Psalmyn 119 - Lioar ny Psalmyn 1765 (Pointed)

EVENING PRAYER. PSAL. 119. Beati immaculati. [ALEPH.]

[ALEPH.]

¹ Bannit t’adsyn ta glen ayns y raad: as ta gimmeeaght ayns leigh yn Chiarn.

² Bannit t’adsyn ta freayll ny recortyssyn echey: as shirrey er y hon lesh ooilley nyn gree.

³ Son t’adsyn nagh vel jannoo veg yn olk: gimmeeaght ayns e raaidyn.

⁴ T’ow uss er haarey shin: dy-imneagh dy reayll dt’annaghyn.

⁵ Oh, dy beagh my raaidyn cha jeeragh shen: dy voddin dty ’lattyssyn y reayll!

⁶ Myr shen cha bee’m er my choyrt gys nearey: choud as ta mee coyrt tastey da ooilley dty annaghyn.

⁷ Ver-ym booise dhyt lesh cree firrinagh: tra vee’m er n’ynsaghey briwnyssyn dty chairys.

⁸ Freill-ym dty oardaghyn: O ny treig mee dy-bollagh.

[BETH.] In quo corriget?

[BETH.]

⁹ Cre’n aght nee dooinney aeg e raaidyn y reayll glen: dy-jarroo liorish reill eh hene cordail rish dty ghoo?

¹⁰ Lesh ooilley my chree ta mee er hirrey er dty hon: O ny lhig dou goll er-shaghryn veih dty annaghyn.

¹¹ Dty ghoan ta mee er ollaghey cheu-sthie ayns my chree: nagh jinnin peccah ’yannoo dt’oï.

¹² Bannit t’ow uss, O Hiarn: O ynsee dou dty ’lattyssyn.

¹³ Lesh my veillyn ta mee er ny ve ginsh: jeh ooilley briwnyssyn dty veeall.

¹⁴ Ta taitnys wheesh er ve aym ayns raad dty leighyn: as ayns dy-chooilley vonney dy verchys.

¹⁵ Nee’m taggloo jeh dt’annaghyn: as ver-ym geill da dty raaidyn.

¹⁶ Bee my haitnys ayns dty ’lattyssyn: as cha jarrood-ym dty ghoo.

[GIMEL.] Retribue servo tuo.

[GIMEL.]

¹⁷ O jean mie da dty harvaant: dy voddym ’ve bio as dty ghoo y reayll.

¹⁸ Foshil uss my hooillyn: dy voddym fakin reddyn yindyssagh dty leigh.

¹⁹ Ta mee my yoarree er y thalloo: O ny jean uss keiltyn voym dty annaghyn.

²⁰ Ta m’annym brishey magh son y ghraih feer jeean: t’eck dy-kinjagh gys dt’oardaghyn.

²¹ T’ow er choyrt oghsan da ny mooaralee: as cursit t’adsyn ooilley ta goll er-shaghryn veih dty annaghyn.

²² O chyndaa voym’s nearey as oghsan: son ta mee er vreaylley dty recortyssyn.

²³ Ren prinsyn myrgeddin soie as loayrt m’oï: agh ta dty harvaant thaaghey eh hene ayns dty ’lattyssyn.

²⁴ Son ta ny recortyssyn ayds my voggey: as my ir-choyrlee.

[DALETH.] Adhæsit pavimento.

[DALETH.]

²⁵ Ta m’annym lhiantyn gys y joan: O jean uss mish y vioghey cordail rish dty ghoo.

²⁶ Ta mee er ghoaill-rish my raaidyn, as t’ow uss er my chlashtyn: O ynsee dou dty ’lattyssyn.

²⁷ Cur orrym toiggal raad dt’annaghyn: as myr shen nee’m taggloo jeh dt’obbraghyn yindyssagh.

²⁸ Ta m’annym’s lheïe ersooyl son eer trimshey: jean m'y gherjaghey cordail rish dty ghoo.

²⁹ Scugh foddey voym yn raad dy vreagyn: as cur orrym mooar y yannoo jeh dty leigh.

³⁰ Ta mee er reih raad ny firrinys: as dty vriwnyssyn ta mee er hoiaghey kiongoyrt rhym.

³¹ Ta mee er lhiantyn gys dty recortyssyn: O Hiarn, ny jean mish y choyrt gys nearey.

