Sant Matiéu 28 - Lis Evangèli 1903 (Provençal)

CHAPITRE VINT-E-VUECHEN

Li sànti femo au sepucre. — L'ange e li gàrdi. — Aparicioun de Jèsu. — Li Judiéu dounon d'argènt i gàrdi pèr li faire teisa. Messioun dis Apoustòli.

¹ Mai, fini lou sabat, à l'aubo dóu proumié jour après lou sabat, venguè Marìo Madaleno, emai l'autro Marìo, vèire lou sepucre.

² E tout d'un cop l'aguè 'n grand tremoulun de terro; car un ange dóu Segnour davalè dóu cèu e venguè devessa la pèiro, em' acò se i'assetè dessus.

³ Èro sa fàci coume l'uiau, e soun vièsti coume la nèu.

⁴ De l'esfrai que n'aguèron, li gàrdi atupi n'istèron coume mort.

⁵ Mai, prenènt la paraulo, l'ange diguè i femo: Agués pas pòu, vous-àutri, que, lou sabe, cercas Jèsu qu'es esta clavela.

⁶ I'es plus eici, a ressuscita coume l'avié di. Venès vèire l'endré mounte avien mes lou Segnour.

⁷ E despachas-vous d'ana dire à si disciple, qu'es ressuscita. Veici que prendra li davans en Galilèio; es aqui que lou veirés. Vous vaqui avertido.

⁸ E lèu-lèu sourtiguèron dóu sepucre emé cregnènço e grando joio; e de courre pèr n'en pourta la nouvello à si disciple.

⁹ Or, veici que Jèsu ié venguè au rescontre, disènt: La bono salut! Éli s'aprouchèron, i'embrassèron li pèd e l'adourèron.

¹⁰ Alor Jèsu ié diguè: Agués pas pòu. Anas, e digas à mi fraire que vagon en Galilèio: es aqui que me veiran.

¹¹ Quand fuguèron partido, quàuquis-un di gàrdi venguèron à la vilo e countèron i Prince di prèire tout ço que s'èro passa.

¹² S'acampèron, aquésti, emé lis Ancian; e, après s'èstre counseia, dounèron uno grosso soumo i sóudard,

¹³ En ié disènt: Digas: Si disciple, dins la niue, soun vengu rauba soun cors, enterin que dourmian.

¹⁴ E se lou gouvernour vèn à saupre acò-d'aqui, nautre ié faren entèndre resoun, e vous apararen.

¹⁵ Li sóudard, aguènt pres la soumo, faguèron coume i'èro esta di. E s'es esbrudido ansin la causo encò di Judiéu enjusquo à l'ouro de vuei.

¹⁶ Pamens li vounge disciple s'enanèron en Galilèio, sus la mountagno ounte Jèsu i'avié coumanda de veni.

¹⁷ E tre lou vèire, l'adourèron; quàuquis-un, pamens, fuguèron en doutanço.

¹⁸ E Jèsu, s'avançant, ié parlè coume eiçò: M'es esta douna tout poudé dins lou cèu e sus la terro.

¹⁹ Anas dounc, ensignas tóuti li nacioun, en li batejant au noum dóu Paire e dóu Fiéu e dóu Sant-Esperit;

²⁰ E i'aprenènt à garda touti li causo que vous ai coumandado. E me veici iéu emé vautre, touti li jour, enjusquo à l'acabado di siècle.