiarn lioroo, as sauee eh ad: nee eh ad y livrey veih ny mee-chrauee, as sauail ad, er yn oyr dy vel ad coyrt nyn dreishteil aynsyn.