Psalmyn 106 - Lioar ny Psalmyn 1765 (Pointed)

EVENING PRAYER. PSAL. 106. Confitemini Domino.

¹ O cur-jee booise da’n Chiarn, son t’eh graysoil: as ta e vyghin farraghtyn son dy-bragh.

² Quoi oddys obbraghyn ooasle y Chiarn y ockley magh: ny ooilley e voylley y hoilshaghey?

³ Bannit t’adsyn ta kinjagh freayll briwnys: as jannoo cairys.

⁴ Cooinee orrym, O Hiarn, cordail rish y foayr shen t’ow d’ymmyrkey gys dty phobble: O jeeagh orryms lesh dty haualtys.

⁵ Dy voddym fakin maynrys dty chloan reiht: as boggey ’ghoaill ayns gennallys dty phobble, as booise y choyrt marish dty eiraght.

⁶ Ta shin er n’yannoo peccah marish nyn ayraghyn: ta shin er chur rish aggair, as er ghellal dy-holk.

⁷ Cha dug nyn ayraghyn tastey da dty yindyssyn ayns Egypt, cha-moo dreill ad dty vieys vooar ayns cooinaghtyn: agh v’ad mee-viallagh ec yn aarkey, dy-jarroo ec y faarkey Jiarg.

⁸ Ny-yeih chooin eh lhieu er graih e Ennym: dy voddagh eh yn phooar echey y hoilshaghey.

⁹ Hug eh saarey da’n aarkey Jiarg myrgeddin, as ve chyrmit seose: myr shen ren eh adsyn y leeideil trooid y diunid, myr trooid yn aasagh.

¹⁰ As haue eh ad veih laue ny tranlaasee: as livrey eh ad veih pooar y noid.

¹¹ As er son adsyn va chionney orroo, choodee ny hushtaghyn ad: cha row unnane oc faagit er-mayrn.

¹² Eisht chred adsyn e ghoan: as ghow ad arraneyn-moyllee huggeysyn.

¹³ Agh ayns gerrit dy hraa yarrood ad ny obbraghyn echey: as cha jinnagh ad ad hene y injillaghey gys e choyrle.

¹⁴ Agh hug ad raad da yeearreeyn mee-reilltagh ayns yn aasagh: as ayns cheer gyn ushtey ren ad Jee y vrasnaghey.

¹⁵ As hug eh daue nyn yeearree: as lesh shoh shangid ayns nyn anmeenyn.

¹⁶ Hug ad corree er Moses neesht ayns ny cabbaneyn: as er Aaron noo yn Chiarn.

¹⁷ Myr shen doshil y thalloo, as slug eh seose Dathan: as choodee eh sheshaght Abiram.

¹⁸ As ren aile brishey magh mastey’n cheshaght oc: as ren y lossey stroie ny mee-chrauee.

¹⁹ Ren ad cummey lheiy ayns Horeb: as hug ad ooashley da’n jalloo lheït.

²⁰ Myr shoh chaghlaa ad nyn ghloyr: gys co-chaslys baagh ta gee faiyr;

²¹ As yarrood ad Jee yn Saualtagh oc: v’er n’yannoo lheid ny reddyn mooarey ayns Egypt;

²² Obbraghyn yindyssagh ayns cheer Ham: as reddyn atchimagh ec y faarkey Jiarg.

²³ Er shoh dooyrt eh, dy jinnagh eh ad y stroie, er-be dy hass Moses e harvaant reiht kiongoyrt rish ayns y vrishey-magh: dy hyndaa ersooyl e yymmoose hrome, nagh jinnagh eh ad y stroie.

²⁴ Dy-jarroo cha ren ad scansh jeh’n cheer eunyssagh shen: cha-moo ren ad credjal ny goan echey;

²⁵ Agh dirree ad magh ayns ny cabbaneyn oc: as cha ren ad geaishtagh rish coraa’n Chiarn.

²⁶ Eisht hrogg eh seose e laue nyn ’oï: dy chur ad naardey ayns yn aasagh;

²⁷ Dy hilgey magh yn sluight oc mastey ny ashoonyn: as dy skeayley ad trooid ny cheeraghyn.

²⁸ Ren ad lhiantyn gys Baal-peor: as die ad ourallyn ny merriu.

²⁹ Myr shoh ghreinnee ad eh gys corree lesh nyn ghrogh obbraghyn: as va’n chramp dewil nyn mast’ oc.

³⁰ Eisht hass Phinehas seose as ghow eh padjer: as myr shen scuirr y chramp.

³¹ As va shen coontit dasyn son cairys: mastey dy-chooilley heeloghe er son dy-bragh.

³² Hug ad corree er myrgeddin ec ushtaghyn y streeu: myr shen dy ren eh Moses y cherraghey kyndagh roosyn.

³³ Er-yn-oyr dy ren ad yn spyrryd echey y vrasnaghey: ayns wheesh as dy loayr eh dy-siyragh lesh e veillyn.

³⁴ Cha-moo stroie ad ny ashoonyn: myr ren y Chiarn ad y haarey.

³⁵ Agh ren ad sheshaght rish ny ashoonyn: as dynsee ad nyn gliaghtaghyn.

³⁶ Ayns wheesh as dy dug ad ooashley da ny jallooyn oc, shoh ren chyndaa gys y toyrt-mow oc hene: dy-jarroo, hebb ad ny mec as ny inneenyn oc gys jouyil;

³⁷ As gheayrt ad yn uill gyn loght; dy-jarroo fuill ny mec as ny inneenyn oc: hebb ad ayns ourallyn gys jallooyn Canaan; as va’n cheer fo mollaght lesh fuill.

³⁸ Myr shoh v’ad fo broïd lesh ny obbraghyn oc hene: as hie ad er maarderys lurg nyn yeearreeyn hene.

³⁹ Shen-y-fa va jymmoose y Chiarn er ny vrasnaghey noi e phobble: ayns wheesh as dy row dwoaie echey er e eiraght hene,

⁴⁰ As livrey eh ad harrish gys laue ny ashoonyn: as v’adsyn va dwoaie oc orroo ny hiarnyn harrystoo.

⁴¹ Ren nyn noidyn tranlaase orroo: as v’ad fo nyn booar.

⁴² Shimmey keayrt ren eh ad y livrey: agh dirree ad magh ny oï lesh nyn goyrlyn hene, as v’ad er nyn injillaghey son nyn olkys.

⁴³ Ny-yeih tra honnick eh nyn seaghyn: ren eh nyn accan y chlashtyn.

⁴⁴ Chooinee eh er e chonaant, as va chymmey echey orroo, cordail rish earroo e vyghinyn: hug eh dy-jarroo orroosyn ooilley va leeideil ad ersooyl ayns cappeeys dy ve erreeishagh daue.

⁴⁵ Livrey uss shinyn, O Hiarn nyn Yee, as chaggil shin veih mastey ny ashoonyn: dy vod mayd booise y chur da dty Ennym casherick, as imraa gloyroil y yannoo jeh dty voylley.

⁴⁶ Bannit dy row yn Chiarn Jee d’Israel veih dy-bragh, as seihll gyn jerrey: as lhig da ooilley’n pobble gra, Amen.