Sant Marc 13 - Lis Evangèli 1903 (Provençal)

CHAPITRE TREGEN

Noste-Segne proufetiso l'abóusounamen dóu Tèmple. — Signe qu'anounciaran la rouino de Jerusalèn e la fin dóu mounde. — Necessita de se teni revihadis.

¹ Coume Jèsu sourtié dóu tèmple, ié venguè un de si disciple: Mèstre, espinchas quénti queirado e quinte cors de bastimen.

² E ié respoundeguè Jèsu, ié diguè: Veses tóuti aquéli grandi bastisso? Noun ié restara pèiro sus pèiro, que noun siegue demoulido.

³ Coume èro asseta, pièi, sus lou mount dis Ouliveto, à dre dóu tèmple, lou questiounèron à despart Pèire emé Jaque, emai Jan e Andriéu:

⁴ Digas-nous, quouro acò se fara e quinte sara l'entre-signe que tout acò coumençara de se coumpli.

⁵ E Jèsu, respoundènt, se boutè à ié dire: Avisas-vous que res vous engane.

⁶ N'i'a forço, dóumaci, que vendran en moun noum, disènt: Es iéu lou Crist! e n'enganaran de bèu.

⁷ Or, quouro ausirés parla de guerro e de brut de guerro, agués pas pòu: fau qu'acò ague d'èstre, mai es panca la fin.

⁸ Dóumaci, se partiran contro, li nacioun emé li nacioun, li reiaume emé li reiaume, e i'aura de tremoulun de terro en proun de part emai de famino. Sara la coumençanço di malagno, acò-d'aqui.

⁹ Dounas-vous siuen de vautre. Sarés cita davans li tribunau, e dins li sinagogo vous varenglaran, e davans li gouvernour e li rèi vous presentarés pèr me rèndre testimòni davans éli.

¹⁰ Mai d'en-proumié, fau qu'en tóuti li nacioun siegue predica l'Evangèli.

¹¹ Quouro dounc vous menaran en justiço, pensés pas d'avanço à ço que dirés; mai ço que vous vendra sus lou moumen, digas-lou, car noun es vàutri que parlarés, mai lou Sant-Esperit.

¹² Alor lou fraire abandounara soun fraire à la mort, e lou paire soun fiéu; enjusquo lis enfant se reviraran contro si gènt e li faran mouri.

¹³ E sarés agouni de tóuti, raport à moun noum. Mai quau tendra bon enjusqu'au bout sara sauva.

¹⁴ Or, se 'n-cop veirés l'abouminacioun de la desoulacioun se teni ounte fau pas (qu legis coumprengue!) alor aquéli qu'en Judèio soun, encourron-se vers li mountagno.

¹⁵ Aquéu qu'es sus la téulisso que noun davale à soun oustau nimai que i'intre pas pèr empourta quaucarèn de soun oustau.

¹⁶ E aquéu qu'es dins li terro que noun s'entourne pèr prene soun vièsti.

¹⁷ Malur is empregnado, emai i femo que nourriran en aquéu tèms!

¹⁸ Pregas pèr que noun arribe acò dins l'ivèr.

¹⁹ I'aura, dóumaci, en aquéu tèms, de jour de treboulige tau, que n'i'a ges agu d'ansin dempièi la coumençanço dóu mounde crea pèr Diéu, enjusqu'à l'ouro d'aro, e coume n'i'aura jamai.

²⁰ E se n'avié, lou Segnour, acourchi aquéli jour d'aqui, touto car noun istarié sauvo; mai raport is elegi qu'a chausi, a acourchi aquéli jour.

²¹ Alor se quaucun vai vous dire: Vès, es eici lou Crist! vès, es eila! lou creigués pas.

²² Car s'aubourara de faus crist e de faus proufèto, que faran de meraviho e de causo espetaclouso pèr engana, s'acò se poudié, jusquo lis elegi.

²³ Vautre dounc, avisas-vous! vaqui, vous ai predi touto causo.

²⁴ Mai, en aquéli jour d'aqui, passado aquelo treboulacioun, lou soulèu s'ensournira, e la luno fara plus lume,

²⁵ Lis estello dóu cèu degoularan e li vertu celestialo saran en desbrando.

²⁶ E alor veiran lou Fiéu de l'ome veni sus li niéu em'uno puissanço e 'no glòri di grando.

²⁷ E alor mandara sis ange e arrabaiara sis elegi di quatre vènt, dóu fin bout de la terro à la fino cimo dóu cèu.

²⁸ Aprenès eiçò pèr la parabolo de la figuiero. Quouro li brout soun encaro tèndre e que li fueio an sourti, couneissès qu'es pas liuen l'estiéu;

²⁹ Ansin vautre, quouro veirés aquéli causo se coumpli, sachés qu'acò 's proche, à vosto porto.

³⁰ Veramen vous lou dise, aquesto generacioun noun passara pas, d'aqui-que tout acò se fague.

³¹ Lou cèu e la terro passaran, mai mi paraulo de iéu passaran pas.

³² D'aquéu jour e d'aquelo ouro degun n'a couneissènço, pas meme lis ange de paradis, nimai lou Fiéu; i'a rèn que lou Paire.

³³ Avisas-vous, vihas e pregas; sabès pas, dóumaci, quouro aquéu tèms vendra.

³⁴ N'en sara coume d'un ome que, partènt pèr li païs liuen, laisso soun oustau e baio lou gouvèr à si serviciau, emé soun pres-fa en cadun, e coumando au pourtié de viha.

³⁵ Vihas dounc, que noun sabès quouro lou mèstre de l'oustau vendra, s'es de-sero o bèn à miejo-niue, au cant dóu gau o bèn lou matin;

³⁶ Cregnènço que, revenènt à l'imprevisto, noun vous trove endourmi.

³⁷ Ço que vous dise à vautre, à touti lou dise: Vihas!