Psalmyn 1 - Lioar ny Psalmyn 1765 (Pointed)

THE FIRST DAY. MORNING PRAYER. PSAL. 1. Beatus vir, qui non abiit.

¹ Bannit ta’n dooinney nagh vel er n’immeeaght ayns coyrle ny mee-chrauee, ny er hassoo ayns raad peccee: as nagh vel er hoie ayns stoyl ny craidoilee;

² Agh ta e haitnys ayns leigh yn Chiarn: as ayns y leigh echeysyn nee eh eh hene y chliaghtey laa as oie.

³ As bee eh myr billey soit rish oirr yn ushtey: ver magh e vess ayns imbagh cooie.

⁴ E ghuillag neesht cha jean fioghey: as jeeagh, cre-erbee t’eh dy yannoo, te cheet lesh.

⁵ Er son ny mee-chrauee, cha vel eh myr shen mâroosyn: agh t’ad goll-rish y choau ta’n gheay dy heebey veih eddin y thallooin.

⁶ Shen-y-fa cha vod ny mee-chrauee shassoo ayns y vriwnys: cha-moo ny peccee ayns chaglym y sleih ynrick.

⁷ Son shione da’n Chiarn raad y sleih cairal: as nee raad ny mee-chrauee cherraghtyn.