³² Nee’ms roih ayns raad dty annaghyn: tra t’ow uss er hoiaghey my chree ec reamys.

MORNING PRAYER. [HE.] Legem pone.

[HE.]

³³ Ynsee dou, O Hiarn, raad dty ’lattyssyn: as freill-ym eh gys y jerrey.

³⁴ Cur dou tushtey, as freill-ym dty leigh: freill-ym eh dy-jarroo lesh ooilley my chree.

³⁵ Cur orrym dy immeeaght ayns cassan dt’annaghyn: son shen y raad ta my yeearree.

³⁶ Cromm my chree gys dty recortyssyn: as cha nee gys saynt.

³⁷ O chyndaa ersooyl my hooillyn, nagh der ad geill da fardail: as jean mish y vioghey ayns dty raad.

³⁸ O niartee dty ghoo ayns dty harvaant: dy voddyms aggle y ghoaill royd.

³⁹ Gow ersooyl yn kerraghey ta mee goaill aggle roish: son ta dty vriwnyssyn mie.

⁴⁰ Cur-my-ner, ta my haitnys ayns dt’annaghyn: O jean mish y vioghey ayns dty chairys.

[VAU.] Et veniat super me.

[VAU.]

⁴¹ Lhig da dty vyghin ghraihagh cheet myrgeddin hyms, O Hiarn: dy-jarroo dty haualtys, cordail rish dty ghoo.

⁴² [Shen myr ver-ym ansoor da my noidyn: son ta my hreishteil ayns dty ghoo.]

⁴³ O ny gow yn goo dy ynrickys dy-bollagh ass my veeall: son ta my hreishteil ayns dty vriwnyssyn.

⁴⁴ Myr shen freill-ym dy-kinjagh dty leigh: dy-feer, son dy-bragh as dy-bragh.

⁴⁵ As nee’m gimmeeaght ec my reamys: son ta mee shirrey dt’annaghyn.

⁴⁶ Loayr-yms jeh dty recortyssyn myrgeddin, dy-jarroo fenish reeaghyn: as cha jean-ym nearey ’ghoaill.

⁴⁷ As bee my haitnys ayns dt’annaghyn: ta mee er ve graihagh orroo.

⁴⁸ My laueyn neesht trogg-ym seose gys dt’annaghyn, ta mee er ve graihagh orroo: as bee my smooinaghtyn dowin er dty ’lattyssyn.

[ZAIN.] Memor esto servi tui.

[ZAIN.]

⁴⁹ O smooinee er dty harvaant cordail rish dty ghoo: ayn t’ow er choyrt orrym dy chur my hreishteil.

⁵⁰ Shoh ta dy my gherjaghey ayns my heaghyn: son ta dty ghoo er my vioghey.

⁵¹ Ta mee ec ny mooaralee feer vooar ayns faghid: ny-yeih cha vel mee er skyrraghtyn veih dty leigh.

⁵² Son chooinee mee er dty vriwnyssyn er dyn chenn earish, O Hiarn: as va mee er my gherjaghey.

⁵³ Ta mee fo aggle atchimagh: er coontey ny mee-chrauee ta treigeil dty leigh.

⁵⁴ Ta dty ’lattyssyn er ve my arraneyn: ayns thie my yoarreeaght.

⁵⁵ Ta mee er smooinaghtyn er dt’Ennyms, O Hiarn, ayns earish ny hoie: as er vreayll dty leigh.

⁵⁶ Shoh va my gherjaghey: er-y-fa dy dreill mee dty annaghyn.

[CHETH.] Portio mea, Domine.

[CHETH.]

⁵⁷ Uss my eiraght, O Hiarn: ta mee er yialldyn dy reayll dty leigh.

⁵⁸ Ren mee my accan imlee ayns dt’enish lesh ooilley my chree: O bee myghinagh dou cordail rish dty ghoo.

⁵⁹ Deïe mee er my raaidyn hene gys cooinaghtyn: as hyndaa mee my chassyn gys dty recortyssyn.

⁶⁰ Ren mee siyr, as cha lhig mee shiaghey yn traa: dy reayll dty annaghyn.

⁶¹ Ta sheshaghtyn ny mee-chrauee er my roostey: agh cha vel mish er yarrood dty leigh.

⁶² Ec y vean-oie nee’m girree dy chur booise dhyt: er coontey dty vriwnyssyn cairagh.

