Isaías 6 - Ashéninka Perené

¹ Ikanta ikamaji pinkathari Uzías, ari iñaakakana Pawa ithointaka jinoki iwinkathari-mintoki, yanaantakaro opatzi iithaari Tasorintsi-panko.

² Tzimatsi inkiti-wiri-payi paamathai-taintsiri yaatzinkaka ipatziitoki Pawa. Otzimimo-tziri 6 isiwanki. Apiti isiwanki ipasika-poro-tantari, apiti ipasikantaka iitziki, apiti yarantari.

³ Iriitaki apiiyapii-tzirori ikaimajiitzi, ikantzi: “¡Tasorintsí! ¡Tasorintsí! ¡Tasorintsi inatzii Pawa Ñaapirori! Iñiitairo maaroni kipatsiki iwaniinkaro.”

⁴ Okanta ikampini-tanaki iñaawaitzi, antaroiti onikanaka asitakoro Tasorintsi-panko, kachaaryiinka okantanaka.

⁵ Ari nokanta-siri-tanaki: ¡Ikanta-machiitana, kamakina! Tima noñaajiri Nowinkathariti Pawa Ñaapirori. Kaari-piro-waantiri nonatzii, nosaiki-motziri kaari-piro-waantiri.”

⁶ Ari ipokasi-tapaakina aparoni inkiti-wiri. Yamakina paamari-minki yaakiri pomitai-rontsiki yairikan-takari yawita-minto.

⁷ Itzinkan-takanaro paamari-minki nopaantiki, ikantana: “Pamini, itsitokakami pipaantiki paamari-minki. Iriitaki apirota-jimironi pikowiinkataki, Ipyaako-tajimiro pikaaripiro-witaka.”

⁸ Nokimatzii iñaawai-tanaki Awinkathariti, ikantzi: “¿Paitama nontyaantiri? ¿Paitama antyaantiri inkamantanti?” Ari nakanakiri naaka, nokantziri: “Naaka pintyaanti.”

⁹ Ari ikantanakina: “Pimatiro, pinkamantiri atziri-payi, pinkantiri: ‘Ari pinkima-wityaa, airotzimaita pikimathatziro. Ari paminawityaa, airotzimaita piñiiro.’

¹⁰ Awiroka kantakai-yaaroni inkiso-siri-tajitan-tyaari, Atsikimpitya inkantaityaa, imawityaakiyiti. Irootaki airo yokichaa-tanta, Airo ikimi, Airo ikimatha-tantaro, Tima airo ikimisantai, airo yawisakotai aajatzi.”

¹¹ Nokantziri: “¡Nowinkatharití! ¿Onkaratika osamaniti pikantakiri?” Ikantzi irirori: “Oshiki osamanitaki, ari asi owiro irojatzi apaata yapiroi-tanta-jyaariri ikaratzi saikatsiri nampitsiki, Tima kaanki-panko onkantajyaa pankotsi-payi, Miritzi-patha onkantajyaa kipatsiki tikatsi tzimatsini.

¹² Nosikaari inkantajyaa atziri-payi, tima naaka Pawa kantakai-yaaroni. Kaanki onkantajyaa nampitsi-payi tikatsi nampita-jyaaroni.

¹³ Intzimi-rika añaanain-tsini, kapichiini inkarati, Ari yapiroi-tajiri aajatzi yokaiti, inkimitai-yaaro itowaitziro inchato, Intowawi-taita-kyaaro inchato irojatzi osaikimaityaa oponkitzi, Irootaki opirini oshootiki-yaanta-jyaari, osiyakaa-wintaro okithoki tasorintsi-tatsiri.”