Sant Matiéu 11 - Lis Evangèli 1903 (Provençal)

CHAPITRE VOUNGEN

S. Jan mando si disciple vers Jèsu. — Jèsu lauso S. Jan davans lou pople. — Tóuti dous rèston incoumprés di Judiéu. — Malavalisco li vilo impenitènto! — Lou jou de Noste Segne es suau.

¹ E vous trouvarés qu'uno fes acabado aquéli recoumandacioun à si douge disciple, Jèsu s'enanè d'aqui pèr ensigna e predica dins li vilo dóu vesinage.

² Alor Jan, qu' avié aprés dins sa presoun tout ço que fasié lou Crist, ié mandè dous de si disciple,

³ Pèr ié dire: Sias-ti, vous, aquéu que dèu veni, o bèn esperan quaucun mai?

⁴ E pèr responso Jèsu ié diguè: Anas e countas à Jan ço qu'avès ausi e vist.

⁵ Lis avugle veson, li goi caminon, li ladre soun gari, li paure soun evangelisa;

⁶ E benurous qu noun s'escandalisara de iéu.

⁷ E dins lou tèms que s'entournavon, Jèsu se boutè à parla de Jan au pople coume eiçò: Dequé sias ana vèire au desert? un canèu gangassa pèr lou vènt?

⁸ Mai dequé sias ana vèire? un ome mouledousamen vesti? Vesès de gènt ansin vesti dins lis oustau di rèi.

⁹ Mai dequé sias ana vèire? un proufèto? O, vous lou dise, e bèn mai qu'un proufèto!

¹⁰ Es d'éu qu' an escri: Veici que iéu mande moun ange davans ta fàci pèr alesti ta draio davans tu.

¹¹ Veramen vous lou dise, de tóuti aquéli que soun na de la femo, n'a ges pareigu d'autant grand que Jan-Batisto; pamens, lou pu pichot dins lou reiaume celèste es mai grand qu'éu.

¹² Or, desempièi li jour de Jan-Batisto enjusqu' aro, lou reiaume celèste se pren d'assaut e 's li vióulènt que l'emporton.

¹³ Car tóuti li proufèto emai la Lèi, enjusquo à Jan, an proufetisa;

¹⁴ E se lou voulès coumprene, es éu aquel Elìo que dèu veni.

¹⁵ Qu a d'auriho pèr entèndre, entènde.

¹⁶ En quau ressèmblo, vous dirai, la generacioun d'aro? ressèmblo i pichot, asseta sus la plaço, que cridon à si cambarado,

¹⁷ E ié fan: Vous avèn canta e n'avès pas sauta; e nous sian doulouira, mai noun avès ploura.

¹⁸ Efetivamen es vengu Jan que ni manjavo ni bevié, em' acò dison: Es endemounia.

¹⁹ Lou Fiéu de l'ome es vengu que manjavo e bevié, e dison éli: Acò 's un galavard, un chourlaire de vin, que vai coutrìo emé li publican e li pecadou. Mai es estado justificado, la Sagesso, pèr sis enfant.

²⁰ Alor coumencè de charpa li vilo ounte avié coumpli un mouloun de miracle, em' acò n'avien rèn fa penitènci.

²¹ Malavalisco tu, Gourouzaïn! malavalisco tu, Beisaïdo! doumaci se s'èron coumplido à Tir emai à Sidoun li meraviho que se soun coumplido en vous, i' a de tèms qu'aurien fa penitènci, éli, dins la saco e lou cèndre.

²² Amor d'acò, tenès-vous-lou pèr di: Tir e Sidoun saran mai perdounable que vous, au jour dóu jujamen.

²³ E tu, Cafarnaoun, te creses qu'enjusquo au cèu t'enaussaras? degoularas au founs de l'infèr, pèr-ço-que se li meraviho que se soun coumplido en tu l'èron estado à Soudomo, aquesto belèu sarié 'ncaro drecho à l'ouro d'encuei.

²⁴ Amor d'acò, vous lou dise, la terro de Soudomo sara mai perdounablo que tu, au jour dóu jujamen.

²⁵ A-n-aquelo ouro, Jèsu parlè coume eiçò: Te rènde glòri, o Paire, Segnour dóu cèu e de la terro, perqué as escoundu aquéli causo i sage em'i prudènt e lis as revelado i pichoun.

²⁶ O, Paire, car t'a plaigu qu' acò fuguèsse ansin.

²⁷ Tóuti aquéli causo me lis a messo en man, moun Paire; e res counèis lou Fiéu, senoun lou Paire, coume res counèis lou Paire, senoun lou Fiéu emai aquéu que lou Fiéu i'aura vougu revela.

²⁸ Venès me trouva, tóuti vàutri que sias dins la lagno e souto lou fais, e vous refarai, iéu.

²⁹ Cargas moun jou e aprenès de iéu que siéu dous emai umble de cor, e trouvarés lou repaus pèr vòsti amo;

³⁰ Car es dous moun jou e lóugié moun fais.