⁶³ Ta mee my heshey dauesyn ooilley ta goaill aggle royd: as ta freayll dty annaghyn.

⁶⁴ Ta’n seihll, O Hiarn, laane jeh dty vyghin: O ynsee dou dty ’lattyssyn.

[TETH.] Bonitatem fecisti.

[TETH.]

⁶⁵ O Hiarn, t’ow er ghellal dy-graysoil rish dty harvaant: cordail rish dty ghoo.

⁶⁶ O ynsee dou toiggal as tushtey firrinagh: son ta mee er chredjal dty annaghyn.

⁶⁷ Roish my row mee seaghnit, hie mee er-shaghryn: agh nish ta mee er vreayll dty ghoo.

⁶⁸ T’ow uss mie as graysoil: O ynsee dou dty ’lattyssyn.

⁶⁹ Ta ny mooaralee er droggal breg orrym: agh freill-yms dt’annaghyn lesh ooilley my chree.

⁷⁰ Ta’n cree oc cha roauyr as saill: agh ta my haitnys er ve ayns dty leigh.

⁷¹ S’mie te er my hon dy row mee ayns seaghyn: dy voddym gynsaghey dty ’lattyssyn.

⁷² Ta leigh dty veeall ny smoo dy voggey dou: na millaghyn dy airh as argid.

EVENING PRAYER. [JOD.] Manus tuæ fecerunt me.

[JOD.]

⁷³ Ta dty laueyn er my chroo as er my chummey: O cur dou tushtey, dy voddym gynsaghey dt’annaghyn.

⁷⁴ Bee adsyn ta goaill aggle royd, gennal tra hee ad mee: er-yn-oyr dy vel mee er choyrt my hreishteil ayns dty ghoo.

⁷⁵ Ta fys aym, O Hiarn, dy vel dty vriwnyssyn cairagh: as dy vel oo ayns eer ynrickys er choyrt seaghyn orrym.

⁷⁶ O lhig da dty chenjallys vyghinagh ve my gherjagh: cordail rish dty ghoo da dty harvaant.

⁷⁷ O lhig da dty vyghinyn graihagh cheet hyms, dy voddym ve bio: son ta my voggey ayns dty leigh.

⁷⁸ Lhig da ny mooaralee ve coodit lesh nearey, son t’ad dy-olkyssagh goll mygeayrt dy my stroie: agh nee’ms smooinaghtyn dy-dowin er dt’annaghyn.

⁷⁹ Lhig dauesyn ta goaill aggle royd, as t’er hoiggal dty recortyssyn: v’er nyn jyndaa hyms.

⁸⁰ O lhig da my chree v’er ny hickyraghey ayns dty ’lattyssyn: nagh bee nearey orrym.

[CAPH.] Defecit anima mea.

[CAPH.]

⁸¹ Ta m’annym er ghoaill foddeeaght son dty haualtys: as ta my hreishteil mie er graih dty ghoo.

⁸² Ta my hooillyn farkiaght dy-jeean son dty ghoo: gra, O cuinn nee oo mish y gherjaghey?

⁸³ Son ta mee shymlit myr crackan ayns y jaagh: ny-yeih cha vel mee jarrood dty ’lattyssyn.

⁸⁴ Cre whilleen ta laghyn dty harvaant: cuinn nee oo cooilleen y ghoaill orroosyn ta jannoo tranlaase orrym?

⁸⁵ Ta’n sleih moyrnagh er chleiy ooigyn er my hon: nagh vel cordail rish dty leigh.

⁸⁶ Ta ooilley dt’annaghyn firrinagh: t’ad jannoo tranlaase orrym dy-aggairagh; O bee uss my niart.

⁸⁷ V’ad faggys er n’yannoo kione orrym er y thalloo: agh cha hreig mee dt’annaghyn.

⁸⁸ O jean mish y vioghey lurg dty chenjallys-ghraihagh: as myr shen freill-ym recortyssyn dty veeall.

[LAMED.] In æternum, Domine.

[LAMED.]

⁸⁹ O Hiarn, ta dty ghoo: farraghtyn son dy-bragh ayns niau.

⁹⁰ Ta dt’irriney myrgeddin farraghtyn veih sheeloghe gys sheeloghe: t’ow er hoiaghey undin ny hooirey, as te er-mayrn.

