Sant Matiéu 12 - Lis Evangèli 1903 (Provençal)

CHAPITRE DOUGEN

Jèsu rambaio li Farisen sus la questioun dóu Sabat. — Mansuetudo dóu Messìo. — L'endemounia tucle e mut: blasfème di Farisen e responso de Jèsu. — Pecat contro lou Sant-Esperit. — Signe de Jounas. — Titre de glòri d'aqu li que fan lou bon voulè de Diéu.

¹ En aquéu tèms, s'enanavo Jèsu à travès blad, un jour de sabat; em'acò si disciple, estènt qu' avien fam, se boutèron à culi quàuquis espigo e li mangèron.

² Li Farisen, vesènt acò, ié diguèron: Vès, vòsti disciple que fan ço que noun es permés de faire, li jour de sabat.

³ Mai éu ié respoundeguè: Avès pas legi ço que faguè Dàvi, un jour qu' avié fam, éu em'aquéli que l'acoumpagnavon?

⁴ Coume intrè dins l'oustau de Diéu e mangè li pan de proupousicioun, que n'avié pas lou dre, éu, de li manja, nimai aquéli qu'èron em'éu, senoun li prèire, éli soulet?

⁵ O bèn avès pas legi dins la lèi que, li jour de sabat, li prèire tremancon lou sabat dins lou tèmple, e pamens de fauto n'en fan ges?

⁶ Or vous lou dise à vautre, i'a quaucun de mai grand que lou tèmple, eici.

⁷ Se coumprenias aquelo paraulo: «Es la misericòrdi que vole e noum lou sacrifice,» aurias jamai coundana d'innoucènt.

⁸ Car lou Fiéu de l'ome es mèstre meme dóu sabat.

⁹ Estènt parti d'aqui, venguè dins sa sinagogo d'éli;

¹⁰ E ié trouvè 'n ome qu' avié 'no man entre-secado. Em' acò éli lou questiounavon, disènt: Es permés de gari, li jour de sabat? e acò-d'aqui sus l'estiganço de l'acusa.

¹¹ Mai éu ié respoundeguè: Quau es aquéu de vautre qu'en aguènt uno fedo, se vèn à cabussa dins un cros, un jour de sabat, noun l'aganto e noun la davero?

¹² De quant vau mai un ome qu'uno bedigo! es dounc permés d'èstre bèn-fasènt li jour de sabat.

¹³ Sus acò, diguè à-n-aquel ome: Alongo ta man. Éu l'alounguè, e devenguè sanico coume l'autro.

¹⁴ Èron pamens sourti li Farisen e tenien counsèu contro éu pèr trouva lou biais de lou perdre.

¹⁵ Mai Jèsu, lou sachènt, s'aliunchè d'aqui; n'i' aguè forço que l'acoumpagnèron, e li gariguè tóuti,

¹⁶ E ié, recoumandè que lou dessoutèsson pas,

¹⁷ Pèr que se coumpliguèsse aquesto dicho dóu proufèto Isaìo:

¹⁸ Veici moun servidou qu'ai chausi, moun bèn-ama que tant fai gau à moun amo. Farai repausa moun Esperit sus éu, e anounciara la justiço i nacioun.

¹⁹ Noun disputara, nimai cridara, e degun ausira sa voues sus li plaço.

²⁰ Embregara pas lou canèu deja rout, e lou blest que fumejo encaro, éu noun l'amous-sara, d'aqui-que fague triounfla la justiço.

²¹ E li nacioun en soun noum esperaran.

²² Alor ié presentèron un endemounia qu'èro avugle e mut, em'acò lou gariguè, de maniero que parlavo e ié vesié.

²³ Tout lou mounde n'èro espanta. Aquéu-d'aqui, fasien, es pas lou fiéu de Dàvi?

²⁴ Li Farisen, ausènt acò, diguèron: Aquéu, n'es que pèr la vertu de Belzebut, prince di demòni, que coucho li demòni.

²⁵ Mai Jèsu, couneissènt si pensado, ié diguè: Tout reiaume contro éu-meme divisa sara dins la desoulacioun; e touto vilo o touto oustalado contro éli-memo divisado restaran pas drecho.

²⁶ Or, se Satan coucho Satan, es contro éu-meme divisa: coume dounc soun reiaume pourra teni?

