Sant Matiéu 24 - Lis Evangèli 1903 (Provençal)

CHAPITRE VINT-E-QUATREN

Proufetisamen sus la rouino dóu Tèmple. — Signe qu'anounciaran la catastrofo de Jerusalèn e la fin dóu mounde. — Se teni revihadis.

¹ Jèsu, estènt sourti dóu tèmple, s'enanavo. Em'acò s'aprouchèron si disciple e ié faguèron óusserva li bastisso dóu tèmple.

² Mai éu, ié respoundènt, diguè: Lou vesès, tout acò-d'aqui? Veramen vous lou dise, sara bèn tant aclapa que noun ié restara pèiro sus pèiro.

³ E coume èro asseta sus la mountagno dis Oulivié, s'aprouchèron d'éu si disciple à la secrèto, en ié disènt: Digas-nous, quouro arribaran aquéli causo? e que signe i'aura de voste avenimen e de l'acabado dóu siècle?

⁴ E Jèsu ié respoundeguè: Avisas-vous que degun vous engane.

⁵ N'i'a forço, dóumaci, que vendran en moun noum, disènt: Es iéu lou Crist! e n'enganaran mai que d'un.

⁶ Ausirés parla de guero e de brut de guerro. Anés pas vous treboula; car acò-d'aqui fau qu'arribe, mai es panca la fin.

⁷ Dóumaci, partiran en guerro pople contre pople e reiaume contro reiaume; e i'aura de pèsto emai de famino, e de terro-tremo en divers rode.

⁸ Mai tout acò-d'aqui sara que lou commençamen di lagno.

⁹ Vous passaran alor pèr li tourment em'acò vous tuaran; e sarés ahi de tóuti li nacioun, raport à moun noum.

¹⁰ Bravamen de gènt alor s'escandalisaran, e lis un lis autre se trahiran, e se vendran en òdi lis un is autre.

¹¹ S'aubourara'n mouloun de faus proufèto qu'enganaran pas mau de mounde.

¹² E'n estènt que i'aura'n abounde d'iniqueta, se refrejara la carita de forço gènt.

¹³ Mai quau aura pèrsevera enjusquo à la fin, aquéu-d'aqui sara sauva.

¹⁴ E se predicara aquest evangèli dóu reiaume dins lou mounde entié, pèr servi de testimoni à tòuti li nacioun; e alor vendra la fin finalo.

¹⁵ Adounc quouro veirés l'abouminacioun de la desoulacioun, anounciado pèr lou proufèto Danié, se teni dins lou liò sant, qu legis coumprengue.

¹⁶ Alor aquéli qu'en Judèio soun, encourron-se vers li mountagno;

¹⁷ Qu es sus sa téulisso noun davale pèr empourta quaucarèn de soun oustau;

¹⁸ Qu es au champ, noun s'entourne pèr carga sa blodo.

¹⁹ Malur is empregnado, emai i femo que nourriran en aquéu tèms!

²⁰ Pregas-que noun arribe vosto fugido en en ivèr o un jour de sabat.

²¹ I'aura, dóumaci, à-n-aquelo epoco, un treboulige di grand, coume n'i'a ges agu dempièi la coumençanço dóu mounde enjusqu'aro e coume n'i'aura plus.

²² E se noun èron acourchi aquéli jour, touto car noun istarié sauvo; mai raport is eligi, saran acourchi aquéli jour.

²³ Alor se quaucun vai vous dire: Vès, es eici lou Crist, o eila, anessias pas lou crèire.

²⁴ Car s'aubourara de faus crist e de faus proufèto, e faran de meraviho grando, de causo espetaclouso, qu'auran pèr se ié troumpa, se se poudié, meme lis elegi.

²⁵ Vaqui, vous ai averti.

²⁶ Adounc, se vous dison: Vès-lou, es dins li mèmbre de l'oustau! n'en creigués rèn.

²⁷ Car coume un uiau fisco dóu levant e lampejo fin-qu'au tremount, ansin sara peréu l'avenimen dóu Fiéu de l'ome.

²⁸ Ounte que siegue lou cors, aqui s'acamparan lis aiglo.

²⁹ Tout-d'un-tèms passa lou treboulèri d'aquéli jour, lou soulèu vendra escur, la luno fara plus lume, lis estello cabussaran dóu cèu e li vertu celestialo saran en bourroulo.

³⁰ E alor pareira lou signe dóu Fiéu de l'ome dins lou fiermamen; em' acò se doulentaran tóuti li pople de la terro; e veiran lou Fiéu de l'ome veni sus li niéulo dóu cèu em' uno poutesta di grando e 'no grando majesta.

³¹ E mandara sis ange qu'emé la troumpeto e 'no voues restountissènto, arrabaiaran lis elegi di quatre vènt e d'un bout à l'autre bout di cèu.

³² Coumprenès eiçò pèr la parabolo de la figuiero. Quouro li brout soun encaro tèndre e que la fueio a sourti, sabès que l'estiéu es pas liuen;

³³ Ansin vautre, se 'n-cop veirés tóuti aquéli causo, sachés qu'es aqui lou Fiéu de l'ome à voste lindau.

³⁴ Veramen vous lou dise, aquesto raço d'eici noun passara pas, d'aqui-que tout-acò se fague.

³⁵ Lou cèu e la terro passaran, mai mi paraulo à iéu noun passaran.

³⁶ D'aquéu jour e d'aquelo ouro res n'a couneissènço, pas meme lis ange de paradis; i'a rèn que lou Paire.

³⁷ Or, ço qu'arribè dóu tèms de Nouvè, arribara peréu à l'avenimen dóu Fiéu de l'ome.

³⁸ De meme que li jour de davans l'endoulible, lis ome manjavon e bevien, se maridavon e maridavon si chato, enjusquo au jour ounte Nouvè intrè dins l'archo;

³⁹ E que sachèron rèn, d'aqui-que venguèsse l'endoulible e lis empourtèsse tóuti, ansin aura d'èstre à l'avenimen dóu Fiéu de l'ome.

⁴⁰ Alor dous ome saran dins uno terro: l'un sara pres, e l'autre leissa;

⁴¹ Dos femo moulinaran à soun moulin: l'uno sara presso, e l'autro leissado.

⁴² Vihas dounc, que sabès pas à queto ouro voste Segnour vendra.

⁴³ Sachés bèn eiçò, se couneissié, lou paire de famiho, à queto ouro lou larroun dèu veni, viharié osco seguro, e noun leissarié trauca soun oustau.

⁴⁴ Adounc, vàutri tambèn, fugués lèst, dóumaci à l'ouro que n'en sabès rèn, lou Fiéu de l'ome vendra.

⁴⁵ Quau es, à vosto estimo, lou serviciau fidèu e avisa, que soun mèstre l'a 'stabli sus si gènt pèr ié douna soun recate au tèms vougu?

⁴⁶ Benurous aquéu serviciau qu'entre arriba, soun mèstre lou trouvara 'nsin à soun travai!

⁴⁷ Veramen vous lou dise, éu sus tóuti si bèn l'establira.

⁴⁸ Mai s'es marrit, aquéu serviciau e que se digue dintre éu: Moun mèstre es pancaro à la vèio de veni!

⁴⁹ E que se boute à pica si coulègo, e mange e begue emé lis ibrougno,

⁵⁰ Vendra lou mèstre d'aquéu servitour, dins lou jour que se i'espèro pas, e à l'ouro que n'en saup rèn;

⁵¹ Em' acò lou separara e lou boutara 'mé lis ipoucrito. Aqui i'aura de plour e de crussimen de dènt.