Sant Marc 16 - Lis Evangèli 1903 (Provençal)

CHAPITRE SEGEN

Li sànti femo au toumbèu. — Lis aparicioun dóu Crist ressuscita. — Messioun dounado is apoustòli. — L'ascensioun.

¹ Quouro fuguè fini lou sabat, Marìo-Madaleno, e Marìo de Jaque emai Saloumè, croumpèron d'aroumat, sus l'estiganço de veni embauma Jèsu.

² E de grand matin, l'endeman dóu sabat, venguèron au sepucre, que fasié deja soulèu.

³ E se disien de l'uno à l'autro: Quau nous revessara la pèiro de l'intrado dóu sepucre?

⁴ Em'acò, tout en espinchant, veguèron qu'èro revessado la pèiro. Es qu'èro grosso bravamen.

⁵ E intrant dins lou sepucre, veguèron un jouvènt asseta à man drecho, vesti d'uno raubo blanco; e fuguèron esfraiado.

⁶ Mai éu ié venguè: Vous esfraiés pas. Cercas Jèsu de Nazarèt, qu'es esta crucifica. A ressuscita, i'es plus eici! veici lou rode ounte l'avien mes.

⁷ Mai anas-vous-en, digas à si disciple e à Pèire, que s'envai davans vautre en Galilèio; es aqui que lou veirés, coume vous l'a di.

⁸ Li femo, sourtènt dóu sepucre, s'encourreguèron; avien, dóumaci, lou tremoulun e l'esfrai dins l'amo, e diguèron rèn en res emé la pòu qu'avien.

⁹ Or Jèsu, estènt ressuscita lou matin, lou proumié jour après lou sabat, se faguè vèire d'abord à Marìo-Madaleno, qu'es d'elo qu'avié foro-bandi sèt demòni.

¹⁰ Elo anè l'anouncia i disciple que se descounsoulavon e plouravon.

¹¹ Mai aquésti, d'ausi dire qu'èro en vido e qu'elo l'avié vist, la creiguèron pas.

¹² Apareiguè pièi, souto uno autro formo, à dous d'éli qu'èron en camin e qu'anavon à la campagno à-n-uno bastido.

¹³ Aquésti tambèn lou venguèron dire is autre; mai li creiguèron pas ni-mai.

¹⁴ Enfin apareiguè i Vounge, d'enterin qu'èron à taulo; e ié reprouchè soun incredulita emai sa dureta de cor, dóumaci avien pas creigu aquéli que l'avien vist ressuscita.

¹⁵ E ié diguè: Anas-vous-en dins lou mounde entié, e predicas l'Evangèli à touto creaturo.

¹⁶ Aquéu que creira e que sara bateja, sara sauva; mai aquéu que noun creira sara coundana.

¹⁷ Vès-eici li miracle qu'auran en soun poudé aquéli que creiran: En moun noum bandiran li demòni; parlaran de lengo nouvello;

¹⁸ Manejaran li serpènt; e, se bevon quauco bevèndo pourtant mort, ié fara ges de mau; impausaran li man sus li malaut, e se trouvaran bèn.

¹⁹ Lou Segne Jèsu, quouro aguè fini de ié parla, fuguè enaussa dins lou cèu, e es asseta à la drecho de Diéu.

²⁰ Éli, estènt parti, prediquèron de tout caire, lou Segnour agissènt em'éli e counfier-mant si predicanço pèr li miracle que lis acoumpagnavon.