²⁷ E se iéu, es au noum de Belzebut qu'embandisse li demòni, au noum dé quau vòsti fiéu lis embandisson? Amor d'acò saran éli-meme vòsti juge.

²⁸ Au contro, s'es pèr l'Esperit de Diéu que couche li demòni, provo qu'es deja vengu au mitan de vautre lou reiaume de Diéu.

²⁹ Coume pòu quaucun intra dins l'oustau dóu fort e piha tóuti sis eisino, s' a pas siuen proumié d'estaca lou fort? après, pourra 'nsin ié piha soun oustau.

³⁰ Quau noun es emé iéu, es contro iéu; e quau emé iéu noun acampo, escampiho.

³¹ Vaqui perqué vous dise: Tout pecat e tout blasfème sara remés is ome; mai lou blasfème contro lou Sant-Esperit sara pas remés.

³² Quau que siegue qu'aura parla contro lou Fiéu de l'ome, acò ié sara remés; mai aquéu qu' aura parla contro lou Sant-Esperit, noun ié sara remés ni dins aquest siècle, ni dins lou siècle avenidou.

³³ O bèn digas que l'aubre es bon e que n'es bon lou fru; o digas que l'aubre es marrit, e marrit soun fru: car es à sa frucho que l'aubre se counèis.

³⁴ Raço de vipèro, coume poudès dire de bòni causo, estènt que sias marrit? car d'aboundànci de cor la bouco s'emparaulo.

³⁵ L'ome qu'es bon tiro d'un bon tresor de bòni causo; e lou qu'es marrit, d'un marrit tresor, n'en tiro de marrido.

³⁶ Vous avertisse que de touto paraulo inutilo qu'auran dicho, lis ome n'en rendran comte au jour dóu jujamen.

³⁷ Car es raport à ti paraulo que saras justifica; raport à ti paraulo que saras coundana.

³⁸ A-n-aquéu moumen, quàuquis-un dis Escribo e di Farisen ié venguèron: Mèstre, voudrian vèire un signe de vous.

³⁹ Mai ié respoundeguè: Aquelo generacioun cativo e adultro demando un signe, e de signe n'i'en sara douna ges d'autre que lou signe dóu proufèto Jounas.

⁴⁰ Efetivamen, coume Jounas istè dins lou vèntre de la baleno tres jour e tres niue, ansin lou Fiéu de l'ome istara tres jour e tres niue au dintre de la terro.

⁴¹ Lis ome de Ninivo s'aubouraran au jujamen em' aquesto generacioun d'aqui e la coundanaran, car faguèron penitènci à la predicacioun de Jounas: e pamens i'a quaucun mai que Jounas, eici.

⁴² La rèino dóu Miejour s'aubourara au jujamen em' aquelo generacioun d'aqui e la coundanara, car venguè dóu fin founs de la terro pèr ausi la sapiènci de Salamoun: e pamens i'a quaucun mai que Salamoun, eici!

⁴³ Quouro l'esperit inmounde a sourti d'un ome, vai barrulant pèr li rode acampestri, en cerco de repaus, e n'en trovo ges.

⁴⁴ Alor se dis: Tournarai à moun oustau que n'en siéu sourti. E ié revenènt lou trovo vacant, bèn escouba e para.

⁴⁵ Em' acò s'envai e pren à sa coumpagno sèt àutris esperit mai marrit qu'éu; e i'intrant fan aqui sa démouranço: e lou darrier estamen d'aquel ome devèn pièje que lou proumié. Ansin sara pèr aquelo generacioun marridasso.

⁴⁶ Coume parlavo encaro au pople, i'aguè sa maire e si fraire aqui deforo, que ié voulien dire quaucarèn.

⁴⁷ E n'i'aguè un que ié venguè: Vès, i'a vosto maire e vòsti fraire que soun deforo e vous cercon.

⁴⁸ Mai éu respoundeguè à-n-aquéu que parlavo: Quau es ma ma maire? e quau soun mi fraire?

⁴⁹ Em' acò estendènt sa man vers si disciple, diguè: Vaqui ma maire e mi fraire.

⁵⁰ Efetivamen, quau fai la voulounta de moun Paire qu'es dins lou cèu, aquéu-d'aqui es moun fraire e ma sorre e ma maire.