Sant Matiéu 10 - Lis Evangèli 1903 (Provençal)

CHAPITRE DESEN

Noum e messioun di douge aposto. — Jèsu ié fai si recoumandacioun. — I' anóuncio de persecucioun e ié proumet de recoumpènso.

¹ Aguènt Jèsu counvouca si douge disciple, ié dounè poudé sus lis esperit inmounde, pèr li foro-bandi e pèr gari tout mal-èstre e touto malautié.

² Di douge apoustòli vès-eici li noum: lou proumié, Simoun, que ié dison Pèire, e Andriéu soun fraire;

³ Jaque de Zebediéu e Jan soun fraire; Felip e Bartoumiéu, Toumas e Matiéu lou publican, Jaque d'Aufiéu e Tadiéu;

⁴ Simoun lou Cananen e Judas l'Escariot, aquéu que lou trahiguè.

⁵ Aquéli douge d'aqui, Jèsu li mandè en ié fasènt aquésti recoumandacioun: Anés pas encò di Gentiéu, e metegués pas lou pèd dins li vilo di Samaritan;

⁶ Mai anas pulèu vers li fedo perdudo de l'oustau d'Israèl.

⁷ Anas-vous-en e predicas, disènt: Es proche lou reiaume de paradis.

⁸ Garissès lis infierme; ressuscitas li mort; li ladre, rendès-lèi net; li demòni, epibandis-sès-lèi. A gratis avès reçaupu, dounas à gratis.

⁹ Noun vous metegués en peno d'avé d'or e d'argènt ni d'arbiho dins vòsti centuro;

¹⁰ Ni uno biasso pèr la routo, ni dos raubo, nimai ùni soulié o 'n bastoun: car merito lou travaiadou que lou nourrigon.

¹¹ En que vilo o vilage qu' intrés, entre-vas-vous quau i' a de digne e restas encò d'éu d'aqui-que vous enanés.

¹² Tre intra dins l'oustau, saludas-lou en disènt: Pas à-n-aquel oustau.

¹³ E se veramen aquel oustau n'es digne, vosto pas sus éu vendra; mai se n'es indigne, vosto pas tournara vers vous.

¹⁴ Quand quaucun voudra pas vous reçaupre ni ausi vòsti paraulo, sourtès d'aquel oustau o d'aquelo vilo, e 'spóussas la pòusso de vòsti pèd.

¹⁵ Veramen vous lou dise, au jour dóu jujamen, saran mai espargnado Soudomo e Goumorro qu'aquéli vilo d'aqui.

¹⁶ Veici que vous mande coume d'agnello au mitan di loup. Adounc fugués prudènt coume li serp, e simple coume li couloumbo.

¹⁷ Avisas-vous dis ome: car vous citaran davans si tribunau, e dins si sinagogo vous flagelaran;

¹⁸ E sarés mena encò di gouvernour e di rèi, pèr l'encauso de iéu, e ié servirés de testimòni à-n-éli emai i nacioun.

¹⁹ Quouro vous citaran, vous metegués pas en peno de coume parlarés o de ço que dirés: vous vendra sus lou moumen ço que devès dire;

²⁰ Dóumaci es pas vàutri que parlas, mai l'Esperit de voste Paire que parlo en vautre.

²¹ Pamens lou fraire menara soun fraire la mort, e lou paire soun fiéu; se reviraran lis enfant contro si parènt e li faran mouri.

²² E sarés abourri de tóuti, raport à moun noum; mai aquéu que tendra bon enjusqu'au bout, sara sauva.

²³ Quouro vous persecuton dins uno vilo, fugissès dins uno autro. Veramen vous lou dise, aurés pas fa lou tour di vilo d'Israèl, davans que vèngue lou Fiéu de l'ome.

²⁴ Noun es lou disciple au-dessus dóu mèstre, nimai lou varlet au-dessus de soun segnour.

²⁵ Ié sufis au disciple que siegue coume soun mèstre, e au varlet coume soun segnour. Se lou Paire de famiho, l'an trata de Belzebut, de que trataran pas si serviciau?

²⁶ Adounc agués pas pòu d'éli: i'a rèn d'escoundu que noun siegue descata, rèn de secrèt que noun siegue couneigu.

²⁷ Ço que vous dise dins l'escuresino, digas-lou en plen jour; e ço que vous boufon à l'auriho, predicas-lou sus li téulisso.

²⁸ Li cregnigués pas aquéli que tuon lou cors, e noun podon tua l'amo; mai pulèu cregnès aquéu que vous pòu perdre cors e amo dins l'infèr.

²⁹ Dous passeroun es que se vèndon pas un as? e pamens n'en debano pas-un sus terro, sènso que voste Paire lou vogue.

³⁰ Meme li péu de vosto tèsto soun tóuti coumta.

³¹ Adounc cregnigués tèn: sias bèn meiour que la passerounaio, vautre.

³² Quau me counfessara davans lis ome, lou counfessarai iéu davans moun Paire qu'es dins lou cèu;

³³ Mai quau m'aura renouncia davans lis ome, lou renounciarai iéu davans moun Paire qu'es dins lou cèu.

³⁴ Anés pas vous crèire que siéu vengu adurre la pas sus la terro; noun siéu vengu adurre la pas, mai l'espaso.

³⁵ Car siéu vengu dessepara l'ome d'emé soun paire, e la fiho d'emé sa maire, e la noro d'emé sa sogro;

³⁶ E l'ome aura pèr enemi li gènt de soun oustau.

³⁷ Quau amo soun paire o sa maire mai que iéu, es pas digne de iéu, e quau amo soun fiéu o sa fiho mai que iéu, es pas digne de iéu.

³⁸ E quau noun pren sa crous e noun me seguis, nimai es pas digne de iéu.

³⁹ Aquéu que counservo sa vido, la perdra; e quau aura perdu sa vido pèr amor de iéu la retrouvara.

⁴⁰ Qu vous reçaup me reçaup, e qu me reçaup, reçaup aquéu que m'a manda.

⁴¹ Lou que reçaup un proufèto, sufis qu'es proufèto, reçaupra la recoumpènso dóu proufèto; e lou que reçaup un juste, sufis qu'es juste, reçaupra la recoumpènso dóu juste.

⁴² E quau aura fa béure soulamen un got d'aigo fresco à l'un d'aquéli mesquin, sufis qu'es un de mi disciple, veramen vous lou dise, perdra pas sa peno.