⁹¹ T’ad tannaghtyn gys y laa t’ayn jiu cordail rish dty oardagh: son ta dy-chooilley nhee dy dty hirveish.

⁹² Er-be dy row my voggey ayns dty leigh: veïn er cherraghtyn ayns my heaghyn.

⁹³ Cha jarrood-ym dt’annaghyn dy-bragh: son lioroosyn t’ow er my vioghey.

⁹⁴ Ta mee lhiats; O saue mee: son ta mee er hirrey lurg dt’annaghyn.

⁹⁵ Ren ny mee-chrauee lhie ayns farkiaght er my hon dy my stroie: agh smooinee-yms er dty recortyssyn.

⁹⁶ Ta mee fakin dy vel jerrey er dy-chooilley nhee: agh ta dt’annaghyn er-skyn-towse lhean.

[MEM.] Quomodo dilexi!

[MEM.]

⁹⁷ Hiarn, cre’n ghraih t’ayms er dty leigh: fey-ny-laa ta mee smooinaghtyn er dy-dowin.

⁹⁸ T’ow uss trooid dt’annaghyn er my yannoo ny s’creeney na my noidyn: son t’ad dy-kinjagh mârym.

⁹⁹ Ta ny smoo dy hushtey aym na t’ec my ir-ynsee: son ayns dty recortyssyn ta mee baarail my smooinaghtyn.

¹⁰⁰ Ta mee ny s’creeney n’yn chenndeeaght: er-yn-oyr dy vel mee freayll dt’annaghyn.

¹⁰¹ Ta mee er chummal my chassyn veih dy-chooilley ghrogh raad: dy voddin freayll dty ghoo.

¹⁰² Cha vel mee er skyrraghtyn veih dty vriwnyssyn: son t’ow dy my ynsaghey.

¹⁰³ O cre cha millish ta dty ghoan gys my vlass: dy-jarroo, ny s’miljey na mill da my veeall!

¹⁰⁴ Trooid dt’annaghyn ta mee geddyn tushtey: shen-y-fa ta dwoaie aym er dy-chooilley ghrogh raad.

MORNING PRAYER. [NUN.] Lucerna pedibus meis.

[NUN.]

¹⁰⁵ Ta dty ghoo londeyr da my chassyn: as soilshey da my chesmadyn.

¹⁰⁶ Ta mee er vreearrey, as ta mee dy-shickyr kiarit: dy reayll dty vriwnyssyn.

¹⁰⁷ Ta mee seaghnit er-skyn towse: jean mish y vioghey, O Hiarn, cordail rish dty ghoo.

¹⁰⁸ Lhig da ourallyn-arryltagh my veeall uss y wooiys, O Hiarn: as ynsee dou dty vriwnyssyn.

¹⁰⁹ Ta m’annym dy-kinjagh ayns my laue: ny-yeih cha vel mee jarrood dty leigh.

¹¹⁰ Ta ny mee-chrauee er hoiaghey ribbeh er my hon: agh ny-yeih cha jagh mee er-shaghryn veih dty annaghyn.

¹¹¹ Dty recortyssyn ta mee er hirrey myr m’eiraght son dy-bragh: as cre’n-fa? t’ad eer boggey my chree.

¹¹² Ta mee er chrommey my chree dy chooilleeney dty ’lattyssyn dy-kinjagh: dy-jarroo gys y jerrey.

[SAMECH.] Iniquos odio habui.

[SAMECH.]

¹¹³ Ta dwoaie aym orroosyn ta smooinaghtyn er yn olk: agh shynney lhiam dty leigh.

¹¹⁴ T’ow uss my endeilagh as my choadey: as ta my hreishteil ayns dty ghoo.

¹¹⁵ Ass my enish, shiuish ghrogh-yantee: freill-yms annaghyn my Yee.

¹¹⁶ O niartee mee cordail rish dty ghoo, dy voddym ’ve beayn: as ny lhig dou tuittym giare jeh my hreishteil.

¹¹⁷ Jean uss mish y chummal seose, as bee’m sauchey: bee my haitnys dy-jarroo ayns dty ’lattyssyn.

¹¹⁸ T’ow uss er choyrt fo-chosh adsyn ooilley ta cur cooyl rish dty ’lattyssyn: son cha vel ad smooinaghtyn agh er molteyraght.

