Sant Matiéu 18 - Lis Evangèli 1903 (Provençal)

CHAPITRE DÈS-E-VUECHEN

L'escandale, acò 's un mau afrous. — La fedo esmarrado. — Courreicioun entre fraire. — Oubeïssènço à la Glèiso. — Lou perdoun dis injùri: parabolo dóu debitour despietadous.

¹ D'aquéu moumen, s'avancèron li disciple vers Jèsu, disènt: Quau es, à voste vejaire, lou mai grand dins lou reiaume celestiau?

² Jèsu, aguènt souna 'n pichot, lou boutè au mitan d'éli,

³ E diguè: Veramen vous lou dise, se noun vous counvertissès e se noun venès coume d'enfantoun, intrarés pas dins lou reiaume celestiau.

⁴ Amor d'acò, quau se fara umble coume aquéu pichounet, sara lou mai grand dins lou celèste reiaume.

⁵ E qu reçaup un pichot coume aquéu en moun noum, me reçaup iéu.

⁶ Mai aquéu qu'escandaliso un d'aquéli pichoun qu'en iéu an fe, miés vaudrié pèr éu que ié pendoulèsson au còu uno pèiro mouniero e lou prefoundeguèsson alin dins la mar.

⁷ Malur au mounde, raport is escandale! Car es forço fourçado qu'arribe d'escandale; mai malur à l'ome que de l'escandale n'es l'encauso.

⁸ Adounc se ta man o toun pèd t'escandaliso, coupo-m'acò e jito-lou liuen de tu: t'es mai en-de-bon d'intra dins la vido manchet o goi, que d'avé dos man o dous pèd e d'èstre jita dins lou fiò ete nau.

⁹ E se toun uei t'escandaliso, derrabo-lou e jito-lou liuen de tu: t'es mai en-de-bon d'intra rèn qu'em' un uei dins la vido que d'èstre debaussa, en aguènt dous uei, dins la dano dóu fiò.

¹⁰ Dounas-vous siuen de pas mespresa un d'aquéli pichounet; car, vous lou dise, sis ange eilamoundaut veson de-longo la fàci de moun Paire qu'es dins lou cèu.

¹¹ Es vengu, en efèt, lou Fiéu de l'ome, sauva ço qu'èro perdu.

¹² Dequé vous cresès? Se 'n ome a cènt bèsti d'avé, e que n'en perde soulamen uno, es que laisso pas li nounanto-nòu sus li mountagno, pèr se metre en bousco d'aquelo qu'es esmarrado?

¹³ E se s'encapo que la trove, veramen vous lou dise, n'a mai de gau que di nounanto-nòu que noun se soun esmarrado.

¹⁴ Ansin de voste Paire qu'es dins lou cèu; es pas sa voulounta qu'un soulet d'aquéli pichounet perigue.

¹⁵ Se toun fraire s'es manca envers tu, vai lou trouva e repren-lou à despart, rèn que tu em' éu. Se t'escouto, auras gagna toun fraire.

¹⁶ Mai se t'escouto pas, pren encaro uno o dos persouno emé tu, pèr que tout l'afaire s'adoube en presènci de dous o tres testimòni.

¹⁷ Se lis escouto pas, digo-lou à la Glèiso; e s'escouto pas la Glèiso, que siegue pèr tu coume un pagan e un publican.

¹⁸ Veramen vous lou dise, tout ço que liarés sus la terro sara lia tambèn dins lou cèu, e tout ço que desliarés sus la terro, sara deslia tambèn dins lon cèu.

¹⁹ Tourna-mai vous dise que se dous d'entre vautre s'entèndon sus la terro, que que demandon, l'óutendran de moun Paire qu'es dins lou cèu.

²⁰ Car ounte se devino dos o tres persouno acampado en moun noum, siéu aqui au mitan d'éli.

²¹ Alor Pèire, d'éu s'avançant, diguè: Mèstre, se 'n-cop moun fraire pecara contro iéu, quant de cop lou perdounarai? Sara proun de sèt cop?

²² Ié venguè Jèsu: Noun te dise sèt cop, mai setanto cop sèt cop.

²³ Vaqui perqué an coumpara lou reiaume de paradis à-n-un rèi que vouguè faire rèndre comte à si serviciau.

²⁴ Em' acò, aguènt cournença de culi li comte, i'aduguèron un ome que ié devié dès milo talént.

²⁵ Mai coume avié pas pèr li rèndre, soun mèstre coumandè que lou vendeguèsson éu, sa mouié e sis enfant emai touto sa chabènço, pèr paga soun dèute.

²⁶ Or, aquéu serviciau, se jitant au sòu, lou suplicavo e ié disié: Agués paciènci de m'espera, e tout moun dèute vous pagarai.

²⁷ Lou mèstre d'aquéu serviciau n'aguè pieta, lou leissè parti e ié faguè gràci de soun dèute.

²⁸ Mai, pas pulèu sourti, aquest serviciau rescontro un de si coulègo que i'èro devènt cènt denié, e l'aguènt empougna l'estranglavo quàsi, en ié disènt: Pago ço que dèves.

²⁹ Se jitant pèr sòu, soun coulègo lou suplicavo e ié disié: Agues paciènci de m'espera e tout moun dèute te pagarai.

³⁰ Mai éu diguè de noun, em' acò s'enanè e lou faguè garda en presoun, d'aqui-que paguèsse ço que devié.

³¹ De lou vèire ansin agi, lis àutri serviciau n 'aguèron un gros pegin; anèron trouva soun mèstre e ié countèron tout ço que venié de se passa.

³² Alor soun m èstre lou sounè e ié diguè: O varlet catiéu, t'ai tengu quite en plen de toun dèute, perqué me n'as prega;

³³ Auriés pas degu, tu tambèn, avé pieta de toun cambarado, coume ai agu, iéu, pieta de tu?

³⁴ E tout en coulèro lou mèstre l'abandounè i justicié, d'aqui-que paguèsse tout ço que devié.

³⁵ Ansin moun Paire celèste vous tratara, se cadun de vautre noun perdouno soun fraire dóu founs dóu cor.