Sant Marc 4 - Lis Evangèli 1903 (Provençal)

CHAPITRE QUATREN

Li parabolo dóu semenaire, de la semenço que vai creissènt à cha pau, e de la grano de serbe. — Brefounié sus lou lau de Genesarèt.

¹ E tourna-mai se boutè à predica dóu caire de la mar; e s'acampè à soun entour un tau mouloun de pople, que mountè s'asseta dins uno barco sus la mar, e touto la foulo èro en terro, long de la ribo.

² E i'ensignavo forço causo en parabolo, e ié disié dins soun ensignamen:

³ Ausès: Veici que sourtiguè lou semenaire pèr semena.

⁴ E d'enterin que semenavo, uno part de la semenço toumbè de-long dóu camin, em' acò venguèron lis aucèu de l'èr e la mangèron.

⁵ Uno autro part toumbè dins de rode peirous ounte i'avié qu'un pau de terro, e ié greiè lèu, qu'avié pas la founsour dé terro que falié.

⁶ Or, lou soulèu estènt leva, fuguè rabinado, e coume avié ges de tacino, se sequè.

⁷ Uno autro part toumbè dins lis espino, e lis espino en creissènt l'estoufèron, em' acò faguè ges de fru.

⁸ Uno autro part toumbè dins de terro bono e dounè de fru que mountavo e creissié, de maniero que quàuqui gran faguèron d'un trento, d'autre d'un sieissanto, d'autre d'un cènt.

⁹ E disié: Quau a d'auriho pèr l'ausi, que que l'ause.

¹⁰ Tre que se devinè soulet, li Douge qu'èron em' éu lou questiounèron sus aquelo parabolo.

¹¹ E ié diguè: A vautre vous es douna de counèisse lou mistèri dóu reiaume de Diéu; mai pèr aquéli que deforo soun, tout acò se passo en parabolo,

¹² De maniero que, tout en ié vesènt, vegon e vegon pas, e tout en escoutant, noun auson ni coumprengon, cregnènço de se counverti e d'avé lou perdoun de si pecat.

¹³ E ié diguè: La coumprenès pancaro, aquelo parabolo? Coume li coumprendrés alor, tóuti lis àutri parabolo?

¹⁴ Aquéu que semeno, semeno la paraulo.

¹⁵ Or, d'ùni que i'a soun de-long dóu camin ounte se semeno la paraulo, e quouro l'an ausido, zóu! vèn Satan e piho la paraulo qu'èro estado semenado dins si cor.

¹⁶ D'ùni que i'a tambèn reçaupon la semenço dins de rode peirous; entre ausi la paraulo, lèu-lèu emé grand gau la reçaupon;

¹⁷ Mai de racino estènt sènso, duron qu'un tèms; em' acò pièi vèngue lou treboulun e la persecucioun à prepaus de la paraulo, tant-lèu soun escandalisa.

¹⁸ D'àutri que i'a reçaupon la semenço dins lis espino: es aquéli qu'escouton la paraulo;

¹⁹ Mai li pensamen d'aquest siècle e l'engano di richesso emai lis àutri coubesènço fasènt intrado en éli i'estoufon la paraulo, e de fru n'i'a pas ges.

²⁰ Enfin aquéli qu'an agu la semenço en bono terro, es aquéli qu'escouton la paraulo, la reçaupon e cargon de fru fasènt d'un trento d'un sieissanto e d'un cènt.

²¹ Ié disié peréu: Es que fan veni lou lume, pèr lou bouta souto la panau o bèn souto lou lié? N'es-ti pas pèr lou bouta sus lou candelié?

²² Dóumaci noun i'a rèn d'escoundu que noun ague d'èstre desacata, e rèn se fai à la secrèto que noun ague de parèisse au grand jour.

²³ Se quaucun a d'auriho pèr entèndre, qu'entènde.

²⁴ Ié disié mai: Fasès atencioun à ço qu'entendès. Emé la mesuro qu'aurés mesura lis autre vous mesuraran, e vous n'i'apoundran encaro.

²⁵ Dóumaci quau a ié dounaran; e quau noun a, meme ço qu'a ié levaran.

²⁶ Disié tambèn: N'en es dóu reiaume de Diéu coume quand un ome fai de semenço dins uno terro.

²⁷ Que dorme, que se lève, de niue o de jour, la semenço greio e crèis sènso que se n'avise.

²⁸ Car es la terro que jito d'esperelo, proumié l'erbo, pièi l'espigo e pièi lou blad que grano dins l'espigo;

²⁹ Em'acò quand es madur, zóu! ié mandon lou voulame, per-ço-que la meissoun es aqui.

³⁰ Disié mai: En que coumpararen lou reiaume de Diéu? e pèr quinto parabolo lou representaren?

³¹ Es coume uno grano de serbe que, quouro la semenon, es la mai pichouneto de tóuti li grano que soun sus la terro;

³² Mai, uno fes semenado, elo mounto e vèn mai auto que tóuti li liéume, e jito de branco proun grando pèr que poscon à l'oumbro, lis aucèu de l'èr, se ié pausa.

³³ Pèr de noumbróusi parabolo d'aquéu biais, éu ié parlavo. Ansin, en diferènti parabolo, éu predicavo sa paraulo, segound coume poudien l'entèndre;

³⁴ E noun ié parlavo pas sènso parabolo; mai pièi à despart esclargissié tout acò à si disciple.

³⁵ Aquéu meme jour, sus lou sero, ié diguè: Passen de l'autro man.

³⁶ Faguèron dounc parti la foulo, e lou menèron em' éli dins la barco mounte èro; e d'àutri barco l'acoumpagnavon.

³⁷ Em' acò faguè 'no grosso brefounié de vènt que mandavo lis erso dins la barco, bèn tant que la barco s'emplissié.

³⁸ Jèsu èro d'à-poupo, sus un couissin, que dourmié. Lèu lou revihon e ié dison: Mèstre, noun vous enchau alor que periguen?

³⁹ Alor, s'aubourant, remouchinè lou vènt e diguè à la mar: Chut! taiso-te. E s'abauquè lou vènt e i'aguè 'no grand calamo.

⁴⁰ E ié diguè à-n-éli: Perqué vous esfraias? Avès panca la fe? E fuguèron dins uno grand cregnènço, e se venien de l'un à l'autre: Quau es aquéu, digas, que lou vènt e la mar i'óubeïsson?