Psalmyn 36 - Lioar ny Psalmyn 1765 (Pointed)

PSAL. 36. Dixit injustus.

¹ Ta my chree ginsh dou olkys y vee-chrauee: nagh vel veg yn aggle dy Yee roish e hooillyn.

² Son t’eh brynnyraght rish hene ayns e hilley hene: derrey vees e pheccah eajee er ny gheddyn magh.

³ Ta goan e veeall neu-ynrick as laane dy oalsaght: t’eh er vaagail jeh dy ymmyrkey eh hene dy-creeney, as jeh jannoo dy-mie.

⁴ T’eh smooinaghtyn er olk er e lhiabbee, as cha vel eh er hoiaghey eh hene ayns raad mie erbee: cha-moo t’eh cur dwoaie da’n red ta olk.

⁵ Ta dty vyghin, O Hiarn, roshtyn gys ny niaughyn: as dty ynrickys gys ny bodjallyn.

⁶ Ta dty chairys shassoo myr ny sleïtyn ard: ta dty vriwnyssyn goll-rish y diunid vooar.

⁷ Coadee uss, Hiarn, chammah dooinney as beagh; Cre cha ooasle ta dty vyghin, O Yee: as ver cloan gheiney nyn marrant fo scaa dty skainyn.

⁸ Bee ad er nyn yannoo magh lesh palchey dty hie: as ver uss daue jough dty eunyssyn myr ass yn awin.

⁹ Son mârts ta chibbyr y vea: as ayns dty hoilshey nee mayd fakin soilshey.

¹⁰ O sheeyn magh dty chenjallys-ghraihagh hucsyn ta coyrt enney ort: as dty chairys dauesyn ta firrinagh ayns cree.

¹¹ O ny lhig da’n chass dy voyrn cheet m’oï: as ny lhig da laue ny mee-chrauee m'y hilgey sheese.

¹² Shen y raad t’ad er duittym, ooilley ny ta gobbraghey mee-chairys: t’ad er nyn dilgey sheese, as cha bee bree ayndoo dy hassoo.