Sant Marc 11 - Lis Evangèli 1903 (Provençal)

CHAPITRE VOUNGEN

Intrado triounfalo de Noste-Segne à Jerusalèn. — La figuiero maudicho. — Bandisoun di vendèire dóu Tèmple. — Ço que pòu la fe. — Li prince di prèire remouca pèr lou divin Mèstre.

¹ Coume se devinavon proche de Jerusalèn e de Betanìo, vers la mountagno dis Oulivo, Jèsu mandè dous de si disciple,

² E ié diguè: Anas au vilage qu'avès aqui contro, e tant-lèu intra, ié trouvarés un asenoun à l'estaco, que res i'a 'ncaro mounta dessus; destacas-lou e adusès-lou.

³ E se quaucun vous vèn: Que fasès aqui? digas-ié: Lou Segnour n'a de besoun; e tout-d'un-tèms vous lou leissaran adurre eici.

⁴ S'estènt dounc enana, trouvèron l'asenoun estaca davans uno porto, deforo, entre dous camin; em'acò lou destaquèron.

⁵ Mai di gènt qu'èron aqui, n'i'aguè que ié diguèron: Coume vai que destacas aquéu saumin?

⁶ Éli ié respoundeguèron coume Jèsu i'avié di; e ié leissèron mena.

⁷ Em'aco l'aduguèron à Jèsu, l'asenoun, e dessus ié boutèron si vièsti; éu ié mountè dessus.

⁸ Or, forço gènt espandiguèron sis abihage sus lou camin; d'autre coupavon de broundo is aubre e n'en fasien un terro-sòu.

⁹ E li persouno qu'anavon davans emai aquéli que venien après, cridavon en disènt: Hosanna!

¹⁰ Benesi aquéu que vèn au noum dóu Segnour! Benesi lou règne, qu'arribo, de noste paire Dàvi! Hosanna fin-qu'aperamoundaut.

¹¹ Jèsu intrè à Jerusalèn dins lou tèmple; e quouro aguè 'spincha touto causo, coume deja erian au vèspre, éu partiguè pèr Betanìo emé li Douge.

¹² L'endeman, coume sourtien de Betanìo, éu aguè fam.

¹³ Em'acò vesènt de liuen uno figuiero cargado de fueio, anè vèire se ié trouvarié quicon; mai quand fuguè contro elo, noun ié trouvè que de fueio: erian pancaro, dóumaci, au tèms di figo.

¹⁴ Prenènt la paraulo ié diguè: Que jamai plus degun mange frucho de tu eternamen. E l'entendeguèron si disciple.

¹⁵ Venguèron pièi à Jerusalèn. Quouro Jèsu fuguè intra dins lou tèmple, coumencè de bouta deforo aquéli que vendien e croumpavon dins lou tèmple; devessè li taulo di chanjaire e li sèti di vendèire de couloumbo.

¹⁶ Leissavo pas nimai lou mounde carreja sis eisino à travès lou tèmple.

¹⁷ E lis ensignavo disènt: Es que noun es escri: Moun oustau l'apelaran un oustau de preguiero pèr tóuti li nacioun?

¹⁸ Ausi acò-d'aqui, li prince di prèire e lis Escribo cercavon un biais pèr lou mena perdre; lou cregnien, dóumaci, estènt que tout lou mounde èro en amiracioun davans sa dóutrino.

¹⁹ Quand fuguerian au vèspre, éu sourtiguè de la vilo.

²⁰ Lou matin, en passant, li disciple veguèron la figuiero que s'èro dessecado enjusquo i racino.

²¹ E Pèire, s'estènt souvengu, ié diguè: Mèstre, vès la figuiero qu'avès maudicho, es dessecado.

²² Jèsu, prenènt la paraulo, ié diguè à-n-éli: Agués fe en Diéu.

²³ Veramen vous lou dise, aquéu que dira 'nsin à-n-aquelo mountagno: Lèvo-te d'aqui e jito-te dins la mar! se noun chancello en soun cor, mai se crèi que tout ço qu'aura di se fara, lou veira se faire.

²⁴ Amor d'acò vous dise: Tout ço que demandarés en pregant, cresès que lou reçauprés, e vous arribara.

²⁵ E quouro vous tendrés dre pèr prega, perdounas s'avès quaucarèn contro quaucun, pèr que voste Paire, qu'es dins lou cèu, vous perdoune à vautre vòsti pecat.

²⁶ Se vautre noun perdounas, nimai voste Paire, qu'es dins lou cèu, noun vous perdounara vòsti pecat.

²⁷ Tournèron mai à Jerusalèn. E coume Jèsu s'espaçavo dins lou tèmple, s'avancèron d'éu li prince e li prèire, lis Escribo e lis Ancian,

²⁸ E ié venguèron: Pèr quinte poudé fasès aquéli causo? e quau vous a douna 'nsin lou poudé de li faire?

²⁹ Jèsu ié respoundeguè: Vous demandarai, iéu tambèn, uno causo; respoundès me, e vous dirai en vertu de que poudé fau aquéli causo.

³⁰ Lou batejat de Jan èro-ti dóu cèu o dis ome? Respoundès-me.

³¹ Mai aquésti se pensavon e venien: Se respoundèn: «Dóu cèu,» nous dira: Coume vai alor qu'avès pas creigu en éu?

³² Se disèn: «Dis ome,» avèn à nous avisa dóu pople. Tóuti, en efèt, regardavon Jan dóu bon coume un proufèto.

³³ Adounc respoundeguèron à Jèsu: Sabèn pas. E Jèsu ié rebriquè: Nimai iéu vous dise pas pèr que poudé fau aquéli causo.