Sant Matiéu 19 - Lis Evangèli 1903 (Provençal)

CHAPITRE DÈS-E-NOUVEN

Sus lou mariage e la viergineta. — Noste-Segne benesis lis enfantoun. — Un fiéu de famiho forço riche retengu pèr l'estaco di richesso. — Recoumpènso d'aquéli qu'aban-dounon tout pèr l'amour de Jèsu-Crist.

¹ Se devinè que Jèsu, acabado aquéli predicanço, s'enanè d'en Galilèio e venguè sus li counfigno de Judèio, de la man dela dóu Jourdan.

² De moulounado de pople l'acoumpagnèron, e ié gariguè de mounde.

³ Alor s'aprouchèron d'éu, li Farisen, pèr lou prouva, e ié diguèron: Es-ti permés à l'ome de quita sa mouié pèr que que siegue?

⁴ Éu ié respoundeguè, disènt: Avès pas legi qu'Aquéu que creè l'ome dins lou coumençamen, li creè mascle e femèu, e que diguè:

⁵ Amor d'acò, l'ome quitara soun paire e sa maire e s'estacara à sa mouié, e saran dous en uno car?

⁶ Ansin soun plus dous, mai uno souleto car. Que l'ome dounc noun dessepare ço que Diéu a joun ensèn.

⁷ Éli ié venguèron: Coume vai alor que Mouïse a coumanda que se dounèsse à la femo un ate de divòrci e que pièi l'enmandèsson?

⁸ Éu ié respoundeguè: Pèr l'encauso de la dureta de voste cor, Mouïse vous a permés d'enmanda vòsti mouié; mai au coumençamen acò 'ro pa 'nsin,

⁹ Tambèn vous lou dise, aquéu qu'enmando sa mouié, franc d'un cas d'infidelita, fai un adultèri, emai aquéu qu'espouso la femo enmandado fai un adultèri?

¹⁰ Si disciple ié venguèron: S'es ansin la pousicioun de l'ome à respèt de sa mouié, es pa 'n-de-bon de se marida.

¹¹ Éu ié respoundeguè: Es pas tout lou mounde que coumpren aquelo paraulo, mai soulamen aquéli que i'es esta douna?

¹² I'a d'enuque, dóumaci, que sa maire lis a fa coume acò, e i'a d'enuque que lou soun pèr l'obro dis ome, e i'a d'enuque que se lou soun fa pèr amor dóu reiaume celestiau. Qu pòu coumprendre, coumprengue!

¹³ Ié presentèron alor de pichot, sus l'estiganço que i' impausèsse li man e preguèsse pèr éli. Or, li disciple li rambaiavon.

¹⁴ Mai Jèsu ié diguè: Leissas aquéli pichot, e lis empachés pas de veni vers iéu; car lou reiaume celestiau es à-n-aquéli que ié sèmblon.

¹⁵ E i'aguènt impausa li man, s'enanè d'aqui.

¹⁶ E veici qu'un jouvènt s'avancè e ié diguè: Bon Mèstre, que me faudra faire de bon pèr avé la vido eternalo?

¹⁷ Jèsu respoundeguè: Perqué me questiounes sus ço qu'es bon? De bon i'a que Diéu. Se vos intra dins la vido, óusservo li coumandamen.

¹⁸ Quénti? éu ié venguè. Jèsu diguè: Noun tuaras; Faras ges d'adultèri; Noun raubaras; Faus testimòni noun diras;

¹⁹ Ounouro toun paire e ta maire; e amaras toun prouchan coume tu-meme.

²⁰ E ié faguè lou jouvènt: Tout acò-d'aqui l'ai óusserva despièi moun enfanço; dequé me manco mai?

²¹ Ié diguè Jèsu: Se vos èstre perfèt, filo, vènde tout ço qu' as e douno-lou i paure, qu'auras un tresor eilamoundaut; vène pièi e seguisse-me.

²² Mai entre avé ausi aquelo paraulo, s'enanè triste, lou jouine-ome: avié, dóumaci, tout un mouloun de bèn.

²³ Or, Jèsu diguè à si disciple: Veramen vous lou dise, sara mal-eisa pèr lou riche d'intra dins lou reiaume de paradis.

²⁴ Vous lou tourne à dire, es mai facile à-n-un camèu de passa pèr lou trau d'uno aguïo qu' à-n-un riche d'intra dins lou reiaume celestiau.

²⁵ D'entèndre acò-d'aqui, li disciple n'en fuguèron bravamen estouna, e disien: Quau pourra dounc èstre sauva?

²⁶ Mai Jèsu, lis' agachant, ié diguè: Acò 's impoussible is ome; mai pèr Diéu tout es poussible.

²⁷ Alor, prenènt la paraulo, Pèire ié faguè: Vesès que nautre avèn tout abandouna e vous avèn segui; dequé i'aura dounc pèr nautre?

²⁸ Jèsu ié respoundeguè: Veramen vous lou dise, vàutri que m'avès segui, se 'n-cop vendra la regeneracioun, que s'assetara lou Fiéu de l'ome sus lou trone de sa glòri, sarés tambèn vautre asseta sus douge trone, que jujarés li douge tribu d'Israèl.

²⁹ E quau que siegue qu' aura quita soun oustau, o si fraire, o si sorre, o soun paire, o sa mouié, o sis enfant, o si terro, pèr l'encauso de moun noum, reçaupra lou centuple, e aura 'n poussessioun la vido eternalo.

³⁰ Mai n'i'a de bèu que, de proumié, devendran li darrié; e di darrié, forço que saran li proumié.