Isaías 40 - Ashéninka Perené

Piwamiithatainiri Aawinkathariti tsika inkinapaaki

¹ Jiroka ikantzi Piwawani: “Poimosirinka-jiri nasiyitari. Poimosirinka-jiri.

² Pininta-thatiri piñaanatiri Aapatyaawini-satzi. Pinkaman-tairi, pinkantiri: ‘Ari okarata-paaki impira-taitami, ipinako-wintai-takiro pikowiinkataki, Tima imapiro-takimi iwasankitaa-wintzimiro pikaaripirotaki.’ ”

³ Tzimatsi kaimapain-tsini otzisi-masiki, inkantan-tapaaki: Piwamiithatainiri Awinkathariti tsika inkinapaaki. Pinkimi-takaan-tainiri Pawa itampatzikai-tziro awotsi.

⁴ Omamiri-pathatai otinkanaa-yitzi, Owintini-yitaji otzisi, Okaratzi otzisiyitzi iroñaaka Kamitha-pathani onkantajyaa.

⁵ Tima iñaakan-tajiro Pawa iwaniinkaro, inthonka yapatotajyaa atziri-payi iñaajiro. Tima iriitaki Pawa ñaawaitzirori iroka ñaantsi.”

⁶ Ikantaitana: Pinkaimi. Nokantzi naaka: ¿Tsika nonkanti nonkaimi? Pinkanti: Ikimitaro atziri-payi towarisi. Tzimawitacha owaniinkaro, ikimiwaitaro towari otzimi otyaaki.

⁷ Iro kantacha okama-sitzi towari, ipoñaa oparyaa-tyaakitzi, intasonkiro-rika Pawa. Iro isiyari atziri-payi towarisi.

⁸ Okama-sitzi towari ipoñaa oparyaa-tyaakitzi. Irooma iñaani Pawa, asi owairo.

⁹ Kisakowintoni-satzí, pintonkaji otzisiki, pikamantantiro kamiithari ñaantsi. Aapatyaawini-satzí, airo pitharowantaro piñaawaita-nakiro kamiithari ñaantsi. Pinkamantiri nampitarori iipatsitiki Judá-iti, pinkantiri: ¡Yokataki Piwawanitari awirokaiti!

¹⁰ Ariitaka Pawa tzimatsiri isintsinka, Sintsi-pirori inatzi pinkathari Pawa. Yamajiri ikaratzi yasiyitari, yookakaa-wintakiri.

¹¹ Pokaki ikimitakari aamaako-wintariri ipira, ithomaa-yitajiri kiripiri, Iwajiri iniiki, kamiitha yaminajiri owakira yaninita-tsiri.