Sant Marc 7 - Lis Evangèli 1903 (Provençal)

CHAPITRE SETEN

Li Farisen e la tradicioun. — Es ço que prouvèn dóu cor que councho l'ome. — La Cananenco. — Garisoun d'un sourd e mut.

¹ Venguèron vers Jèsu, li Farisen e quàuquis Escribo qu'arribavon de Jerusalèn.

² Em'acò, entre avé vist quàuquis-un de si disciple que prenien soun repas emé de man impuro, valènt-à-dire noun lavado, ié cridèron contro.

³ Li Farisen, fau vous dire, e tóuti li Judiéu, manjon jamai sènso s'èstre lava e relava li man, qu'acò 's la tradicioun dis ancian.

⁴ Quouro tournon de la plaço, manjon pas sènso avé fa si lavado; e i'a 'ncaro proun d'àutri coustumo que lis óusservon pèr tradicioun, coume de lava li got, li dourgo, lis eisino de fèrri e peréu li lié.

⁵ Adounc, ié demandèron, li Farisen e lis Escribo: Coume vai que vòsti disciple óusservon pas la tradicioun dis ancian e prenon si repas emé de man impuro?

⁶ Mai éu ié respoundeguè: Isaìo a bèn proufetisa sus vautre, ipoucrito, quand escrivié: Aquéu pople d'aqui m'ounouro de bouco, mai a soun cor liuen de iéu.

⁷ En rèn i'avanço que m'ounouron, en ensignant de dóutrino e d'ourdounanço umano.

⁸ Avès, dóumaci, leissa de caire lou coumandamen de Diéu, em'acò gardas la tradicioun dis ome, lavas li dourgo e li got; e i'a 'ncaro bèn d'àutri causo ansin que fasès.

⁹ E ié disié: L'anulas en plen, lou coumandamen de Diéu, pèr vous n'en teni à vosto tradicioun.

¹⁰ Car Mouïse a di: Ounouro toun paire e ta maire; e: Qu maudira soun paire o sa maire, que more de mort.

¹¹ Mai vautre disès: S' un ome dis à soun paire o à sa maire: «Tout corban — valènt-à-dire doun — que vèn de iéu, es à voste proufié,»

¹² N'i'a proun, ié leissas rèn' faire de mai pèr soun paire o pèr sa maire,

¹³ Anulant d'aquéu biais la paraulo de Diéu emé vosto tradicioun, qu'es vàutri que l'avès establido; e i'a 'ncaro bèn d'àutri causo ansin que fasès.

¹⁴ Aguènt tourna-mai souna lou pople, éu diguè: Ausès-me tóuti, e coumprenès.

¹⁵ Noun i'a rèn foro de l'ome qu'en intrant dins éu, lou posque embruti; mai ço que sort de l'ome, vaqui ço qu'embrutis l'ome.

¹⁶ Se quaucun a d'auriho pèr entendre, qu'entende.

¹⁷ Quouro fuguè dins l'oustau, liuen dóu mounde, lou questiounèron si disciple sus aquelo parabolo.

¹⁸ E ié diguè: Coume! avès tant pau de sèn qu'acò? Capitas pas que tout ço que dóu deforo intro dins l'ome noun pòu l'embruti?

¹⁹ Dóumaci noun i'intro dins lou cor, mai ié davalo dins lou vèntre qu'à la secrèto pièi rejito tout ço qu'a tria d'impur dins lis alimen.

²⁰ Mai ço que sort de l'ome, éu disié, vaqui ço qu'embrutis l'ome.

²¹ Car es dóu dedins, es dóu cor dis ome que sorton li marrìdi pensado, lis adultèri, li fournicacioun, lis oumicide,

²² Li larrounice, l'avariçun, li meichantiso, li troumparié, lis impudicita, l'uei catiéu, lou blasfème, la supèrbi e la foulié.

²³ Tóuti aquéli mau, es dóu dintre que sorton e 'mbrutisson l'ome.

²⁴ Estènt parti d'aqui, s'enanè sus li counfigno de Tir e de Sidoun: intrè dins un oustau e voulié que res lou sachèsse, mai pousquè pas s'escoundre.

²⁵ Tant-lèu saupre qu'èro aqui, uno femo intrè, que sa chato èro agarrido de l'esperit orre, e toumbè à si pèd.

²⁶ Èro uno pagano, Siro-Feniciano de nacioun. Em'acò lou pregavo de foro-bandi lou demòni dóu cors de sa chato.

²⁷ Jèsu ié diguè: Laisso proumié lis enfant se restaura; es pas bèn, dóumaci, de prene lou pan dis enfant e de lou jita i chin.

²⁸ Mai elo ié respoundeguè, ié diguè: Verai, Segnour; mai li chinatoun manjon souto la taulo li brenigo di pichot.

²⁹ Éu ié venguè: Pèr aquelo paraulo, tè, filo, a sourti de ta chato lou demòni.

³⁰ E la femo, s'estènt enanado à soun oustau, trouvè sa pichoto couchado sus lou lié, que lou demòni avié parti.

³¹ Jèsu quitè lou terraire de Tir e venguè pèr Sidoun enjusquo à la mar de Galilèio, en travessant lou païs de la Decapòli.

³² Em'acò i'aduguèron un sourd e mut e lou suplicavon de i'impausa li man.

³³ Alor Jèsu lou prenènt à despart dóu mounde, ié boutè si det dins lis auriho e 'mé sa salivo ié touquè la lengo.

³⁴ Aussant pièi lis uei vers lou cèu, sous-pirè e ié diguè: Epliplietha, qu'acò vòu dire: Duerbe-te.

³⁵ E quatecant duberto fuguèron sis auriho e sa lengo sedesnousè, que parlavo courrentamen.

³⁶ Jèsu recoumandè i gènt que lou diguèsson en res.

³⁷ Mai dóu-mai ié recoumandavo, dóu-mai éli l'esbrudissien,

³⁸ E dóu-mai n'èron dins l'amiracioun disènt: A bèn fa touto causo; a fa ausi sourd e parla li mut.