¹¹⁹ T’ow sheebey ersooyl ooilley mee-chrauee yn thallooin myr kesh: shen-y-fa shynney lhiam dty recortyssyn.

¹²⁰ Ta my eill er-creau son aggle jeeds: as ta mee fo atchim dty vriwnyssyn.

[AIN.] Feci judicium.

[AIN.]

¹²¹ Ta mee dellal ayns y chooish ta lowal as jeeragh: O ny faag mee fo pooar my hranlaasee.

¹²² Cur er dty harvaant dy ghoaill taitnys ayns shen ny ta mie: nagh jean ny mooaralee veg yn aggair dou.

¹²³ Ta my hoilshey er vailleil lesh jeeaghyn son dty lhaynt: as son goo dty chairys.

¹²⁴ O dell rish dty harvaant cordail rish dty vyghin ghraihagh: as ynsee dou dty ’lattyssyn.

¹²⁵ Ta mish dty harvaant; O cur dou tushtey: dy voddym toiggal dty ’lattyssyn.

¹²⁶ Te traa dhyt, Hiarn, dy hroggal dty laue: son t’ad er choyrt naardey dty leigh.

¹²⁷ Son shynney lhiam dty annaghyn: er-skyn airh as claghyn costal.

¹²⁸ Shen-y-fa ta mee cummal jeeragh ayns ooilley dty annaghyn: agh son raaidyn cammey ta slane dwoaie aym orroo ooilley.

[PE.] Mirabilia.

[PE.]

¹²⁹ Ta dty recortyssyn yindyssagh: shen-y-fa ta m’annym dy reayll ad.

¹³⁰ Tra ta dty ghoo goll magh: te coyrt soilshey as creenaght da’n vooinjer ôney.

¹³¹ Doshil mee my veeall, as ghow mee ennal: son ta my haitnys ayns dt’annaghyn.

¹³² O jeeagh orrym, as bee myghinagh dou: myr b’oallagh oo jannoo roosyn ta graihagh er dt’Ennym.

¹³³ Jean my chesmadyn y leeideil ayns dty ghoo: as myr shen cha vow mee-chraueeaght erbee barriaght orrym.

¹³⁴ O livrey mee veih tranlaase drogh gheiney: as myr shen freill-ym dt’annaghyn.

¹³⁵ Lhig da dt’eddin soilshean er dty harvaant: as ynsee dou dty ’lattyssyn.

¹³⁶ Ta my hooillyn shilley lesh jeïr: er-yn-oyr nagh vel deiney freayll dty leigh.

[TSADDI.] Justus es, Domine.

[TSADDI.]

¹³⁷ T’ow uss cairagh, O Hiarn: as ynrick ta dty vriwnyssyn.

¹³⁸ Ny recortyssyn t’ow uss er n’oardaghey: t’ad er-skyn-towse cairagh as firrinagh.

¹³⁹ Ta my ghraih’s jeean er my choyrt eer naardey: son dy vel my noidyn er yarrood dty ghoan.

¹⁴⁰ Ta dty ghoo’s er ny phrowal gys y chooid sodjey: as ta graih ec dty harvaant er.

¹⁴¹ Ta mee fardalagh, as beg er ny hoiaghey jee’m: ny-yeih cha vel mee jarrood dt’annaghyn.

¹⁴² Ta’n chairys ayds cairys dy-bragh farraghtyn: as dty leigh yn irriney.

¹⁴³ Ta seaghyn as trimshey er ghoaill greme orrym: ny-yeih ta my haitnys ayns dt’annaghyn.

¹⁴⁴ Ta cairys dty recortyssyn dy-bragh farraghtyn: O giall dou tushtey, as bee’m bio.

EVENING PRAYER. [KOPH.] Clamavi in toto corde meo.

[KOPH.]

¹⁴⁵ Ta mee geamagh lesh ooilley my chree: eaisht rhym, O Hiarn, freill-ym dty ’lattyssyn.

¹⁴⁶ Hoods, dy-feer, ta mee geamagh: cooin lhiam, as freill-ym dty recortyssyn.

¹⁴⁷ Ec brishey’n laa ta mee geamagh hoods: son ayns dty ghoo ta my hreishteil.

¹⁴⁸ Ta my hooillyn dooisht roish arrey ny hoie: dy voddym my hraa ’vaarail ayns dty ghoan.

