Sant Matiéu 6 - Lis Evangèli 1903 (Provençal)

CHAPITRE SIEISEN

Seguido dóu Sermoun sus la mountagno: l'óu morno, la preguiero, lou june. — Destacamen di bèn terrèstre e fisanço à la Prouvidènci.

¹ Avisas-vous de pas faire vòsti bònis obro davans lis ome, sus l'estiganço que vous vegon: autramen, aurés ges de recoumpènso encò de voste Paire qu'es dins lou cèu.

² Adounc quouro fas l'óumorno, lou fagues pas troumpeta davans tu, coume lis ipoucrito fan dins li sinagogo e dins li carriero, en visto d'èstre ounoura dis ome. Veramen vous lou dise, au reçaupu sa recoumpènso.

³ Mai tu, quouro fas l'óumorno, que ta man senèco sache pas ço que faita man drecho,

⁴ Pèr que toun óumorno iste dins lou secrèt: e toun Paire, que vèi dins lou secrèt, te lou rendra.

⁵ Tambèn quand pregas, fugués pas coume lis ipoucrito qu'amon de prega, en se tenènt dre dins li sinagogo emai i cantoun di plaço de ciéuta, pèr èstre vist dóu mounde. Veramen vous lou dise, an reçaupu sa recoumpènso.

⁶ Mai tu, quand pregaras, intro dins ta chambro, e, porto sarrado, prègo toun Paire d'escoundoun, e toun Paire, que vèi à l'escoundoun, te lou rendra.

⁷ Dins vòsti prègo parlés pas forço, coume li pagan que s'imaginon, éli, emé soun paraulage, d'èstre escouta.

⁸ Adounc prengués pas eisèmple sus éli; voste Paire saup, dóumaci, ço que vous fai de besoun, avans que ié demandés.

⁹ Adounc veici coume vautre pregarés: Noste Paire que sias dins lou cèu, siegue voste noum santifica.

¹⁰ Que voste règne avèngue. Siegue facho vosto voulounta coume dins lou cèu ansin sus terro.

¹¹ Donnas-nous vuei noste pan pèr viéure.

¹² E remetès-nous nòsti dèute, coume li remetèn nous-autre en quau nous es devènt.

¹³ E noun nous adugués en tentacioun; mai deliéuras-nous dóu mau. Ansin siegue.

¹⁴ Car se perdounas is ome si mancamen, voste Paire celèste vous perdounara peréu à vautre vòsti pecat.

¹⁵ Mai se noun perdounas is ome, voste Paire vous perdounara pas nimai vòsti pecat.

¹⁶ Quand junas, fagués pas li triste coume lis ipoucrito: prenon uno figuro estirado pèr faire vèire au mounde que junon. Veramen vous lou dise, an reçaupu sa recoumpènso.

¹⁷ Mai tu, quouro junes, perfumo-te la tèsto e lavo-te la caro,

¹⁸ Pèr pas faire vèire is ome que junes, mai à toun Paire, qu'es aqui à l'escoundu; e toun Paire, que vèi ço qu'es escoundu, te lou rendra.

¹⁹ Vous acampés pas de tresor sus la terro, que lou rouvi e li verme vous li manjon e li laire li dessousterron e li raubon.

²⁰ Mai acampas-vous de tresor dins lou cèu ounte ni lou rouvi ni li verme li manjon, ounte i'a ges de laire que li dessousterron e li raubon.

²¹ Car ounte i'a toun tresors, aqui peréu i'a toun cor.

²² Toun uei es la làmpi de toun cors. Se toun uei es simple tout toun cors sara luminous.

²³ Mai se toun uei es catiéu tout toun cors sara sourne. Adounc, se la lumiero qu'es en tu es sourniero, de quant sara mai grando la sourniero elo-memo!

²⁴ Degun pòu servi dous mèstre: car n'aura un en òdi e l'autre en afecioun, o bèn prendra li part de l'un e mespresara l'autre. Noun poudès servi Diéu e Manmoun.

²⁵ Amor d'acò vous dise: Fugués pas en pensamen pèr voste cors, saupre coume l'abiharés. La vido, es que vau pas mai que la nourrituro, e lou cors pas mai que lou vièsti?

²⁶ Espinchas lis aucèu de l'èr: noun semenon ni meissounon e n'acampon rèn dins lis òrri; mai voste Paire d'amoundaut lis apasturo. Es que sias pas, vous-autre, bèn mai qu'éli?

²⁷ Quau d'entre-vautre, emé si pensamen, pòu apoundre à sa taio soulamen uno couidado?

²⁸ Perqué tambèn vous lagna raport à voste vièsti? Ousservas coume lis ile de champ fan soun creissènt: ni travaion, ni fielon.

²⁹ E pamens, vous l'afourtisse, Salamoun dins touto sa glòri noun èro abiha coume l'un d'éli.

³⁰ Adounc, s'uno erbo de champ, que vuei es aqui e deman la jitaran dins lou four, Diéu a siuen de la vesti coume acò, de quant aura mai siuen de vàutri, gènt de pau de fe?

³¹ Noun vous metegués dounc en soucit, disènt: Dequé manjaren? dequé béuren! coume nous abiharen?

³² De tout acò-d'aqui li pagan se n'inquieton. Saup, boutas, voste Paire, que de tout acò n'avès besoun.

³³ Cercas dounc proumié lou reiaume de Diéu e sa justiço e tóuti aquéli causo vous vendran pèr dessus.

³⁴ Ansin noun vous metegués en soucit de l'endeman; car l'endeman aura siuen d'éu: chasque jour a proun de soun mau.