Panthaantsi 22 - Ashéninka Perené

¡Pawá! pawá! Paitama pookantanakanari Iwanthaani David Ikinkithasirita Isiya-pithatiri Nintatsiri Iwamairi

¹ ¡Pawá! ¡Pawá! ¿Paitama pookantanakanari? ¿Paita kaari pipokanta piwawisaa-kotajina? ¿Paita kaari pikimantana nasinonkaa-waita?

² ¡Pawá! Nokaima-witami kitaitiri, titzimaita pakina. Nomawitakaro tsitini-paiti, titzimaita nisitakoti,

³ Iro kantacha, tasorintsi pinatzii awiroka, Tima pisaiki awiroka tsika ipanthaa-jiitzi Israel-iiti.

⁴ Awiroka yawintaaka pairani nowaisatziti-payi. Yawintaa-yitakami, pookakaa-winta-yitakiri awiroka.

⁵ Ikowako-takimi pinkisa-wintyaari, pimatakiro pookakaa-winta-yitakiri awiroka. Yawintaa-yitakami awiroka, tikatsi owasiwintaa-waitairini.

⁶ Tima atziri nonawitaka naaka, iro kantacha ikimita-kaita-kanari kinitsi. Oshiki imaninta-waitakina atziri-payi, ithainka-siri-waitakina.

⁷ Isironta-winta-waitakana ikaratzi ñaayitanari, Ithainka-mawai-taitakina, itikaina-waita, ikanta-wakaa-jiitaka:

⁸ “Piñaa-matsitiri awintaariri Pawa. Añaawakiri aririka yamitako-tairi. Tima inkanta-wakaa-jiitajaa oshiki inisironkatari, añaawakiri aririka iwawisaa-kotairi.”

⁹ Tima awiroka kantakaakaro notziman-takari imotyaa-taitakina. Awiroka kantakaakaro nawintaan-tamiri ainiro nothotziro owaaki othomi asitanari.

¹⁰ Awiroka asitakanari tikira-mintha nontzimiita. Ainiro nosaiki omotyaaki asitanari, awiroka Nowawani.

¹¹ Airo pisaika-pithatana intaina, tima okaakitaki nonkimaatsi-waityaa. Tikatsi kisakowintyaanani.

¹² Tima ithonka itzikakina kisaniintanari, ikimitakari ipiyojiita ipiraitari, Isiyakari iyatsimanka poñaachari Kithoki-jaariki, ithonka ishonkasijii-takina.

¹³ Paraanka ikantajiitaka ikaratzi kisaniintanari, Ikimitakari kashikari iwari iwathatsiti, iraikithanthaiki.

¹⁴ Tima nokimitakaro naaka nijaa isakoitziri, Tima ithonka okithoryaa-yitaki notonki. Okimiwai-takaro nasankani owyaata-tyiiyaa, tima ithonka owyaataka inthompointa.

¹⁵ Tima piryaa-kintsi nokantaka, osiyawai-takaro opiryaa-pitokitzi kowitzi. Otsirikaka nonini nopanti-waantiki. Tima pookakina tsika opiryaa-panitzi kipatsi nonkami.

¹⁶ Tima ikimitakari otsitzi ipiyo-winta-jiitakana kaari-pirori, ithonka ishonka-paakina. Imorontawai-takina nakoki aajatzi noitziki.

¹⁷ Oyosiita-sitaka nomisina, koñaa-porokitaki notonki. Oshiki yamina-mintha-takina kisaniintanari.

¹⁸ Ipawakaakaro nomanthaki. Iñaariwintakaro noithaari.

¹⁹ ¡Irooma awiroka Pawa, airo pookana! Awiroka sintsi-takaa-janari. Pimpoki sintziini pinkisa-winta-jyaana.