Sant Matiéu 7 - Lis Evangèli 1903 (Provençal)

CHAPITRE SETEN

Seguido dóu Sermoun sus la mountagno: lou jujamen lemeràri, la prudènci dins la destri-bucioun di causo santo. — Quau prègo emé fe es escouta de Diéu. — La porto dóu paradis es estrecho. — De que biais l'on pòu counèisse li faus proufèto. — Basti sus lou roucas e sus la sablo.

¹ Jugés pas, se voulès pas que vous jujon.

² Car dóu meme biais qu'aurés juja lis autre, sarés juja, e à la mesuro qu'aurés mesura vous mesuraran.

³ Coume vai que veses une paio dins l'uei de toun fraire, e que la fusto qu'as dins l'uei la veses pas?

⁴ O bèn coume pos dire à toun fraire: Laisso, que tire la paio de toun uei, quand as uno fusto dins lou tiéu.

⁵ Ipoucrito, tiro proumié la fusto de toun uei, e alor veiras de tira la paio de l'uei de toun fraire.

⁶ Engardas-vous de douna li causo santo i chin, e jités pas vòsti perlo davans li porc, cregnènço que li chaupinon e que, contro vous se revirant, vous escarchon.

⁷ Demandas, e vous dounaran; cercas, e trouvarés; picas, e vous durbiran.

⁸ Quau que siegue que demando, reçaup; e quau cerco, trovo; e en quau pico, se durbira.

⁹ Tambèn quau es aquéu de vautre que, se soun drole ié demando de pan, i'anara pourgi un caiau?

¹⁰ O se ié demando de pèis, ié semoundra 'no serp?

¹¹ Adounc se vàutri, marrit que sias, sabès douna de bòni causo à vòstis enfant, de quant mai voste Paire d'eilamount dounara li bèn verai à-n-aquéli que ié demandon?

¹² Tout ço que voulès, dounc, que lis ome vous fagon, tambèn vautre fasès-lou à-n-éli: car es acò la Lèi e li Proufèto.

¹³ Intras pèr la porto estrecho, dóumaci es largo la porto, tèn d'espàci la draio que meno à la perdicioun, e n'i'a de bèu que ié passon.

¹⁴ Coume es pichoto la porto, e coume es estrecho la draio que meno à la vido! e n'i'a bèn gaire que la capiton.

¹⁵ Avisas-vous di faus proufèto que vous arribon vesti de móutounino em'acò en dedins soun de loup abrama.

¹⁶ A si fru li couneirés. Anas-ti cueie de rasin sus li roumias o de figo sus de cauco-trepo?

¹⁷ Ansin tout aubre bon fai de bon fru, e tout marrit aubre n'en fai de marrit.

¹⁸ Noun pòu un aubre bon faire de marrit fru, ni un aubre marrit n'en faire de bon.

¹⁹ Tout aubre que noun fara de bon fru, lou couparan e dins lou fiò lou jitaran.

²⁰ Adounc es à si fru que li couneirés.

²¹ Noun es tout aquéu mounde que me dis: Segnour! Segnour! qu'intrara dins lou reiaume celestiau; mai aquéu que fai la voulounta de moun Paire d'eilamount, aquéu-d'aqui intrara dins lou reiaume celestiau.

²² N'i'a forço que me diran, en aquéu jour: Segnour, Segnour, es qu'avèn pas proufetisa en voste noum, en voste noum embandi li demòni, e fa en voste noum que-noun-sai de miracle?

²³ E ié cridarai alor: Vous ai jamai couneigu! retiras-vous de iéu, oubrié d'iniqueta.

²⁴ Tout ome dounc qu'ausis aquéli paraulo que dise e lis óusservo, sara coumparable au sage qu'a basti soun oustau sus la pèiro.

²⁵ A plóugu la raisso, soun vengu li flume, an boufa li vènt e an fa desbord contro aquel oustau: mai a pas toumba, estènt qu'èro establi sus la pèiro.

²⁶ Mai tout ome qu' ausis li paraulo que dise, e lis óusservo pas, sara coume lou pau desèn qu'a basti soun oustau sus la sablo.

²⁷ Em' acò a plóugu la raisso, soun vengu li flume, an boufa li vènt, e fasènt desbord contro aquel oustau, es ana au sòu, que n'es plus esta qu'un gros mouloun de rouino.

²⁸ Or, vous trouvarés, quand Jèsu aguè fini soun parladis, èron tóuti li gènt en amiracioun davans sa dóutrino.

²⁹ Lis ensignavo, dóumaci, coume aguènt tout poudé, e noun à la modo de sis Escribo d'éli e di Farisen.