Psalmyn 26 - Lioar ny Psalmyn 1765 (Pointed)

PSAL. 26. Judica me, Domine.

¹ Bee uss my vriw, O Hiarn, son ta mee er n’ymmyrkey mee hene gyn loght: ta my varrant neesht er ny ve er y Chiarn, er-y-fa shen cha duittym.

² Feysht mee, O Hiarn, as prow mee: ronsee my veeaghyn as my chree.

³ Son ta dty chenjallys-ghraihagh kinjagh roish my hooillyn: as nee’m gimmeeaght ayns dty irrinys.

⁴ Cha vel mee er vaghey marish sleih foalsey: cha-moo nee’m sheshaght rish y vooinjer volteyragh.

⁵ Ta feoh er ve aym er chymsagh cooidjagh yn drogh ’leih: as cha soie-ym mastey ny mee-chrauee.

⁶ Niee-ym my laueyn ayns ônid, O Hiarn: as myr shen hem gys dty altar;

⁷ Dy voddym fockley magh yn coraa dy wooise: as soilshaghey ooilley dty obbraghyn yindyssagh.

⁸ Hiarn, ta mee er ve graihagh er coortyn dty hie: as ynnyd cabbane-agglish dty ooashley.

⁹ O ny jeigh seose m’annym marish ny peccee: ny my vioys marish y vooinjer foalley;

¹⁰ Ayns ny laueyn oc ta mee-chairys: as ta nyn laue yesh laane dy yiootyn.

¹¹ Agh er my hon’s, nee’m gimmeeaght gyn loght: O livrey mee, as bee myghinagh dou.

¹² Ta my chass shassoo dy kiart: ver-ym moylley da’n Chiarn ayns chaglym cooidjagh y phobble.