Sant Marc 3 - Lis Evangèli 1903 (Provençal)

CHAPITRE TRESEN

L'ome de la man entre-secado. — Sus li ribo dóu lau. — Voucacioun di douge apoustòli — Si noum. — Pecat contro lou Sant-Esperit. — La maire e li fraire dóu Crist.

¹ Jèsu intrè mai dins la sinagogo; e se ié capitavo un ome qu'avié 'no man entre-secado.

² Or, tenien d'àment pèr vèire se lou garirié un jour de sabat, e acò sus l'estiganço de l'acusa.

³ Mai ié diguè à l'ome de la man entre-secado: Vène eici au mitan.

⁴ E ié faguè à-n-éli: Es permés, lou jour dóu sabat, de faire de bèn o de mau? de sauva la vido o de la leva? Mai gardavon soun chut.

⁵ Alor lis alucant tóuti à-de-rèng emé la coulèro, entristesi de l'avuglige de soun cor, éu diguè à l'ome: Alongo ta man. Em'acò l'alounguè, e sa man ié fuguè rendudo.

⁶ Li Farisen, estènt sourti, tenguèron tout-d'un-tèms counsèu contro éu emé lis Eroudian, pèr trouva lou biais de lou perdre.

⁷ Mai Jèsu se retirè 'mé si disciple de-vers la mar; e 'no troupelado de mounde lou seguiguè, de la Galilèio e de la Judèio,

⁸ Emai de Jerusalèn, de l'Idumèio e de la man dela dóu Jourdan; jusquo li gènt peraqui de Tir e de Sidoun, en aprenènt li causo que fasié, venguèron à moulounado lou trouva.

⁹ E coumandè à si disciple que ié tenguès-son un barquet de-countùni, raport à la foulo de pople, pèr pas n'èstre aclapa.

¹⁰ Dóumaci, estènt que n'en garissié que-noun-sai, tóuti aquéli qu'avien quauque mau, se rounsavon sus éu pèr lou touca.

¹¹ Meme lis esperit orre, tre lou vèire, toumbavon à si pèd, e bramavon disènt:

¹² Tu, siés lou Fiéu de Diéu! Mai éu li remouchinant severamen, ié defendié de lou faire counèisse.

¹³ Mountè pièi sus uno mountagno, e sounè à soun entour aquéli que vouguè; e venguèron vers éu.

¹⁴ N'establiguè douge pèr lis avé à sa coumpagno e li manda predica.

¹⁵ E ié dounè lou poudé de gari li malautié e de coussaia li demòni.

¹⁶ Èro: Simoun, en quau dounè lou noum de Pèire;

¹⁷ Jaque de Zebediéu e Jan fraire de Jaque, que li noumè Boanergès, qu'acò vòu dire fiéu dóu tron;

¹⁸ Andriéu, Felip, Bartoumiéu, Matiéu, Toumas, Jaque d'Aufiéu, Tadiéu, Simoun lou Cananen,

¹⁹ E Judas l'Escariot, aquéu que lou trahiguè.

²⁰ Venguèron à l'oustau, e i'aguè mai un escabot de mounde, bèn tant que poudien pas meme prene si repas.

²¹ Si parènt, tre lou saché, venguèron que voulien l'aganta, car disien: A vira lou sèn.

²² E lis Escribo, qu'èron descendu de Jerusalèn, disien: A Belzebut dins lou cors, e 's pèr lou prince di demòni que coucho li demòni.

²³ Jèsu lis aguènt souna, en parabolo ié disié: Coume pòu, Satan, coucha Satan?

²⁴ Un reiaume, s'es contro éu meme divisa, noun pòu aquéu reiaume teni dre.

²⁵ Un oustau peréu, s'es contro éu-meme divisa, noun pòu aquel oustau teni dre.

²⁶ Adounc, se Satan se fai la guerro, es divisa, e pourra plus se manteni, mai acò 's sa fin.

²⁷ Degun pòu intra dins l'obstau dóu fort pèr ié piha sis eisino, s' a pas siuen proumié d'estaca lou fort; après, pourra 'nsin ié piha soun oustau,

²⁸ Veramen vous Lou dise, tóuti li pecat saran remés is enfant dis ome, emai li blasfème qu'auran larga.

²⁹ Mai quau blasfemara contro lou Sant-Esperit, noun jamai n'aura lou perdoun, mai coupable sara d'un crime eternau.

³⁰ Ansin parlè, per-ço-que disien Es l'esperit inmounde que lou tèn.

³¹ Pamens, sa maire e si fraire arribèron; e de deforo ié faguèron dire que lou demandavon.

³² Or, la foulo èro assetado à l'entour d'éu, em' acò ié venguèron: Vès, i'a vosto maire e vòsti fraire aqui deforo que vous demandon.

³³ Ié respoundeguè: Quau es ma mmaire? e quau soun mi fraire?

³⁴ E mandant lis uei sus aquéli qu'èron asseta à soun entour, diguè: Vaqui ma maire e mi fraire.

³⁵ Efetivamen, quau fai la voulounta de Diéu, aquéu-d'aqui es moun fraire e ma sorre e ma maire.