¹⁴⁹ Clasht rish my choraa, O Hiarn, cordail rish dty chenjallys-ghraihagh: cur bree ayn-ym myr b’oallagh oo.

¹⁵⁰ T’ad tayrn er-gerrey ta dy-goanlyssagh jannoo tranlaase orrym: as t’ad foddey veih dty leigh.

¹⁵¹ Bee uss er-gerrey ec laue, O Hiarn: son ta ooilley dty annaghyn firrinagh.

¹⁵² Mychione dt’annaghyn, ta fys aym foddey er dy henney: dy vel oo er hoiaghey ad er undin shickyr son dy-bragh.

[RESH.] Vide humilitatem.

[RESH.]

¹⁵³ O smooinee er my arkys, as livrey mee: son cha vel mee jarrood dty leigh.

¹⁵⁴ Gow my chooish ayns laue as livrey mee: jean mee y vioghey cordail rish dty ghoo.

¹⁵⁵ Ta slaynt foddey voish ny mee-chrauee: son cha vel ad cur geill da dty ’lattyssyn.

¹⁵⁶ S’mooar ta dty vyghin, O Hiarn: jean mee y vioghey myr b’oallagh oo.

¹⁵⁷ Shimmey adsyn ta dy my voirey as jannoo tranlaase orrym: ny-yeih cha vel mish goll dy-lhiattee voish dty recortyssyn.

¹⁵⁸ Te trimshey dou dy akin ny drogh-yantee: son nagh vel ad freayll dty leigh.

¹⁵⁹ Smooinee, O Hiarn, kys shynney lhiam dty annaghyn: O jean mish y vioghey cordail rish dty chenjallys-ghraihagh.

¹⁶⁰ Ta dty ghoo’s firrinagh er dy rieau: ta ooilley briwnyssyn dty chairys farraghtyn son dy-bragh.

[SCHIN.] Principes persecuti sunt.

[SCHIN.]

¹⁶¹ Ta prinsyn er n’yannoo tranlaase orrym gyn oyr: agh ta my chree shassoo ayns aggle jeh dty ghoo.

¹⁶² Ta wheesh dy voggey aym jeh dty ghoo: as t’ec fer ta cosney mooarane spooilley.

¹⁶³ Er son breagyn, ta feoh as dwoaie aym orroo: agh shynney lhiam dty leigh.

¹⁶⁴ Shiaght keayrtyn ’sy laa ta mee dy dty voylley: er graih dty vriwnyssyn cairagh.

¹⁶⁵ S’mooar ta’n shee t’ocsyn ta graihagh er dty leigh: as cha der nhee erbee orroo eh y hreigeil.

¹⁶⁶ Hiarn, ta mee er yeeaghyn son dty haualtys slayntoil: as er n’yannoo lurg dty annaghyn.

¹⁶⁷ Ta m’annym er vreayll dty recortyssyn: as er choyrt graih er-skyn-towse daue.

¹⁶⁸ Ta mee er vreayll dt’annaghyn as dty recortyssyn: son ta ooilley my raaidyn kiongoyrt rhyt.

[TAU.] Appropinquet deprecatio.

[TAU.]

¹⁶⁹ Lhig da my accan cheet kiongoyrt rhyt, O Hiarn: cur dou tushtey cordail rish dty ghoo.

¹⁷⁰ Lhig da my aghin cheet gys dt’enish: livrey mee cordail rish dty ghoo.

¹⁷¹ Nee my veillyn fockley magh dty voylley: tra t’ow er m’ynsaghey ayns dty ’lattyssyn;

¹⁷² Dy-jarroo nee my hengey’s arrane y ghoaill jeh dty ghoo: son ta ooilley dt’annaghyn cairagh.

¹⁷³ Lhig da dty laue cooney lhiam: son ta mee er ghoaill dty annaghyn myr reih.

¹⁷⁴ Ghow mee foddeeaght son dty haualtys slayntoil, O Hiarn: as ayns dty leigh ta my haitnys.

¹⁷⁵ O lhig da m’annym ’ve bio, as nee eh uss y voylley: as nee dty vriwnyssyn cooney lhiam.

¹⁷⁶ Ta mee er n’gholl er-shaghryn myr keyrrey chailjey: O cur lhiat thie dty harvaant; son cha vel mee jarrood dty annaghyn.