Psalmyn 112 - Lioar ny Psalmyn 1765 (Pointed)

PSAL. 112. Beatus vir.

¹ Bannit ta’n dooinney ta goaill aggle roish y Chiarn: ta taitnys mooar echey ayns e annaghyn.

² Bee yn sluight echey niartal er y thalloo: bee bannaght gour yn vooinjer ynrick.

³ Bee berchys as palchey ayns e hie: as nee e chairys farraghtyn son dy-bragh.

⁴ Da’n dooinney crauee ta soilshey brishey magh ayns y dorraghys: t’eh myghinagh, graihagh, as cairagh.

⁵ Ta dooinney mie erreeishagh, as coyrt er eeasaght: as nee eh e ghlaare y reill lesh tushtey.

⁶ Son cha bee eh dy-bragh er ny scughey: as bee’n dooinney ynrick freillt ayns cooinaghtyn er son dy-bragh.

⁷ Cha bee eh agglagh jeh drogh naight erbee: son ta e chree shassoo shickyr, as credjal ayns y Chiarn.

⁸ Ta e chree er ny hickyraghey, as cha vaill eh: derrey hee eh e aigney er e noidyn.

⁹ T’eh er skeayley dy-lhean as er choyrt da ny boghtyn: as ta e chairys farraghtyn son dy-bragh; bee’n ennym echey er ny hoiaghey seose lesh ooashley.

¹⁰ Hee yn mee-chrauee eh, as bee eh trimshey da: nee eh snaggeraght lesh e eeacklyn, as lheïe ersooyl; nee yeearree yn vooinjer vee-chrauee cherraghtyn.